《求婚嗰日，我發現我女朋友鍾意食屎》: 二十八

「兩位係咪？『錢蛋一蛋』。（譚仔話自動翻譯：請等一等。）」
 
就喺發現向彩萍原來係譚仔旺角店嘅經理之後，我同敏敏第二日放工之後，就約埋去嗰間舖頭睇下會唔會搵到佢。
「你望下。」
當我同敏敏入座嘅時候，敏敏指一指收銀機旁邊嘅一塊牌。
牌上面寫咗舖頭唔同嘅職員名，但係奇怪嘅係，上面並無「向彩萍」呢個名。
咁睇嚟，要查出向彩萍呢個人，要由其他譚仔姐姐落手。
 
「先生『稍』姐，想食啲咩？」有一個譚仔姐姐走埋嚟問我哋。
「我要一個魚腐豆卜三小，凍檸茶；另外一碗要炸醬魚蛋十小，加多個細土匪。」


「巧，覆你一次單，一個『移腐豆卜山小，凍鏈茶；一個炸醬移蛋實小，渣多個四吐匪。』」
「係啊，嘩你落單真係好準確喎。」我把握時機讚下姐姐。
「『煙街』嘅。」姐姐開心一笑，睇得出佢內心係沾沾自喜嘅。
 
當姐姐轉身走咗之後，敏敏就斜睥住我，奸笑咁問：「做咩咁好口啊？連姐姐都想溝？」
「呢個姐姐睇落年紀唔輕，應該同向彩萍差唔多，所以我就打算以佢做目標啫。為咗要幫你解蠱，我唯有獻出我嘅肉體嚟使出美男計，希望可以問到啲料啦。」我一副大義凜然嘅樣，氹得敏敏忍唔住一笑。
 
過咗一陣，同一位姐姐推住車仔過嚟，準備幫我哋上菜。
「等我幫你吖。」我睇準機會，伸手去幫姐姐捧麵，同一時刻，輕輕用我嘅指尖掂到姐姐嘅指尖。
根據關係心理學所講，如果兩個異性喺見面嘅時候出現些微嘅身體觸碰，係有助兩個人增加對對方嘅好感。


果然，當我同姐姐指尖接觸，我從姐姐嘅微表情之中見到佢嘅春心盪漾咗一下。
呢個，係一個好開始。
 
「係呢，我想問你哋呢度有冇得寫低顧客意見㗎？」當姐姐上完菜準備走嘅時候，我出其不意咁問咗一句。
「有啊？唔知你想寫咩呢？」姐姐一聽到「顧客意見」，表情即刻有啲緊張。
「哦……我覺得姐姐你服務態度好好，好少食譚仔會令我有一種賓至如歸嘅感覺，想寫翻啲讚下你嘅嘢啫。」
我講完，姐姐已經掩住嘴喺度笑，睇得出佢已經滿足喺我同佢嘅對話入面。
 
「有啊，你可以跟『禾』嚟。」姐姐笑住帶我去到櫃台嗰邊，攞咗張顧客回應表俾我。
趁而家店面唔算勁忙，而側邊亦無咩人，我相信係時候要套下料喇。


「係呢，我記得上次嚟嘅時候呢，有另一個姐姐都好似你咁有禮貌㗎，今次唔見佢嘅？」
「佢叫咩名啊？睇下『禾』答唔答到你？」姐姐好奇咁問。
「嗯……我記得佢個名牌上面，好似係寫住『彩萍』。」我扮哂唔記得咁講。
「嘩，咁你都幾耐『茅』嚟喎，萍姐無做五年喇！」姐姐有啲驚訝咁望住我。
「哦……係啊，我好少嚟旺角㗎，咁點解上網嗰度仲寫住佢係分店經理嘅？」我唔死心咁再追問一句。
「上網？我哋個網好日都唔更新一次㗎喎！」姐姐理所當然咁講。
「咁你知唔知佢去咗邊呢？」聽到向彩萍並唔喺度，我唯有掩飾內心嘅失望，嘗試再問下佢嘅下落。
「嘩，『禾』同佢都唔係幾熟，真係唔知喎，不過呢，呢度有幾個姐姐之前都同萍姐幾熟，可能佢哋都知嘅。係呢，你做咩好似咁關心萍姐嘅？」姐姐似乎發現我啲問題有啲唔對路。
「哦，我份人八掛啫。吖，我寫好啦，唔該你。」為免露出馬腳，我即刻轉個話題，走為上著。