八仙果師父見我一時未有反應,佢就開始解釋:「首先,我頭先都講咗,今次敏敏所中嘅係『血蠱』,係雲南人不經外傳嘅秘法,所以,要破解『血蠱』,就必須遠赴雲南。但係,雲南識得養蠱用蠱嘅人實在太多,要搵到『血蠱』嘅主人絕對唔易。如果到最後都搵唔到,變相敏敏身上嘅蠱毒亦都消除唔到。所以,你要有嘅第一個心理準備,就係敏敏身上嘅蠱咒永遠都破解唔到,亦都即係話佢永遠都有可能繼續好似而家咁會不由自主咁食屎。」
 
其實,早喺師父佢提及「血蠱」係雲南獨有嘅時候,我已經諗到,好有可能到最後都搵唔出養蠱人係邊個。
只係今次由師父親自講出口,我先更加肯定,敏敏呢個怪病,可能真係會一世都醫唔好。
 
當我仲消化緊呢個消息嘅時候,師父就已經開始繼續講落去:「而你要有嘅第二個心理準備,就係『血蠱』有機會禍延五代。『血蠱』本身就係一種毒性極強嘅生物,即使一旦養蠱人死咗,但只要『血蠱』未除,佢依然可以繼續自我分裂到後代身上。到時候,『血蠱』威力會因為養蠱人死去而大大減弱,但依然會時不時發作。所以,假設敏敏身上蠱毒係由佢父母開始傳落,佢而家就係第二代。咁講,你哋至少有三代嘅後代,都有機會續承呢個食屎嘅魔咒。」
 
對於上一個消息,我都仲可以話本身都有少少心理準備。
但係聽埋八仙果師父呢段說話之後,我個心,完完全全咁沉咗落去無底深淵。
一直以來,我同敏敏都係好鍾意小朋友嘅,而大家都有期望盡早結婚嘅其中一個原因,就係希望可以生多一兩個。


只不過,如果而家明知生出嚟嘅小朋友係會食屎,而佢一生都要蒙受呢個陰影,咁到底,我同敏敏仲生唔生好呢?
如果唔生,我係咪又可以接受得到呢?
 
「點解呢啲咁重要嘅事,你唔叫埋敏敏嚟聽?」我有氣無力咁問咗一句。
「『血蠱』藏身喺人嘅體內,如果中蠱者長期心情低落、憂慮,就會變相令蠱蟲有更多機會搶奪中蠱者身體內嘅營養同精力。為免敏敏聽到呢兩個消息會心情受影響,所以我今次只係叫咗你出嚟。你要記得盡可能保守秘密,唔好俾敏敏知住。」八仙果師父講到呢度,都忍唔住嘆咗一口氣,「我都明,作為佢另一半,呢件事係好難接受,只不過,佢而家最需要嘅係你嘅支持,所以,你都要加油。」
「嗯,多謝師父,我會努力。」我無奈咁點一點頭。
 
「阿博。」八仙果師父喺呢個時候叫一叫我。
我抬起頭望住佢。
「當你選擇同敏敏一齊嘅嗰一刻,你有冇諗過要去承擔起佢生命嘅一切?」八仙果師父講出呢一句說話嘅時候,展現出一個我今日第一次見,極為認真嘅表情。


而佢嘅呢一個問題,亦將我問得啞口無言。
「傻啦,我知,邊個一開始拍拖會諗埋呢啲嘢呢?拍拖嘅嘢,開開心心又一日,唔開心最多咪分手,洗乜諗到咁長遠?只不過,如果你哋真係打算要結婚,咁你就要做好心理準備,你唔單止係要同呢個人過人世,你要做嘅,係將對方嘅生命都放埋喺自己膊頭上面。」八仙果師父呢一番苦口婆心嘅說話,令我喺聽完兩個咁震撼嘅消息之後,心神稍為安定咗啲。
 
「既然你似乎明白咗,咁我準備同你講第三件事喇。」八仙果師父講完呢句說話之後,又停咗一停,沉重嘅表情令我好擔心佢嚟講嘅嘢會唔會比前兩件事更難接受呢。
已有 0 人追稿