《求婚嗰日，我發現我女朋友鍾意食屎》: 十六

八仙果師父呢一刻嘅氣勢好明顯鎮住咗敏敏，搞到佢粒聲都唔敢出。
就喺大家都無出聲嘅呢一刻，八仙果師父突然好似閃電咁快咁出手，一手扣住咗敏敏左手嘅脈門。
「吖！」敏敏驚叫咗一聲，但係就完全反抗唔切。
我見八仙果師父呢下出手力道唔細，驚佢仲係誤會緊敏敏有做過咩傷天害理嘅事，但其實敏敏為人我又點會唔清楚吖，所以我即刻出聲想為敏敏解釋：「師父，敏敏佢……」
點知我呢句嘢都未講完，奇怪嘅事情又發生喇。
 
敏敏左手上面，突然沿住手腕開始出現咗一條紫線。
呢條紫線慢慢延伸，一直連到上去膊頭位置都未完。
「當你哋今日下晝走嘅時候，我都已經覺得好奇怪，平時我嘅驅蠱大法百試百靈，十五分鐘見效，點解今日會失手嘅呢？最後我唯一諗到嘅係答案就係，你所中嘅蠱並唔係一般嘅蠱。」八仙果一邊講，一邊指住敏敏手臂上嘅紫線繼續講：「從你手上呢條紫線已經可以反映，你所中嘅蠱係眾多種蠱之中最毒嘅一種，名為『血蠱』。『蠱』係一種養蟲之法，而『血蠱』就係要養蟲者以自己嘅血餵養毒蟲。你哋要知，愈毒嘅蟲性質愈寒涼，所以若果用到『血蠱』，即使威力強大，但係其實亦會令自己折壽，名符其實嘅損人不利己。若非深仇大恨，否則都應該唔會施行呢種毒法。」
 


聽咗八仙果師父嘅解釋，我同敏敏先明白點解頭先佢會質問敏敏嗰一堆問題。
「師父，我其實自從五歲開始就會不由自主咁食屎，我估呢種行為，應該就係你所講嘅『蠱』所引起嘅。如果係咁，試問我又點樣做啲咩傷天害理嘅事呢？」
聽到敏敏嘅解釋，八仙果師父嘅表情先稍為放鬆咗啲，同時亦都放開咗敏敏嘅手，講：「我作為一個修道人，若然今日你身中『血蠱』乃是孽障果報，我就一定唔會出手幫你。但既然聽落你似係無辜受害，咁我都可以盡力而為，嘗試為你解開所中嘅蠱咒。」
有咗八仙果師父嘅應承，我同敏敏好似見到到曙光一樣，即刻同師父講咗幾聲多謝。
 
「只不過，你而家身上帶有『血蠱』毒蟲氣息，斷估兩三日內都唔會咁快消除到，所以此地都係不宜久留。咁啦，你哋嚟我屋企暫住幾日，至少都有我保護你哋。」八仙果師父坐言起行，示意我哋跟佢走。
雖然我同敏敏都未有突然要離開屋企嘅準備，但師父又講得啱，如果聽日又嚟一次萬蟲圍攻，我同敏敏應該真係會頂唔住。
所以，都係乖乖地痴住八仙果師父呢個大靠山啦。
臨行之前，我同敏敏望住呢個一地都係蟲屍嘅屋企。
呢一刻，相信我哋心入面都有住同一個希望。


希望，下一次翻到嚟呢間屋嘅時候，問題已經可以得到解決啦。