《求婚嗰日，我發現我女朋友鍾意食屎》: 四十六

到八仙果師父醒翻，已經係七個鐘頭之後嘅事。
「閃電八連鞭係要運用全身真氣打出嘅秘技，一經使用，必定元氣大傷。今次其實都係我失策，竟然會計漏咗可能會遇到『獵蠱人』。」八仙果師父一邊講，一邊食住佢最鍾意嘅黑糖珍珠八仙果。
 
「其實嗰班『獵蠱人』係咩人嚟㗎？」我等咗成晚，終於忍唔住問。
「你哋知道，『蠱蟲』係需要養蠱人精心煉養出嚟嘅。要煉出毒性最強嘅蠱蟲，過程中需要大量時間、心機、食材、甚至係養蠱人嘅血。所以，對『獵蠱人』嚟講，如果可以直接從人哋身體上面獵到高級嘅蠱，分分鐘就可以賣到一個好價錢。
 
你哋都見啦，嗰兩個男人咪有一隻紅色青蛙跟住嘅。嗰隻紅色青蛙正式嘅名係『丹青朱莽』，呢類青蛙都對『蠱蟲』嘅氣味特別敏感，係『獵蠱人』專門養嚟搵出『蠱蟲』嘅專用寵物。」八仙果師父解釋完之後，又忍唔住咳咗兩聲，手上依然見到有啲血絲。
 
「不如我哋抖多一兩日，等你身體康復先再出發啦。」敏敏關心八仙果師父嘅身體，所以有咁嘅建議。
「唔得。一旦嗰班『獵蠱人』喺呢一兩日再叫多啲幫手嚟，我就未必夠打，所以要趁佢哋未嚟之前，我哋就要起行。愈遲走，只怕危險愈多。」八仙果師父嚴肅咁講。


 
喺八仙果師父嘅強烈要求之下，我同敏敏唯有扶起師父，繼續我哋原定嘅行程。
我哋離開酒店，上咗一架預先叫定嘅車，然後就出發去向彩萍留低咗嘅地址。

經過大約半個鐘嘅車程，我哋離開咗城市，兩旁開始俾延綿不斷嘅森林、農田同自然地貌所包圍，而呢種環境亦相對貼近我幻想中嘅雲南。
如果今次嚟到嘅目的唔係為咗幫敏敏解蠱，或者我哋已經跳咗落車影翻幾張打卡相。
喺看似無盡嘅車程上，八仙果師父把握時間合埋眼休息，敏敏就笑住望緊窗外風景，睇落並無咩擔心。
反而係我，一諗到終於要同向彩萍正面交鋒，到底佢會唔會對我哋不利呢？到底佢放低咗呢廿年恩怨未呢？如果未，而八仙果師父又狀態不佳，到時應該點做好呢？
呢啲問題同擔心，一直喺我腦海之中揮之不去。



呢個時候，有一隻溫暖嘅手輕輕捉住咗我。
我好自然望向敏敏，佢向我微微一笑咁講：「放心，船到橋頭自然直。」
敏敏嘅性格，無論咩時候都係咁樂觀，而我往往就係俾佢呢份樂觀感染，好自然咁就有翻動力。
所以，我自然咁就拉起咗敏敏隻手，輕輕喺上面錫咗一啖。

咦，敏敏隻手嘅質感比起平時粗糙咗好多，感覺就好似錫咗落塊百潔布度一樣。
我認真咁望一望敏敏，發現佢兩隻手都放喺大髀上面，而佢亦都用緊一個好疑惑嘅眼神望住我。
望到敏敏咁呢個樣，我突然明白，點解我頭先錫落去嗰隻手嘅質感同平時咁唔同。
我將頭轉去另一邊，望到八仙果師父呢個時候正喺度念念有詞咁發緊開口夢，似乎念緊符咒，配合佢其中一隻手亦都喺度龍飛鳳舞。
至於點解係一隻手，因為佢另一隻手，正正就係搭咗喺我隻手上面。


唉，發開口夢還發口夢，點解師父佢要搭我隻手呢？
我無奈咁將師父隻手拉開，然後默默咁合埋咗眼，希望借瞓覺幫自己忘記呢一段咁恐怖嘅回憶。
 
但就係呢個時候，敏敏開聲問咗我一句：「酒店嗰兩個『獵蠱人』嚟嘅時候我失去咗知覺，所以我完全唔知發生咗咩事，你可唔可以話我聽啊？」
喺敏敏要求之下，我就將嗰兩個「獵蠱人」用朱古力味煙令敏敏失常、到來嘅目的、我點樣出手阻擋佢哋嘅事話俾敏敏聽。
敏敏聽完，又追問我過去嗰個半月點樣向八仙果師父學藝，於是我又將呢段艱辛嘅日子話咗俾佢聽。