《求婚嗰日，我發現我女朋友鍾意食屎》: 五十三

正當我想再反駁向彩萍嘅時候，敏敏拉一拉我嘅衫袖，示意交俾佢講。
 
「萍姐，我知道，當年係我爸爸有負於你。最近當我聽翻我爸爸講翻起呢件事嘅時候，佢自己都知當年處理得好差，亦對你好有歉意。我明白，你對我爸爸恨之入骨，但係我亦都知道用『血蠱』害人同樣對你自身無益。既然都事隔多年，你亦都已經擁有自己嘅婚姻，你又何必要繼續為昔日嘅仇恨而令今日嘅自己受苦呢？」敏敏一邊講，竟然一邊大膽咁走向向彩萍，顯示佢想示好嘅好意。
「我當日痴心一片，將自己嘅青春同未來都押喺呢個男人身上。點知到頭來，佢竟然因為我用『蠱蟲』幫佢，佢就離我而去。佢對我嘅虧欠，仲有佢歧視我嘅『蠱術』，呢啲嘢已經值我恨佢一世。」向彩萍咬牙切齒咁講，個樣簡直好似想將我外父碎屍萬段一樣，「你今日嚟，無非都係想我幫埋你解蠱啫。哈哈哈！唔洗旨意啊！我就係要丘志傑，仲有佢嘅後代都感受到俾人歧視、俾人冷待嘅苦！」
 
「咁好可惜，你嘅如意算盤打唔響，即使我同我爸爸都會食屎，但係我哋都一樣可以擁有好嘅愛情。即使我媽媽知道、甚至見過我爸爸食屎，佢兩個嘅婚姻到今日依然好穩陣。」敏敏笑咗一笑，然後好甜蜜咁望向我，「而我，曾經都覺得食屎係一件好醜同無人可以接納到嘅事。但係，我呢個男朋友，唔單止完完全全咁接受咗我，佢甚至努力用好多千奇百怪嘅方法，又煮屎又學道術，無非都係想可以好好照顧我。」
「無……無可能。」向彩萍不可置信咁搖頭。
「當年，我爸爸確實係接受唔到你識得『蠱術』，但佢離開你嘅原因唔係因為佢歧視你，而係佢真正咁明白自己鍾意嘅人係邊個。所以，如果你哋之間嘅唔係真愛，唔好話食屎，任何事情都可以成為對方挑剔你嘅地方；但如果兩個人之間有嘅係真愛，老實講，無講狀態幾差，都一樣可以彼此接納。」
 
向彩萍聽咗敏敏嘅說話，不斷好緩慢咁搖頭，而佢頭先因為逃走而變的凌亂嘅頭髮亦跟住佢嘅動作而不斷擺動，令佢顯得更加失意。


「你係養蠱嘅人，你一定知道自己所用嘅『血蠱』傷人三分，傷己七分。再咁落去，即使你可以令丘志傑一家一世食屎，但亦都令你自己血虛血寒，小則不孕，重則晚年惡病纏身，每逢翻風落雨天必然全身發冷，苦不堪言。既然而家你都知道你嘅『蠱』影響唔到丘志傑嘅家庭，不如當係放過自己，早日解除蠱咒啦。」八仙果師父用氣聲講出呢番說話，目的似乎都係想動之以情。
本來向彩萍聽前半段說話都仲係愁眉苦臉，但係直到最後兩句，佢即刻面色一變，兩隻眼瞪大望向遠方。
眼神之中，係難以言喻嘅恨意。
 
「放過自己？唔係我唔放過自己，係佢唔放過我。」向彩萍望住遠方講嘢，好似我外父丘志傑就喺附近咁，「佢攞走咗我嘅一切，即使我害得佢唔夠慘，但係我都唔會俾佢好過少少。」
「到底，你同我爸爸發生咗咩事？我爸爸欠你嘅又係啲咩？」敏敏好小心咁問咗呢句說話。
 
「愛。佢攞走咗我對愛情嘅感覺。」