《求婚嗰日，我發現我女朋友鍾意食屎》: 十五
「八仙果師父？！」敏敏好驚訝咁叫咗出嚟。
「你點入嚟㗎？」我同樣好意外咁問。
「如果你問我點入屋，我係打爆咗你度門走入嚟嘅；如果你問我點入房，我頭先係打個筋斗飛過堆蟲之後入嚟嘅。吖，係，打筋斗嘅時候我仲順便拉翻你翻嚟添。」八仙果師父一邊講，一邊雙手各自伸出兩指做個十字嘅動作，然後慢慢咁講：「今日下晝，我早已經講過，驅蠱大法進行到一半就走係一件極之危險嘅事，好彩我有刻意留意住今晚啲蟲嘅走向，先趕得切嚟救你哋。」
「你哋要明白，『蠱』，本身就係由一堆毒蟲互鬥，直到最後生存嘅唯一一條毒蟲而造成嘅。所以能夠成為『蠱』嘅蟲，唔單止對人類，對昆蟲本身都係一樣極有吸引力嘅嘢。因為只要可以食到『蠱蟲』，一般嘅昆蟲都會戰鬥力大增，方便佢日常覓食。而今日下晝嘅時候，你女朋友驅蠱驅到一半，亦都即係佢體內嘅『蠱蟲』可能已經開始活動準備離開。『蠱蟲』嘅行動，正好令你女朋友身上留低咗平時唔會有嘅『蠱蟲』氣味，所以一到夜晚陰盛陽衰之時，自然成千上萬嘅蟲都會跟住氣味嚟到你嘅屋企，希望可以食到你女朋友肚入面嘅『蠱蟲』，成為蟲中之霸。」八師父合埋眼，好認真咁解釋。
「我又唔明喇，條『蠱蟲』喺我女朋友體內，咁其他蟲又點會食到條『蠱蟲』呢？」我一臉疑惑咁問。
「有幾難呢？鑽入佢體內咪食得囉！」八仙果師父臉容不改咁講，但係同時令我同敏敏嚇到面都青埋。
試諗下，成千上萬嘅蟲同時從口、鼻、耳仲有其他我唔想再諗到嘅窿湧入敏敏體內，呢件事真係十級嘔心。
「有咩解救啊師父？」呢一刻既然八仙果師父及時現身，我唯有將希望完全擺喺佢身上。
「我嚟得嘅，當然係嚟打救你哋啦。全套『100%除蟲驅蟲無蟲入手潔淨家居服務』收你 $2888，有冇問題？」八仙果師父嘴角一揚，展露出一個低調但係好有自信嘅笑容。
眼見啲蟲蟲已經殺到埋身，錢銀嘅仲邊可能有問題吖，於是即使我完全感受到自己俾人搶錢，但係我都唯有含淚對八仙果師父大叫一聲：「無～問～題！」
「非常好。種善因，得善果，今日上天派我八仙果師父嚟，就係要打救你哋。幸得你哋回頭是岸，果斷榜水……吖，唔係，果斷放下俗世嘅金錢，換嚟一次重要嘅生命改變，實在係善哉善哉。」八仙果師父雙眼閉合，同時兩手合十咁講。
「師父，唔好咁多嗲啦！小心左邊！」我發現原來啲蟲趁住我哋傾計，有幾條竟然已經靜靜雞爬到上床，所以即刻出聲提醒八仙果師父，希望佢真係唔係神棍呃錢。
就係呢個時候，八仙果師父合實嘅雙眼突然擘開，大到好似戴咗大眼仔con一樣。
然後佢從背後嘅背囊度抽出一個罐頭，我望清楚，原來就係佢下晝hardsell我哋買嘅八仙果。
八仙果師父手執幾粒紫色八仙果彈到床邊，大喝一聲：「螻蛄、蠐螬、金針蟲、地老虎、根蛆！全部都係地下蟲，本是同根生，用紫薯八仙果即可化解！」
