《求婚嗰日，我發現我女朋友鍾意食屎》: 二十七

「彩萍嘅聯絡方法？無喇，自從我同佢斷絕來往之後，就完全無再見過佢喇。始終，我都有負於佢，仲邊好意思搵佢吖。想當年，佢其實對我好認真，從佢嘅眼神，我睇得出佢真係想將終身幸福都托付俾我，只不過，唉，一日都係我……」世伯非常無奈咁嘆咗一口氣，睇得出呢件不堪嘅往事依然令佢十分介懷。
「咁仲有冇其他關於佢嘅資料？多少少都好吖？」我嘗試問多啲資料，否則要喺全中國，或者淨係香港同雲南要搵一個叫「向彩萍」嘅女仔，我諗可能仲難過中六合彩。
「嗯……我記得，佢當年個樣係白白淨、鼻細嘴細，單眼皮嘅，身型瘦瘦削削咁，比較特別呢，好似喺佢右眼角邊有一粒痣。」世伯側哂頭咁諗，睇嚟咁多年前嘅人樣確實係唔易記得清楚嘅。
雖然，而家得咁少資料其實都同大海撈針無咩分別，但係至少都好過毫無資料咁去搵人嘅。
 
「好啦，故事就講完喇，阿博，我欣賞你知道敏敏有呢個怪病都依然無厭棄佢，敏敏果然無揀錯人啊！」世伯笑住拍一拍我膊頭。
「世伯，我一定會盡力幫你同敏敏解開蠱毒㗎。」我眼神堅定咁講。
「得喇，我就無咩所謂囉，你盡力幫敏敏啦。」世伯一副看透世事嘅表情，慢慢企起身伸咗個懶腰，然後講：「好啦，今晚都夜啦，我去沖個涼先，你哋慢慢傾。」
世伯一邊講，一邊就離開咗客廳，剩低我、敏敏同伯母。
 


「媽咪，你真係好偉大。」敏敏趁世伯走咗，即刻走咗埋去佢媽咪身邊攬一攬住佢。
或者因為阿媽都係女人，兩個女人，總係特別明白大家嘅辛酸。
 
「無咩偉唔偉大嘅，其實我嗰時都係搏下，搏下呢個男人係咪值得我投資多一次。我覺得，婚姻其實本來就似一次長線投資，佢跌到谷底，你可以選擇放手沽空，又可以信佢會回升繼續長揸。有人覺得呢場係一埸賭博，但係，我覺得其實正如投資一樣，只要你夠了解間公司，你就會知道到底佢真係唔再值得長線持有，定抑或今次下跌只係一時技術性調整，值得信任佢會升翻。
 
嗰時我之所以信你老豆，其實真係全靠佢瞓身過嚟救我嗰下㗎咋。咁當然，之後佢同我講翻佢出軌嘅心路歷程，至少都令我可以對翻佢有信心，同埋同佢一齊慢慢建立翻呢段關係。其實你老豆頭先俾面我所以無講啫，喺佢出軌呢件事之前，每次我老豆話佢無出息嘅時候，我都會講笑住咁幫我老豆口笑下佢。我本來係想懶係打完場搞下笑，但係原來對你老豆嚟講，好多我嘅說話都俾咗落井下石嘅感覺佢。所以呢，有啲嘢，唔講清楚，其實大家真係可以一直都誤會落去，直到一日大家玩完都唔知咩事。」
 
伯母講到呢度，伸出隻手一邊拉起敏敏，另一邊就拉住我隻手疊埋一齊，然後講：「雖然我唔知你哋打算結婚未，但係記得，婚姻，係你兩個將自己嘅人生投資落對方人生嘅重大決定，所以，一定要對自己投資啲咩知道得一清二楚。有咩唔明就問到明，咁先可以幸福到老㗎。要放棄一段感情好容易，但係要堅持一段感情真係要花一世功夫㗎。」
我同敏敏互望一眼，心有靈犀咁點一下頭，然後對望一笑。
呢一個心照不宣嘅笑容，代表咗我哋都對自己將要投資嘅人好有信心。


 
從世伯伯母屋企離開之後，我同敏敏第一時間趕翻去八仙果師父屋企匯報成果。
「你外父所講嗰枝紅色短笛叫做『赤木笛』，係由雲南苗人聚居嘅地方先有嘅木材所造嘅。所以，我無講錯，成件事，睇嚟都同雲南脫離唔到關係。」八仙果師父胸有成竹咁講。
「但係人海茫茫，我哋又點搵到呢個『向彩萍』出嚟呢？我已經問過我阿爸，但係佢話無見咁耐，其實真係咩都唔知。而且當年佢哋見面嘅夜總會已經執咗，變相就無哂下落。」敏敏有啲擔心。
「雖然我就唔信埋哂啲咩用枝笛就可以指揮昆蟲呢啲咁旁門左道嘅嘢，只不過，我都可以幫手叫醫院電腦部嘅人幫手查下有冇咩病人係呢個名嘅。」高醫生喺側邊插嘴講。
 
就喺呢個時候，我舉高咗手。
「我諗，今次唔洗高醫生你出手喇。」
「阿博你搵到『向彩萍』喇？」敏敏好驚訝咁問。
我舉起手中嘅手機，俾佢哋見到一個年約四五十嘅中年女人，白白淨、鼻細嘴細，單眼皮、身型雖然就已經唔多瘦削，但係右眼角邊真係有一粒痣。


「嘩！應該就係佢喇！你點搵佢出嚟㗎？」敏敏指實我部手機，笑住咁問。
「其實我都係就咁Google search『向彩萍 雲南』，結果好快就出現呢張相。」我攤一攤手，表示過程真係一啲都唔難。
 
「咁我哋而家可以點樣搵到佢啊？」敏敏又追問一句。
「輕鬆啦，你望下佢張相隔離！」
我將張相拉過少少，敏敏同八仙果師父一齊望埋去。
 
「向彩萍 店舖經理 譚仔雲南米線旺角店」。
 
八仙果師父見到之後，氣定神閒咁笑咗一下講：「我都話，成件事同雲南脫離唔到關係㗎啦。」