《求婚嗰日，我發現我女朋友鍾意食屎》: 十九

「『蠱』，當今世上就只有雲南人識得使用，亦可以算係佢哋族人最不可外傳嘅秘密。所以，要破解敏敏身上『血蠱』，第一步係要先搵出到底呢道『血蠱』嘅源頭係邊，繼而搵到背後養蠱之人，咁先有可能可以殺死蠱蟲，救到敏敏。」八仙果師父講出今晚嘅總結。
而我同敏敏都明白，即係跟住落嚟，我哋就要著手調查下佢父母。
 
「咁啦，敏敏你跟我嚟，我俾定啲八仙果你傍身，再加多條我親手開光過嘅『八仙果手鏈』，以免你再受萬蟲包圍之害，全個『蟲此無憂』服務總共收你$1888。」
八仙果師父一邊講，已經一邊帶走咗敏敏，好似驚死我會阻止敏敏俾佢Harsell一樣。
 
於是乎，房入面就淨翻低我同高醫生。
兩個男人粒聲唔出，成件事其實有啲老尷，於是，我唯有做主動講嘢嗰個：「係呢，你係真心唔信八仙果師父啲嘢㗎？」
「占卜星相、命理風水，全部都無科學根據，亦經唔起實驗考證，當然唔信。」高醫生嘴唇微微郁動咁答我。
「你做咩都講科學，但係師父佢做嘅全部都係迷信嘢，你兩個咁唔同，點解當初可以喺埋一齊嘅呢？」我問咗一個自從見到佢兩個開始就有嘅問題。


「因為，我相信佢同我所做嘅嘢，都係幫緊人。」高醫生講到呢一句嘅時候，一直平到好似水平線咁嘅眼眉竟然有少少下彎，我相信對佢嚟講，呢個係一個笑容嚟。
 
「世上有好多嘢都解釋唔到，我唔信，唔代表唔存在。作為一個相信科學嘅人，我相信眼見為憑，我相信證據。阿果佢同我一齊咁多年嚟，成日都會同我一齊去啲公屋探下老人家，我有我做義診，佢有佢做免費問卜。無嘅，結婚，又唔等於要學哂對方嘅一切。即使結咗婚，我哋依然可以係兩個唔同嘅個體，只不過同時亦都係兩個目標一致、喺平行線上互相扶持並行嘅個體啫。所以話，即使兩個人睇落再登對，都唔代表佢哋夾。愛，始終都係要有行動，係要做出嚟嘅。」
高醫生講起佢同八仙果師父嘅事，即使笑容並唔明顯，但係從眉宇之間，我都可以感受到佢由心而發嘅開心。
而作為一個考慮想同敏敏結婚嘅人，聽完佢呢一番說話之後，我就忍唔住默默喺度諗，既然我覺得自己咁愛敏敏，我又做咗啲咩去實踐呢份愛呢？
 
「嘩，乜你兩個都有計傾啊？」呢個時候八仙果師父同敏敏翻到入房，敏敏手上拎咗個紅白藍袋，入面放咗廿幾罐八仙果，唔講真係以為我哋準備帶住八仙果著草。
「Honey你帶敏敏去佢哋房執下嘢先，我有啲嘢想同阿博講聲。」師父交代咗一聲，敏敏就跟住高醫生走咗。
 
而我，就跟住師父走，一直行到去四樓天台，似乎係刻意令我哋遠離敏敏。


「咩事啊師父？咁鬼神秘嘅？」對於師父呢個行動，我不禁有啲好奇。
「關於敏敏中蠱嘅事，有三樣嘢你需要做好心理準備。」八仙果師父相當認真咁望實我，慢慢講出咗呢句令我俾唔到反應嘅說話。

= = =
作者IG：Ｗindblowssilently
如果想加速追故，連登講故台及Penana正領先連載中!