《求婚嗰日，我發現我女朋友鍾意食屎》: 十三

直到完咗個聖誕舞會嘅第二日，敏敏個Friend先拉住敏敏再次出現，然後俾敏敏同我講「對唔住」。
敏敏話，自己當時只係太緊張，先會突然走咗去，為咗陪罪，佢話下次請翻我食飯。
亦都因為咁，所以我哋交換咗電話，然後先有之後嘅後續發展再成為情侶。
諗翻轉頭，雖然聖誕舞會嗰一晚「站著如嘍囉」真係有啲瘀，但係最後可以換嚟敏敏成為我嘅女朋友，成件事都係值得嘅。
 
「其實呢，講起呢件事，我都要同翻你講聲『對唔住』，因為當年我話你知我係緊張所以跑咗去，其實……我係呃你嘅。」敏敏有啲歉意咁耷低咗頭。
「吓，咁你當年做咩無啦啦跑咗去？」我好奇咁問。
「唉，當年同你跳舞之前呢，有一個同我住同一幢宿舍嘅男仔特登邀請我跳舞，跳完之後，佢竟然攞咗一盒朱古力同我表白啊！嘩，我一見到，即刻已經有想食屎嘅衝動，點知我就即刻俾我朋友拉咗去見個咩『中大彭于晏』，原來就係你喇。雖然你唔太似彭于晏，只不過你都係我鍾意嘅單眼皮斯文樣，所以我一路同你跳舞，其實一路忍耐想食屎嘅衝動，睇下有冇機會可以同你再發展。點知，嗰時對Band唱到『不作陌生人，只做你情人』嘅時候走音，將個『只』唱咗做『屎』。我本身已經想努力分心唔再諗屎，但俾佢一拉翻個思緒翻嚟就忍唔住，所以唯有即刻衝去廁所食屎囉……好彩你第二日肯理翻我咋。」敏敏一邊講一邊又忍唔住笑。
原來有好多嘢，當年無論幾尷尬同擔心，而家睇翻轉頭，都係得啖笑。
 


「我想講，其實頭先我咁嬲，唔係因為俾嗰個八仙果呃咗錢，而係我一心諗住可以幫到你，點知到頭嚟只係一場歡喜一場空，我係嬲佢令你失望。」我嘆咗一口氣。
「其實，呢個病都咁多年啦，施主，『越出則Budda』啊！」敏敏扮住八仙果師父把聲講出呢句「欲速則不達」，成功氹到我笑咗一笑，然後佢繼續講，「不過我知道你咁關心我，我都好開心。」
我將身邊嘅敏敏攬實咗，細聲但係肯定咁同佢講：「呢個幫唔到你，我哋就再搵下一個，直到搵到幫到你嘅人為止。總之無論發生咩事，我都會陪住你，唔會俾你好似當年聖誕舞會咁粒聲唔出走咗去。」
敏敏用微笑同點頭回應我，亦喺我左邊面輕輕錫咗一啖。
呢個時候，Busking嘅嗰一對Band啱啱好換咗歌做《哪裡只得我共你》，於是，我同敏敏就互相望住對方，跟住對Band哼：「吻下去　便確定我共你　能同生　能同死～」
呢一刻嘅敏敏，同七年前聖誕舞會嘅佢一樣，依然咁純真、依然有幾分似Stephy。
唯一唔同嘅係，我已經由當年對佢有少少好感，變成今日決意要好好守護住佢嘅人生。
 
行完旺角，天色都已經昏暗，所以我同敏敏就起行回家。
畢竟我哋已經由朝早去搵八仙果師父到而家行足一日，兩個人都已經筋疲力竭，所以一翻到屋企各自沖涼之後，十一點都未夠就已經攤哂上床瞓覺。


 
瞓到唔知幾多點，我突然感受到自己手臂有啲痕。
我迷迷糊糊咁搲咗幾下就繼續瞓，點知嗰種痕癢嘅感覺，好快又翻咗嚟。
就好似，有人惡作劇咁用手指搲緊我手臂一樣。
「敏敏啊，唔好玩啦，夜喇，瞓啦。」我好似鬼食泥咁講咗一句，打算繼續瞓。
但係嗰種痕偏偏就開始由手臂開始上升到去膊頭位，而且間房仲多咗啲「時時」聲。
 
根據我瞓覺多年嘅專業知識，趁你瞓覺先搞到你痕然後又會發出啲聲嘈住你嘅生物只有一種。
無錯，就係世上最乞人憎嘅蚊。
而要解決蚊就只有一個方法，就係完完全全咁殺死佢。


於是，我一邊捽住隻眼，一邊㩒著床邊個燈制，打算同隻蚊嚟一場禁室培慾死鬥戰。
今晚，唔係佢死，就係我失眠！
 
「嗒」一聲，燈開咗，我喺張床上面坐直咗，盡全力擘大眼，望實自己手臂講：「既然你咁大膽吸我啲血，我而家就打死……！」
「你」呢個字未講出口，我已經失咗聲，換成咗嗌出另一個字：「蟲啊！」
敏敏喺我身邊俾我呢聲大嗌嘈到醒咗，半睡半醒咁講：「有蟲咪打囉，做咩大嗌嘈醒埋我啊？」
「蟲啊，好多蟲啊，好撚多蟲啊！」呢一刻，我已經係用緊「喪」嘅方法大嗌出嚟。
「喂啊，都話唔俾講粗口囉，好無禮貌㗎！」敏敏終於俾我嘈到坐直埋喺張床度，慢慢睜開佢對眼。
然後，不出半秒，敏敏即刻發出咗比我大十倍嘅聲音：「屌！好撚多蟲啊！」
 
千奇唔好以為我哋兩個細膽或者小題大造。
因為，呢一刻我哋見到嘅，係我哋張雙人床下面嘅地板，鋪滿咗過百條五顏六色嘅蟲，有長有短，每一條都生動活潑。
如果我俾少少想像力，我而家就好似望緊一條會流動嘅河流一樣。
而頭先我之所以會痕，原來係因為有一條蜈蚣爬咗上我隻手度。
 


突然，敏敏指住左邊大叫一聲：「死喇！啲蟲開始爬上嚟喇！」
我一望過去，果然有好幾條有中指咁長嘅綠黃色大蟲，開始慢慢沿住床腳爬緊上嚟。
我同敏敏呢一刻就好似兩個坐咗喺最後一塊冰川上面嘅求救者，四周圍都俾唔同嘅蟲所包圍，再無退路。