《求婚嗰日，我發現我女朋友鍾意食屎》: 四十七

聽完之後，敏敏似係滿足，但係好快又側住頭咁問：「咦，你仲未講，到底當時你喺個袋度摸到嗰個盒係咩嚟㗎？點解會令你突然有翻信心去對抗嗰兩個男人嘅？」
我笑一笑，打開個袋就將嗰個盒拎咗出嚟。
呢一個刻意用密實袋包住嘅盒，其實就係當日我用嚟向敏敏求婚嘅朱古力。
「呢盒朱古力，我一直都帶住。因為我希望當你啲蠱毒一除，就可以即刻向你求婚。所以，當我嗰日一摸到呢盒朱古力，我就即刻記翻起哂自己點樣下決心去保護你。」我望住呢盒朱古力，心入面係萬般滋味。
呢盒朱古力，既令我諗翻起因為呢盒朱古力先發現敏敏嘅食屎怪病，從而衍生咗咁多事情，否則，可能我哋瞞下瞞下就係一世，我永遠都唔會發現敏敏有呢個怪病；同時又令我覺得萬般幸運，因為如果唔係呢盒朱古力俾咗機會敏敏向我坦白呢個病，可能佢一世都要瞞得我好辛苦，而心入面亦長期都會有呢份壓力。
始終比起你瞞我瞞，我相信情侶之間可以坦白咁一齊面對問題先係最重要。
 
就喺我同敏敏傾計嘅時候，不知不覺間原來車已經停定咗，亦都代表我哋到達咗目的地。
我、敏敏扶住八仙果師父落車，呢度四圍都係綠油油嘅農田，或者有一堆散落破舊嘅石屋，再望遠少少就係一座接一座嘅青翠高山。
「喺嗰邊。」八仙果師父指一指遠處大概二百米之外嘅山坡之下，有幾十間小屋，似乎係一條小村落。


我同敏敏點一點頭，就扶住師父慢慢朝住村落走去。
 
我哋行到村落嘅入口，有一個年近八十嘅老伯坐咗喺度，同時用佢黝黑瘦削嘅手臂拎住咗支煙喺度食緊。
當我哋三個走近村落嘅時候，呢個老伯好似樹獺咁慢咁伸出咗手，指向一塊佢身邊嘅木牌，低聲講咗一句嘰哩咕嚕嘅嘢。
八仙果師父拉停咗我同敏敏，講：「佢講緊苗語，好似係解『停低』。」
因為呢下停低，我不期然咁望向黑瘦老伯所指向嘅木牌。
木牌上面寫住：「非本族人不得擅進。」
 
我哋三個都窒咗一窒，但係八仙果師父好快就已經表情如常咁輕輕撞咗我同敏敏一下，推我哋行前一步。
我知道，師父係暗示緊我哋扮睇唔到繼續向前行。


於是，我、敏敏同師父三個就一齊抬高頭、四圍望咁打算繼續行入村。
 
點知呢個時候，黑瘦老伯拎出咗一支青色短笛。
八仙果師父一見，即刻拉停咗我哋，細聲講：「呢支笛係蜂笛，專門召集毒蜂，毒蜂活動量太大，係毒蟲之中最難搞嘅，我哋唔好亂嚟。」
眼見村入口就喺前面但係偏偏唔入得，實在係有啲心有不甘。
而我知道，如果入唔到村，就見唔到向彩萍；搵唔到向彩萍，就幫唔到敏敏。
所以，陳超博，又係搏一搏嘅時候喇。
 
我輕輕捉住八仙果師父同敏敏隻手，望實佢哋講：「我有個方法可以一試，但係唔知成唔成功，如果一陣發生咩事，你哋唔洗理我，第一時間走先。」
敏敏聽咗，即刻好緊張咁捉實我，問：「你想點啊？」


「相信我，唔驚。」我笑住整咗個「V」字手勢，將敏敏隻手拉開咗，然後就轉身走向黑瘦老伯。
 
我同黑瘦老伯講咗一兩句嘢之後，黑瘦老伯點咗一下頭。
於是，我就向敏敏同八仙果師父招手，叫佢哋行入村。
佢兩個半信半疑咁慢慢行去入去，而黑瘦老伯只係食住口煙，完全無意欲攔阻佢哋。
就係咁樣，我哋三個就走過咗黑瘦老伯呢一關，成功入村。
 
「點解佢會突然咁順攤㗎？」敏敏充滿好奇咁問。
「仲有，佢講嘅係苗語，點解你會同到佢溝通㗎？」今次，連平時神通廣大嘅八仙果師父都睇唔透我。
「好簡單啫，話哂先前我都喺『譚仔』做咗一個月，我間舖個個譚仔姐姐都係雲南人，當中有唔少都係苗人添，所以有時收工傾計都係用苗語嘅。咁有時我好奇過去問下佢哋講咩，佢哋就會教我兩句，所以我都可以聽同講到幾句嘅。」提起苗語，當時最熱心教我嘅就係翠姐。
一諗起佢因為我而身受重傷，我忍唔住嘆咗口氣。
 
「咁到底你講咗啲咩，令到個伯伯放我哋入村呢？」
敏敏雙眼擘大，睇得出非常好奇；而八仙果師父都好疑惑咁摸緊下巴，似乎都未估到我做咗啲咩。
 


我擺出咗一個高深莫測嘅笑容，笑住講咗一句：「咁就要多謝周星馳喇。」
「周星馳？」敏敏同八仙果師父一齊嗌咗出嚟。