《求婚嗰日，我發現我女朋友鍾意食屎》: 三十三

「呢一碗，係加咗『鵝油』嘅湯。」我放低咗隻碗，胸有成竹咁望住娟姐。
「何以見得？」娟姐臉上睇唔出任何表情，平淡咁反問咗我一句。
「雲南正宗嘅『過橋米線』源自一個故事。有一個妻子為老公送上米線作午餐，誰不知路途遙遠，往往未過橋，米線就已經變凍。所以，妻子為咗幫米線保持溫度，就以鵝油澆於米線湯之上，令米線可以保持熱溫。所以，傳統嘅過橋米線，就會有少量鵝油蓋面。頭先亦都因為咁，鵝油喺湯嘅表面而唔係混入湯中，所以當湯俾人飲哂之後，根本就唔會留低味道，所以先令我估唔到。」我一邊講，一邊慶幸自己當年學廚嘅時候曾經修讀過「中國美食史」，如果唔係呢一刻仲點可以大拋書包。
 
「既然你話無留低味道，你又係點知道碗湯有鵝油呢？」娟姐嘴角上揚，一臉好奇咁問。
「好簡單，油跡浮面，亦最容易喺餐具上留低痕跡。頭先嗰位小姐飲湯只會用碗嘅其中一邊飲，所以另一邊自然有少量油跡殘留，跟住透過觀察同埋認真聞多兩下，要發現鵝油其實唔難。」我睇到娟姐嘅反應，已經知道自己嘅答案全中。
 
「犀利犀利，你竟然可以單憑觀察同嗅覺就知道唔同湯底嘅分別，果然厲害。作為一個雲南人，一定可以一試就知道湯底嘅唔同，所以頭先位小姐即使扮得再似，亦唔會講得出。」娟姐一邊讚我，一邊仲忍唔住拍手。
「娟姐，實不相瞞，其實呢，我都係想嚟見工嘅。話哂我咁熟悉雲南食物，一睇就知我係雲南人啦，不如你請我吖。」我見時機成熟，即刻大膽向娟姐提出要求。
「你的確係好熟悉雲南食物，不過，一聽你嘅口音，似菲傭姐姐多過似譚仔姐姐，你好明顯就唔係雲南人啦。」娟姐睿智咁搖頭。


估唔到，我辛辛苦苦先連過三關估中湯底，到頭來竟然係衰喺『譚仔話』手上。
 
「只不過，雖然你唔係雲南人，不過恭喜你，你已經成功被招聘喇。」娟姐一下就坐咗去我身邊，伸出手同仲未反應得切嘅我握手。
「吓？」對於娟姐再一次為我帶來驚喜，我同樣係反應唔切。
「乜你無睇張招聘傳單咩？上面明明喺『雲南人優先』後面寫咗多一句，『男人應徵，立即聘用』㗎！你知啦，我哋舖頭不嬲就女多男少，但係其實搬搬抬抬好需要男人㗎嘛，所以基本上只要你係男人，我哋都會請。」娟姐隨手拎咗個放大鏡嚟，然後放喺張招聘傳單上面，果然係有一句「男人應徵，立即聘用」，但係字體，分分鐘細過隻蟻。
娟姐見我對呢個字體非常不解，就有啲唔好意思咁笑住解答：「你知啦，呢句嘢如果大大隻字寫出嚟，又會俾人話咩『性別歧視』㗎喇，所以唯有寫細啲囉。」
 
「咁即係話……我而家就可以翻工？」我仲係有啲不可相信咁問。
「係啊，你就算唔係雲南人都咁熟悉雲南食物，呢樣就已經值得請啦。」娟姐讚我嘅時候，突然仲伸出兩隻手，一隻放咗喺我手臂，另一隻放喺我個肚腩，笑吟吟咁講：「而且，你又有『雞肉』，又有『懶肉』，仲係一塊小鮮肉，最啱就係喺我哋呢間咁多姨姨嘅分店做㗎喇！」



我一邊俾娟姐好滿足咁捽住我隻手瓜，一邊開始明白，原來只要我係男人，我就可以俾人請到。
咁到底，呢一個月嚟，我同敏敏咁努力學「譚仔話」嚟做咩。
到頭來，其實一切都可以「遇阿姨我不想努力了」嚟解決。

Anyways，至少，我都順順利利咁正式成為咗「譚仔」嘅員工。
喺翻工嘅第一日，娟姐帶咗我去員工室同我講：「嗱，呢度就係平時我哋放低嘢嘅地方，每個員工都有自己嘅Locker，雖然Locker周圍都係，但係你最好都係揀定一個然後貼個名牌上去啦，方便自己吖嘛。」
於是，我就求其揀咗一個儲物櫃，打算將自己啲嘢放哂入去。
就係呢個時候，我留意到，喺我嘅儲物櫃隔離嗰格，原來都寫咗一個名。

呢個名，就係「向彩萍」。