當我翻到去敏敏身邊嘅時候,我同佢講翻原來向彩萍已經唔喺度做。
「吓,咁點算啊?」敏敏聽到難得嘅線索竟然斷咗喺度,不免有啲失望。
「唔緊要嘅,我聽頭先個姐姐講,呢間舖仲有幾個認識向彩萍嘅人,我哋可以再問下。」我安慰敏敏。
「但係,不斷咁嚟問嘢,會唔會好奇怪啊?」敏敏有啲擔心咁問。
敏敏咁講確實有道理,我頭先只係問兩句,已經俾姐姐發現我有啲可疑,如果日日都嚟問,一定會俾人懷疑。
就係咁,我同敏敏暫時都未諗到辦法,唯有專心食埋碗米線,之後再從長計議。
 
食完米線之後,我同敏敏一齊離開譚仔,而俾我讚咗一輪嗰個姐姐仲專登嚟送我哋出去。
「下次再嚟幫襯啦,送定幾張Coupon俾你,下次嚟免費『渣』個皮蛋俾你!」姐姐塞咗幾張紙俾我,服務態度有如五星級酒店咁好,睇得出佢寂寞嘅心已經因為我呢個小鮮肉而泛起漣漪。
我笑住同佢講多謝,再俾佢一邊塞紙一邊抽咗我隻手幾下水之後,終於成功全身而退。


 
「雖然今次問唔到啲咩,但係你俾人抽下水就搵到coupon,都幾抵喎。」敏敏笑住喺度睇啲優惠券。
「傻㗎你?你點可以為咗幾張優惠券而出賣你男朋友㗎?」我楚楚可憐咁講。
「又係你自己話要用美男計嘅!唔該,下次幫我用美男計換碗過橋米線翻嚟啦!呢啲coupon唔夠食喎!」敏敏一邊講笑,一邊張啲優惠券隊埋我塊面度表示唔足夠。
 
就係呢個時候,我留意到一啲嘢。
「咪住!」我伸出手,捉住咗其中一張紙。
「做咩啊你?」敏敏好奇咁望下我到底捉住咗啲咩。
「我諗,我有辦法可以繼續打聽向彩萍嘅下落喇。」我笑住咁望住手上呢一張紙,證明今次嘅美男計並無白廢。
 


呢張被夾雜喺coupon之中嘅紙,上面寫住兩個好醒目嘅大字:「招聘。」
 
「你想入譚仔做?」敏敏好驚訝咁望住我。
「唔係我,係你。你幾時見過譚仔有男人㗎?」我反問一句。
「譚仔三哥咪男人囉!」敏敏今日轉數非常之快,呢句我駁唔到。
「係啫,但係都係女人入去做好啲嘅。正所謂『不入虎穴,焉得虎子』,只要你入去做,同啲姐姐成為朋友再得閒套下料,應該遲早就可以問出向彩萍嘅下落㗎啦!」我充滿信心咁講。
「講就咁講啫,但係你望下人哋招聘要求先啦,佢寫明要『精通譚仔話』同埋『雲南人優先』,我哋邊有可能入到職啊?」敏敏無奈咁嘆氣。
「哈哈哈哈,」我大笑幾聲,「唔洗擔心,『譚仔話』啫,有人教我哋咪得囉!」
「邊個啊?」敏敏呆咗一呆。
「喺我哋身邊,仲有邊個識講『譚仔話』吖?」我冷靜咁笑,心目中已經浮現咗一個最佳嘅『譚仔話』補習名師人選。
已有 0 人追稿