《求婚嗰日，我發現我女朋友鍾意食屎》: 三十

「我連『譚仔話』係咩我都唔知喎，點教你哋喎？」八仙果師父難得咁一臉糊塗，望住向佢好認真咁鞠躬求助嘅我同敏敏。
「傻啦師父，你本身講緊嘅咪已經係『譚仔話』囉！」我非常誠懇咁講。
「但係我又可以點教你哋呢？我呢啲係鄉音嚟㗎嘛。」八仙果師父搲哂頭，睇嚟佢都唔知點好，不過諗咗一陣之後，佢似乎諗到啲嘢：「不過呢，我好似有啲同鄉真係喺譚仔度做緊，等我問下佢哋之後，話唔定可以幫到你哋嘅。」
聽到八仙果師父呢句，我同敏敏都非常開心，即刻多謝師父幫手。
 
起初，我嘅心意只係諗住多啲跟住師父聽下佢講鄉音，等自己耳濡目染之下都講到「譚仔話」。
無諗到，八仙果師父對於呢件事極度上心，導致兩日之後，非常意料之外嘅結果出現咗。
 
兩日後，八仙果師父間房。
「嘭」一聲，我同敏敏面前各自放咗一大疊紙。


紙上面，大大隻寫住咗「譚仔入職面試必勝攻略」。
「嘩，家下考公開試啊？」我諗住講笑，點知八仙果用一個凌厲嘅眼神要我收聲。
「你兩個以為入譚仔做好容易？而家譚仔係唔少新移民、師奶、甚至學生嘅兼職勝地，大把人都爭住入去做，分分鐘難入過HKU。話你哋知，我從朋友口中得知，原來私底下唔少人為咗入到譚仔，都會認真去補習『譚仔話』，仲有人承機開咗『譚仔文化協會』去幫啲想搵工嘅人讀速成班。今次你哋眼前呢份notes，全靠我人面廣先可以免費攞到翻嚟。上天有好生之德，錢我就唔收你哋喇，不過唔該你哋認真讀好書，到時一定要考入『譚仔』，盡快解除蠱毒，算係還我一個心願。」八仙果師父相當認真咁講。
「嘩，乜原來入『譚仔』都咁複雜㗎……」敏敏已經開始揭緊份「入職攻略」，呢疊嘢睇落仲厚過本字典，我睇到都已經有啲想放棄。
 
「無錯，因為太多人想入去『譚仔』做，所以入職面試而家分為四份卷，只有成續考得出色，先有機會可以入職。
第一份卷係『閱讀』，考你極速睇餐牌、計食物價錢，如果你可以背得哂，當然係最好；
第二份卷係『寫作』，亦係四份卷之中最簡單一份，考你寫一篇文『為什麼譚仔比三哥好』，只要你寫定一篇到時直接背翻出嚟，問題都應該唔大；
第三份卷係『聆聽』，主要係由考官落單，你要完整寫低對方落單講咗啲咩，呢份卷難度就要睇考官講嘢到底有幾多鄉音；
第四份卷係『說話』，相反考翻你到底有幾熟『譚仔話』，始終人客食『譚仔』，有五成都係為咗聽親切嘅『譚仔話』（我內心反問一句，真心咩？），所以作為員工，識得流利嘅『譚仔話』係基本嘅。」


 
由呢一日開始，八仙果師父由一個濟世為懷嘅得道大師，變成咗一位專業嘅補習名師。
而我同敏敏除咗日常翻工嘅時間之外，就開始咗好似重回中學補習嘅日子咁，時時刻刻都喺度上「譚仔補習Intensive雞精班」，背熟「譚話國際音標」同埋狂背「譚仔常用會話五百句」，為嘅就係想盡快可以練成一口流利嘅「譚仔話」，然後入「譚仔」打工，希望可以套出向彩萍嘅下落。
 
「望實第一行跟我講一次，『移腐移蛋抹移演。』」八仙果師父指住餐單叫我讀。
「魚腐魚蛋墨魚丸。」我照住咁讀，然後被八仙果師父狠狠咁用佢嘅塵拂一下打落嚟我塊面度。
「拂you！你讀得咁正就唔洗入『譚仔』做啦！無啲天份！敏敏一次過讀哂成首『譚仔』急口令俾佢聽！」八仙果師父俾個眼神敏敏。
「『移腐移蛋抹移演、炸讚懶肉渣皮蛋、煎椒Pi蛋找搞芽、渣悲稍田凍鏈茶。』」敏敏喺毫不猶豫嘅情況之下，竟然可以一口氣用「譚仔話」字正腔圓咁講完哂成個急口令，有一刻簡直令我懷疑敏敏其實一直以嚟都瞞住我喺譚仔秘撈。
 
「嗱，呢啲就學到嘢啦，好彩譚仔通常都係請女人啫。」八仙果師父用加許嘅眼神望一望敏敏，拖住佢出房繼續練習。


而我，就好似一個失敗者咁俾人留低咗喺房度。
「唔好灰心，根據我嘅研究，有70%女性嘅舌頭天生係比男性更適合講『譚仔話』呢種語言嘅。嗱，我呢邊仲有一份超過二百七十二頁嘅研究報告，你睇完就會明白多啲……」呢個時候，高醫生唔知係邊度閃咗去我身邊。
「我……都係去練習下『譚仔話』算啦。」比起「譚仔話」，似乎高醫生嘅研究先係最唔適合我。


= = =
作者IG：Ｗindblowssilently
如果想加速追故，連登講故台及Penana正領先連載中!