《求婚嗰日，我發現我女朋友鍾意食屎》: 五十四

故事眨眼翻到廿幾年前嘅雲南。
 
「姐，到了香港，記得事事小心。」
二十歲嘅向彩萍手提住兩個大袋，企喺門口望住細自己一歲嘅細妹，心入面充滿咗唔捨得。
「嗯，媽就交托你照顧了，我到了香港會再寫信和把錢寄給你們。」向彩萍攬一攬呢個從小以來都無分別過嘅家人，好努力咁忍住自己嘅眼淚。
「對了，媽剛才千叮萬囑我要提醒你，香港人不單純，一定要小心交友，尤其是男人。」細妹雙眼通紅，好明顯都係一樣唔捨得俾向彩萍離開。
「我到香港還得工作，怎麼會有時間交友呢？倒是你，快點認識個好男人嫁了，算是了結媽的一椿心事。」向彩萍摸一摸細妹個頭，內心確實衷心希望細妹可以搵到一戶好人家，話唔定仲可以幫輕到媽媽嘅醫藥費。
 
細妹聽到，忍唔住笑住講：「呸！我們村子裡最好的男人在你出生前就已經被你收服了，我還能找什麼好男人呢？」
向彩萍當然明白細妹取笑緊自己，正準備笑住打細妹作出反擊嘅時候，遠處就傳嚟咗一聲叫喊：「阿萍！阿萍！」


呢把雄壯嘅聲音喺農田間顯得格外響亮，而向彩萍同細妹一聽到，即刻互望一眼互相微笑。
佢兩個內心所諗嘅都係同一句說話：「果然係一講曹操，曹操就到。」
 
一個滿頭大汗，膚色黝黑嘅年青男仔跑到向彩萍面前，好緊張咁一輪嘴問：「阿萍，你行李都準備好了嗎？還有什麼需要嗎？我可以幫你去拿啊！還有一會兒去機場的證件都帶好了嗎？漏帶就麻煩了！還有……」
「我、已、經、準、備、好、了！」向彩萍望住眼前呢個同自己指腹為婚、青梅竹馬一齊長大嘅石養么，無奈咁答咗佢一句。
「要不要打開行李箱再檢查一下？還有，你帶了最喜歡的拌飯菜嗎？你沒有它吃飯就不開懷了！還有，如果你在香港發生了什麼事，只要你打電話來，我就馬上過來。」石養么問完一樣，又忍唔住再講多幾樣。
「你別嘮叨！我已經是成年人了！」向彩萍對住石養么咁多年嚟嘅長氣，始終都係束手無策。
 
石養么，由細到大都無變過，所有關於向彩萍嘅嘢，佢都會格外緊張關心，甚至比向彩萍本人更上心。
對向彩萍嚟講，到底自己鍾唔鍾意石養么，佢自己都唔知。


但係無論如何，石養么嘅存在就好似佢嘅親哥哥一樣，對自己無微不至，照料有加。
 
正當石養么又準備再婆婆媽媽咁問向彩萍問題嘅時候，向彩萍嘅細妹從屋企入面走咗出嚟，對向彩萍講：「媽有話要跟你說。」
向彩萍一聽，即刻好緊張咁走咗入屋度。
喺呢間只得一扇窗嘅石屋入面，臥病在床嘅向彩萍媽媽面色顯得特別灰白。
「媽，你找我？」向彩萍跪喺床邊，同時用手輕輕摸住媽媽乾枯嘅面。
「萍，到了香港，萬事小心。反正我命不久已，不要辛苦了自己去賺錢。」向彩萍媽媽呢句說話講得好慢，亦唔及向彩萍淚流滿面嘅速度快。
「媽，你這是什麼傻話？你等我到了香港，很快就能將薪金寄給你。」向彩萍捉住媽媽嘅手，肯定咁講。
「還有，萍，記得，千萬不要在別人面前動用蠱咒，到時候公安捉你，別人也會疏遠你。畢竟，不是每個人都能接受『蠱』，更不是每個人都能接受他人的黑暗面。世上的人啊，即使知道這世界除了彩色還有黑色，但他們就是不願意接受。」向彩萍媽媽嘆咗一口氣。
向彩萍知道媽媽之所以咁講，全因為當年媽媽唔覺意喺向彩萍爸爸面前用咗蠱咒，即使喺雲南人，對「蠱」呢樣嘢其實一樣敬而遠之，所以事隔一晚，向彩萍爸爸已經靜靜雞咁一走了之。


「放心，我一定記得，你也要保重身體，等我回來。」向彩萍雖然咁樣講，但係佢自己心入面知道，其實今次香港之行，實質上到底有冇歸期都係未知之數。
 
喺石養么嘅陪伴之下，向彩萍嚟到雲南機場。
「到了香港，沒有了我，你也要照顧好自己。」石養么一邊講，一邊皺哂眉頭，睇嚟都仲係放心唔落向彩萍。
「成了成了，不說了，我要上機了。」雖然話向彩萍唔太鍾意石養么嘅長氣，但嚟到呢一刻，話哂都係要離開呢個由細識到大嘅朋友，其實心入面都有啲唔捨得。
「那……。」石養么遲疑咗一陣之後，吟吟噚噚咁講咗句嘢。
「你說什麼？」石養么呢句嘢細聲到，連向彩萍都聽唔清楚佢講咗啲咩。
「我說……」石養么吸咗一口氣,，然後先講：「我等你。」
 
向彩萍一聽，馬上就明白點解石養么會講得咁細聲。
因為，佢怕羞。
「我等你」呢句說話，本來聽上去都無咩特別意思，但係用喺呢兩個指腹為婚嘅人身上，某程度上石養么嘅意思就係暗示緊等向彩萍一翻嚟，石養么就會迎娶佢。
雖然向彩萍無好認真諗過要同呢個青梅竹馬嘅好朋友結婚，但係呢刻聽到，心入面都泛起一陣感動。
「嗯，那麼，再見了。」對於石養么嘅心意，向彩萍唔太識點回應，亦怕自己加添唔捨得嘅感覺，所以二話不說就轉身走咗。
留低嘅，就係一直傻痴痴咁望實向彩萍背影，直至到完全消失嘅石養么。