當我同敏敏個鼻只有1cm 距離嘅時候,我真係見到,有一條黑色嘅嘢喺敏敏鼻孔前出現。
第一刻,我真係有啲震驚,想望清楚到底呢一條係咩嘅蟲呢?
到底傳說中嘅蠱蟲又係啲咩嚟呢?
 
當我擘大眼再望清楚少少之後,我終於睇到呢條黑色嘢嘅真面貌!
「仆你個街,鼻毛嚟嘅!」我忍唔住向八仙果師父大嗌一聲。
「哦……咁可能係破蠱大法未生效啫,精誠所至,金石為開,施主你不能夠太心急啊!」講完呢句之後,八仙果師父又開始圍住敏敏兜圈去灑佢啲八仙果,口入面又繼續講住佢嗰啲咩「『蟲』頭開始 多多一次靠你我來重演」。
我唯有無奈咁繼續重埋一邊,睇住呢一場都唔知係驅蠱定鬧劇嘅上演。
 
就係咁,時間又過咗一粒鐘,連八仙果師父所講嘅「午時三刻」都過埋。


而喺呢個鐘入面,八仙果師父已經足足開咗成十罐八仙果,嗌到連聲都沙埋,但係莫過話蟲,就連鼻毛都無出現過多一條。
「走啦,呢個擺明係神棍嚟。」我終於忍唔住企咗起身,走過去拉起本身合埋咗眼嘅敏敏。
「施主且慢,女施主體內嘅毒蟲咁耐都唔出嚟,代表一定係一條唔簡單嘅毒蟲。但係經過呢一個鐘努力,我相信毒蟲已經差唔多出嚟,如果而家半途而廢,恐怕之後女施主會有不測。」雖然八仙果師父講得相當認真,但係呢一個鐘入面睇住佢好似做馬騮戲咁,我已經完全對佢失去信心。
「不測?我再坐喺度聽你唱『蟲』不喜歡孤單一個,我就真係有不測喇。」我一手拖住敏敏,繼續走向天台嘅門口。
「施主,起碼都找埋條數先吖,今次用咗十罐八仙果總共$688喎!仲有一開始我用嗰啲煙霧效果都要俾錢㗎!種善因,得仙果啊!」八仙果師父喺我背後大叫。
「死神棍!我實上連登唱衰你啊!」我隨手拋咗幾張一百蚊紙去身後,頭也不回咁就走咗。
 
比起敏敏,我對於呢個八仙果師父呃人更加不忿。
原本我一心想醫好敏敏,點知到頭來反而要敏敏好似傻仔咁俾嗰個八仙果玩足一個上晝,呢啲就係希望愈大,失望愈大。
為咗俾我散下心,敏敏陪我從深水埗開始慢慢散下步傾下計,不知不覺間就行咗去旺角。


我哋一路行,一路掃下街再吹下水,我嘅心情先好翻少少。
食埋晚餐之後,敏敏習慣要行下俾啲嘢食落格,所以我又陪佢喺旺角兜下圈。
當我哋行經百老匯戲院對出嗰邊嘅一片空地嘅時候,敏敏突然拉停咗我,好興奮咁指住喺空地度Busking緊嘅人講:「喂,佢唱緊我哋首歌啊,過去聽囉!」
 
我同敏敏就咁迫入人群之間,圍圈去聽中間Busking嘅人唱歌。
而佢唱緊,係Dear Jane嘅《不許你注定一人》。
敏敏之所以話呢首歌係我同佢嘅歌,因為當年我同佢喺大學聖誕舞會第一次相識嘅時候,當時嘅樂隊正正就係唱緊呢首歌。
 
「原來……我哋同呢首歌眨下眼都七年喇。」敏敏輕輕挨住我嘅膊頭,好似有啲感慨咁講。
「你仲好講,當年明明唱緊《不許你注定一人》,點知首歌唱到一半你就怕羞突然跑咗去,搞到我以為『聖誕我注定一人』啊。」我笑住提起當年嘅一件醜事。


 
想當年,我同敏敏其實係喺大學聖誕舞會由各自嘅朋友介紹所認識嘅。
當時我都係第一次去Ball,聽到主持人話要捉住Partner隻手跳舞,就尷尷尬尬咁捉起咗初相識嘅敏敏隻手。
而敏敏嗰時都好怕羞,低住頭伸出咗隻手俾我捉住。
但係當主持人講到男仔另一隻手要放去女仔條腰度嘅時候,我嗰時因為太緊張,隻手都只係敢凌空放咗敏敏腰嘅側邊。
當時嘅樂隊,咁啱唱緊嘅就係唱當年好Hit嘅《不許你注定一人》。
當時全場嘅紅男綠女都隨住音樂開始搖動身體,而我同敏敏都嘗試跟節拍一左一右咁郁下。
當歌詞唱到:「不許你注定一人~永遠共你去抱緊~一生中百樣可能~遇上你是種緣分~」
我嗰時望實個樣又純真又有幾分似試當真Yanny嘅敏敏,仲要聽住啲咁鬼死浪漫嘅歌詞,心裡面對呢個第一次見嘅女仔好容易就有咗好感。
 
正當我諗住希望可以同敏敏有發展嘅時候,敏敏突然鬆開咗捉住我嘅手,頭也不回咁就走咗。
當時嘅我喺原地度呆咗,側邊好多人都細聲講大聲笑,猜測緊係咪我抽敏敏水或者講錯啲咩,所以先令到佢突然走咗去。
已有 0 人追稿