幾條蟲尚未接近啲八仙果，竟然立即反肚而死。
「紫薯乃地下長成之根，正好與地下生活嘅毒蟲相生相剋。」八仙果師父一邊解釋，一邊望向右邊上緊嚟嘅一群蟲：「紅姬緣椿象如火，正好有宇治抹茶以寒制熱！」
幾粒綠色八仙果從師父手中急彈而出，一落入紅色蟲堆之中，簡直有如炸彈一樣，直接令一群紅蟲團滅。
「蠍子、隱翅蟲乃毒蟲一類，但我有海鹽在手，鹽天生有消毒作用，見毒化毒。」幾粒白色八仙果從師父手上應聲而出，今次幾隻毒蟲直接化泡而死。
「臭蟲天生奇臭，所以以香剋臭，莞茜又名香菜正好係天生公敵！」淺綠色八仙果從師父手上飛出落喺地下，一堆臭蟲距離三步之外就已經潰不成軍咁散哂。
「蜈蚣為降頭下蠱最常用之蟲，天生毒中帶邪，唔易對付，必需用我親自以香爐煙灰醃製七七四十九日嘅咸蛋黃先可以剋制！」今次有十粒黃色八仙果由師父手中連環飛彈出去，將地下一群蜈蚣包圍。
呢堆蜈蚣幾次想衝出包圍，偏偏完全唔敢掂到任何一粒八仙果。
最後，呢堆蜈蚣突然好似傻咗咁互相殘殺，全部原地死亡。
師父喺床上盤膝而坐，一時念念有詞，一時左右開弓彈出八仙果，原本成地嘅蟲，慢慢竟然愈嚟愈少，又或者已經化為地上屍橫片野嘅一份子。
而我同敏敏就只可以默默咁坐喺師父身邊，好似睇武俠片咁見住師父大顯神通。
而最令我驚訝嘅係，我發現原來師父啲八仙果各個味道真係有效剋制唔同害蟲，而唔係為咗迎合潮流而整到鬼五馬六。
睇住八仙果師父呢一手，我開始相信，佢並唔係一個神棍。
咁即係話，敏敏有救喇。
過咗半個鐘之後，終於再無蟲蟲走入我哋睡房。
而八仙果師父帶住我哋走出睡房，我哋睇到房外場景，完全係嚇到咩都講唔到。
因為，由我哋睡房到屋企門後，竟然有一條長長嘅蟲屍路。
而最特別嘅係，呢條蟲路完全無入到其他房，好明顯咁真係連起咗睡房同屋企大門。
咁樣講，更加印證咗八仙果師父嘅講法，所有蟲，都係衝住敏敏而嚟嘅。
正當我仲想問多啲八仙果師父嘢嘅時候，佢突然用非常嚴厲嘅眼神望實敏敏，用接近呼喝嘅聲音問咗一句：「講！你到底係咪曾經勾三搭四、始亂終棄或者謀財害命？」
敏敏俾八仙果師父呢一聲嚇到挨咗埋我度，好緊張咁搖頭講：「無啊，師父我無啊。」
八仙果師父呢一刻個樣就似一個嚴肅嘅訓導主任，雙眼好似法官咁盯實敏敏咁問：「咁你有冇曾經害到人家破人亡、妻離子散，或者惹到一啲同你有血海深仇嘅仇家？」
俾八仙果師父咁樣迫問，敏敏有啲驚青咁再搖一搖頭。
八仙果師父即使見到敏敏否認，但係眼神繼續凌厲咁望實敏敏，問：「如果無，點解會有人捨得用『血蠱』嚟害你？」
「血蠱？」我重複咗呢個詞語一次。
呢個名，我都係第一次聽。
但係就咁聽落去，都感覺到係一啲唔講得笑嘅嘢。
＝ ＝ ＝
作者IG：windblowssilently