《求婚嗰日，我發現我女朋友鍾意食屎》: 三十四
為咗喺「譚仔」打工同尋找證據，我刻意同酒店請咗一個月假。
換言之，如果一個月內搵唔到線索，今次辛辛苦苦殺入「譚仔」嘅計劃就等於白費。
所以，我第一日翻工就已經搵到「向彩萍」嘅Locker，呢個都算係一個好開始。
如果按照之前嗰個「譚仔姐姐」所講，向彩萍已經離職五年，咁今時今日佢個Locker依然留咗喺度呢件事似乎就有點奇怪。
我曾經考慮過用強行爆格嘅方式去打開向彩萍嘅Locker，但係我一見員工室入面有閉路電視，馬上就放棄咗呢個念頭。
雖然係咁，但係我都係決定用Locker呢個位作為入手點去調查向彩萍。
「Locker？係啊，個個都有㗎！呢處好好人，就算你離咗職，啲嘢都唔會清走，你記得之後嚟攞翻就得！」
答我嘅人叫做翠姐，係呢間譚仔嘅副經理。
佢為人非常友善，而且超級健談，我今日第一日翻工咩都無話佢知，佢已經差唔多將成本族譜數哂俾我聽咁濟。
從佢口中得知，佢今年五十三歲、屋企有兩個囡一隻狗、老公做地盤（背脊有粒墨喺尾龍骨底）、屋企住秀茂坪、最近街市啲菜心唔係好靚……仲有重點，佢已經喺呢間「譚仔」做咗五年。
我即刻諗到，或者，佢會對向彩萍有啲印象。
所以，我決定努力mark實呢位翠姐，憑佢把口疏到咁，話唔定可以從佢口中問出啲咩新線索。
「講起Locker呢，我見我隔離個Locker寫住『向彩萍』，但係我又唔見有呢個姐姐喎，佢係咪都係離咗職㗎啦？」我明知故問。
「哦……萍姐吓話，我Good friend嚟㗎。佢好勁㗎，對啲員工又好，當哂我哋係佢姊妹咁㗎，過時過節都會送嘢俾我哋。你知啦，嚟到呢間舖做，好多都係雲南嘅姊妹，有個好似萍姐咁嘅人照顧下真係好鬼溫馨㗎！」翠姐一提起向彩萍，完全係讚不絕口。
「既然佢咁好，點解又唔喺度做落去啊？」我一邊抹枱，一邊問。
「佢當年走得好急㗎，聽講係呢……」
當翠姐正準備繼續講落去嘅時候，娟姐突然就喺佢身邊出現，木無表情咁講咗一聲：「專心做嘢。」
翠姐一聽到娟姐嘅指揮，即刻唔敢再出聲，默默咁走去隔離枱執嘢。
而娟姐就用有啲懷疑嘅眼神望實我，我即刻心虛咁低頭執枱。
而我內心，喺呢一刻睇住娟姐嘅反應同眼神，唔知點解，我硬係覺得娟姐有啲奇怪。
就係咁，我喺「譚仔」工作咗一星期嘅生活轉眼就過。
每日除咗落單執枱同有時要入去幫手煮下米線之外，我最多時間就係努力同唔同姐姐傾計，睇下套唔套到料。
或者因為我年紀算輕，而且係全店入面唯一一條仔，所以班姐姐都好踴躍咁招呼我。
而佢哋對我嘅反應，不外乎以下三種。
一，慈母型。
呢類型嘅「譚仔姐姐」成日都會叫我著多件衫、又煲湯我飲、又切埋生果我食，總之令我以為自己多咗幾個阿媽。
二，寂寞的心型。
呢類姐姐通常都會非常主動咁接近我，然後懶係俾啲碗我攞嘅時候又摸下我隻手，又或者無啦啦隊個心口埋嚟我度，有啲再瘋狂嘅直頭喺我食Lunch嗰碗米線上面用韭菜砌個「I love you」俾我。
而我通常遇到呢一類型，為咗套料，我通常都要忍辱負重，任由佢哋喺我嬌嫩嘅手背上面抽水，又或者回敬一個Mirror式嘅「心心」俾佢哋，咁就可以令佢哋咩都講嘢出嚟。
三，相睇型。
嗯，呢類係最恐怖嘅，通常佢哋會成日無孔不入咁塞自己啲囡囡相俾我，同我講佢啲囡有幾好。
所以自從第一日翻工開始，我個Locker、背囊、衫袋、飲完嗰杯凍檸茶嘅杯底，都會見到佢哋啲囡囡嘅相。
為咗對抗「寂寞的心型」同「相睇型」姐姐，我終於下定決心要帶敏敏嚟宣示下主權，幫我擋走哂啲狂風浪蝶。
估唔到嘅係，啲姐姐一見敏敏出現，竟然更加踴躍，不斷問佢我哋拍拖嘅事。
更大件事嘅係，有人仲懶係好心咁送咗「譚仔」最近跟風推出嘅「麻辣酒心朱古力」俾敏敏。
我一見到就心知不妙，即刻衝過去幫佢擋駕，叫啲姐姐都係乖乖地去做嘢先。
「嘩，呢粒嘢，我聞到已經諗起啲屎喇。」敏敏一臉厭棄咁將粒朱古力俾翻我。
呢句說話，咁啱俾坐我哋對面嘅一對情侶聽到。
而呢對情侶手上面，咁啱就拎住咗一粒打開咗正準備食嘅「麻辣酒心朱古力」。
呢對情侶已經擘大咗口，但偏偏就聽到敏敏呢句嘢，令佢哋個口非常尷尬咁唔知咬唔咬落去好。
無奈之下，我唯有即刻拉敏敏去隔離枱繼續傾，為免再噴走埋其他客人。
「我暫時收到嘅風有，向彩萍大概五年前離開『譚仔』，而且走得好急。第二就係聽講當年就係佢試下喺唔同湯底加入啲秘制雲南香料，令呢間分店嘅湯特別好味，所以先吸引到好多客人明明咁多分店都唔揀，專程都要嚟呢度食嘢，所以留低過唔少熟客，但係可惜都無人知道佢去咗邊度。聽講佢平時為人好好，呢度唔少雲南同鄉都受過佢照顧，所以都幾得人歡心。而家我可以繼續搵嘅線索有兩個，第一係員工室向彩萍嘅Locker，第二就係娟姐。」我將我搵到嘅資料報告哂俾敏敏聽。
「咁唔怪得呢間舖要專請雲南人同埋用湯底試人，好明顯原因就係唔想呢種秘制嘅雲南湯底外傳啦。」敏敏恍然大悟咁講，然後又問：「娟姐？關佢咩事啊？」
「我發現，每次當我同其他姐姐問起向彩萍嘅時候，娟姐都會有意無意咁阻止我哋。但係我聽翠姐講，娟姐原來係同向彩萍由夜總會時代已經相識，所以佢兩個係最老友嘅。我覺得，話唔定娟姐身上會有更多關於向彩萍嘅資料。」我講出我嘅推測。