《求婚嗰日，我發現我女朋友鍾意食屎》: 三十二

「吓？」
遲咗一秒，敏敏先勉強俾到反應。
畢竟，對方嘅呢句說話實在來得太過意外。
 
「雖然你好認識『譚仔話』，亦都好熟悉我哋嘅湯底，但係，如果你有留意我哋嘅招聘廣告，我哋其中一個條件，係需要請一個『雲南人』。」娟姐氣定神閒咁解釋。
「我好明顯就係雲南人啦，你聽我嘅口音都知㗎！」敏敏好明顯仲想力挽狂瀾咁為自己解釋。
「無錯，你嘅口音的確係有幾分相似，差啲連我都呃到。只不過，我已經好肯定你唔係雲南人喇，所以多謝你今日嚟見工，不過請回啦，我哋仲有下一位面試嘅人啊。」娟姐唔再俾機會敏敏解釋，果斷咁落咗逐客令。
 
而我聽到娟姐嘅說話，馬上留意到店舖入面而家除咗我之外，就只有坐喺我對面嘅一位中年嬸嬸。
呢位嬸嬸喺度填緊個人資料表格，而我斜眼望到，佢喺祖籍上寫咗「雲南」。


呢位嬸嬸，似乎係名正言順嘅雲南人。
如果係咁嘅話，呢個嬸嬸好有機會會俾人請到，換言之我同敏敏想靠住入職嚟換取情報嘅大計就會泡湯。
 
唔得，一定唔可以俾呢個嬸嬸入到職。
咁即係話，唯今之計，就係要快過呢個嬸嬸搶到入職機會。
但係先唔好講點樣搶，到底頭先點解敏敏臨門一腳會俾娟姐發現佢唔係雲南人嘅呢？
嗱，以佢面試表現嚟睇，一定唔關佢答錯問題事。
所以，最有可疑嘅，一定係佢最後飲嘅三碗湯。
唔通，呢三碗湯入面另有乾坤？
 


呢個時候，敏敏已經一臉失望咁離開咗張枱。
而我對面嘅嬸嬸，亦都準備好走過去接受面試。
如果我再唔做啲嘢，局面將會有如覆水難收。
既然而家都係背水一戰，陳超博，學個名話齋，搏一搏啦！
 
我喺對面位嬸嬸準備行過去張枱之前，一個箭步搶咗喺佢前面，坐咗喺敏敏頭先坐低嘅位置。
當娟姐仲未反應得切嘅時候，我一手就拎起咗頭先敏敏飲過湯嘅第一隻空碗，即使入面咩湯都無哂，但係我都用力聞咗一下。
呢一聞，竟然真係令我發現咗啲嘢。
 
果然，我無估錯。


原來，碗湯入面真係大有文章。
 
「先生你……？」娟姐好疑惑咁望住我，睇嚟未明我到底做緊啲咩。
「呢『玩』湯同平時『呢』哋嘅湯『Dee』唔同，係香柳，『呢』哋『渣』咗我哋『渣』鄉嘅香柳。」我大腦一邊運轉住咁將我嘅說話變做只有半桶水嘅「譚仔話」，一邊講出我喺湯底嘅發現。
話說，就喺我頭先聞咗隻空碗一下嘅時候，我憑住五星級大廚對食物嘅觸覺同嗅覺，我一下就已經發現碗入面殘留住平時「譚仔」湯底無嘅香味。
然後，憑住我五星級大廚對食物嘅認知，我馬上就認出咗呢種香味，係嚟自一種叫「香柳」嘅食材，而呢種食材正好係雲南人多用嘅香料，所以令我對自己嘅發現更加有信心。
 
「你……竟然聞得出？」娟姐個樣有啲驚訝，又有啲欣賞咁望住我。
「當然，『渣』鄉嘅『惠』道，『禾』『依』定『智』得。」我開始講「譚仔話」講到自己都唔知自己講咩，為免露出破綻，我馬上聞第二隻碗。
「哦……今次『渣』咗香格里拉松茸，可惜『我』有得聞，無得飲，如果唔係個湯底一定好香甜。」我笑住聞完第二隻碗，而娟姐亦都笑住點頭，用眼神示意我試下聞埋第三隻碗。
我充滿信心咁聞，點知，今次隻碗入面竟然只係得一般嘅「譚仔」湯味？
 
「今次聞唔到喇？」娟姐語帶譏諷咁問我。
我唔服氣咁望住娟姐，索性唔回答佢。
我唔相信，我作為一個五星級大廚，竟然會試唔出譚仔湯底有啲咩特別。


我望住呢隻空碗，入面殘留住嘅，就只有第三碗辣湯殘留嘅紅色。
我望住呢啲紅色嘅時候，我留意到一啲異樣。
當我非常專注喺呢啲喺碗上嘅紅色，我諗，我可以估到呢碗湯有咩特別之處喇。