《求婚嗰日，我發現我女朋友鍾意食屎》: 六十
一時間，五十幾條蜈蚣破屋而入，喺向彩萍嘅黯然笛音驅使之下紛紛爬向丘志傑同佢女朋友。
人之將死，其言也善。
丘志傑眼見死到臨頭，內心反而一片澄明，所以佢好似突然間大徹大悟咁，一下子衝咗去佢女朋友身邊，然後好認真咁對住向彩萍講：「今日係我對唔住阿芳，係我做錯，我係一個壞咗嘅人，我犯咗天下男人都會犯嘅錯。我抵死，只不過就算死，我都唔會揀你。我一直以嚟都無愛過你，我愛嘅人，就只有阿芳一個。」
如果之前嗰段說話對向彩萍嚟講係連環重擊，咁今次丘志傑所講嘅嘢，就係對向彩萍嘅致命一擊。
向彩萍剎那間變到面無血色，腦入面既無恨意，亦無愛意，好似完全俾人掏空咗咁。
「唔係真㗎，你係愛我㗎……唔係真㗎，你係愛我㗎……」向彩萍口入面不斷講住呢幾句說話，似係否定緊丘志傑，亦都似說服緊自己。
呢一刻，佢只係想快啲走離開，唔想再俾自己諗到丘志傑呢個人。
當佢走到門口嘅時候，佢望到丘志傑攬實咗佢女朋友。
向彩萍估唔到，自己做咗咁多嘢，到頭來都只係幫丘志傑肯定咗佢對女朋友嘅愛。
呢一刻，向彩萍唔打算殺人，因為佢知道自己根本落唔到手。
但係，佢心目中嘅恨意亦都唔容許佢就咁放過丘志傑呢個賤人。
所以，向彩萍心入面浮現咗一個前所未有嘅想法。
一個用最深嘅恨意嘅包裝嘅想法。
既然丘志傑接受唔到自己嘅黑暗面，佢都要丘志傑感受一下被人討厭、被人放棄、甚至連自己都睇唔起自己嘅感受。
向彩萍諗到呢度，二話不說就咬落自己虎口位度，鮮血即刻流咗出嚟。
向彩萍用自己嘅血喺地下畫出「血蠱」嘅咒陣，完成之後，佢企翻起身，用只係剩低恨意嘅雙眼望住丘志傑。
呢個「血蠱」咒陣，係一個詛咒丘志傑嘅咒。
咒文所寫嘅，係向彩萍甘願用自己嘅鮮血，去換取對丘志傑嘅控制。
佢要控制嘅，係要令丘志傑感受一下被抗拒、被否定、一世都抬唔起頭嘅感覺。
佢要，丘志傑一世食屎。
「你一定係愛我，只係接受唔到我識得控制蟲呢件事。既然你係因為接受唔到我而放棄我，我就要你親身試下俾人接受唔到、俾人冷待、俾人放棄嘅滋味。」
向彩萍喺丘志傑面前留低咗呢一句說話，然後就咁離開咗。
佢一邊走，一邊繼續用充滿血嘅手為自己抹眼淚。
佢暗地發誓，以後為咗丘志傑呢個人，即使流血，都唔可以流眼淚。
自從丘志傑呢件事之後，向彩萍再無愛過任何一個人。
佢曾經有嘗試拍過好多次拖，希望俾自己搵到愛情嘅感覺，但係每一個都維持唔夠一個月，然後就不歡而散。
而喺夜場入面，如果佢好心情少少，佢都可以應付一兩個客。
但只要有客人稍為令佢諗翻起少少關於丘志傑嘅事，咁就只可以話呢個客唔好彩喇。
情況稍為算好嘅，可能只係俾啲蟲嚇走；情況壞啲嘅，可能就要俾蟲咬翻幾啖，喺咁易入下醫院咁啦。
而礙於向彩萍似乎有啲奇怪嘅超能力，英姐亦都唔太敢炒咗向彩萍，而且向彩萍對佢亦都尚算客氣，所以英姐就將佢繼續留喺夜總會。
眼見喺夜總會度做只會不斷挑起向彩萍嘅傷口，阿娟有一日提議，不如佢哋兩個努力賺下錢，等儲夠錢嘅一日，就一齊出去開間舖，做翻正行。
於是，兩個女人就開始為咗呢個目標努力，終於喺若干年後，佢哋就成功開咗一間同家鄉有關，賣雲南米線嘅餐廳。
當年米線雖然尚未成為主流，但係因為向彩萍自細喺屋企都有煮嘢食經驗，所以憑住佢自己加料嘅湯底，成功令到唔少食客一再幫襯，亦幫助到餐廳走上軌道。
向彩萍諗起自己身世，知道唔少同鄉若然想嚟香港打工，選擇一定唔多，所以迫於無奈就要流落夜場。
於是，佢就開始喺米線店專請同鄉，令唔少雲南女性可以嚟到香港賺錢，幫補家計。
由於打理餐廳呢件事又忙又有意義，向彩萍慢慢都淡忘咗丘志傑呢個人。
只不過，佢亦都無再俾自己思考過關於愛情嘅事。
向彩萍嘅生活就係咁一直俾餐廳所填滿，直至到五年前，佢收到一通電話。
一通嚟自家鄉嘅電話。
打嚟嘅人，係向彩萍一啲都唔陌生嘅石養么。
因為向彩萍差唔多每個月都會收到石養么嘅信，而向彩萍偶爾都會同佢分享翻香港嘅事。
當然，關於丘志傑嘅事就絕口不提啦。
今次收到石養么嘅電話，內容竟然同向彩萍媽媽有關。
原來，就喺一日前，向彩萍長期臥病在床嘅媽媽竟然因為急性病發作，一夜之間就死咗。
而石養么打嚟嘅目的，就係想向彩萍翻去家鄉打理媽媽嘅身後事。
收到呢個電話之後，向彩萍喊咗好耐好耐。
佢喊，係因為自己對媽媽嘅內疚感。
其實自從向彩萍嚟咗香港之後，佢一直都無翻過雲南。
佢內心好掛住鄉下，但係令佢卻步嘅，其實係丘志傑嘅事。
佢諗起，自己當初講到已經搵到適合嘅人，但係偏偏最後芳心錯許。
如果翻到鄉下，佢一定會俾媽媽問長問短，一來失禮，二來又怕媽媽更加擔心，三來更怕媽媽對自己失望。
種種嘅考慮之下，所以向彩萍一直以來都無翻過鄉下，最多都只係靠匯多啲錢翻去，或者每星期都打電話翻鄉下慰問媽媽。
每次媽媽問起佢幾時翻去，佢都只係敷衍咁答一句「自己喺香港好忙，有時間先再翻去啦」。
點知，到頭來原來無時間嘅人並唔係佢，而係佢媽媽。
由於香港米線店已經上哂軌道，拍檔阿娟亦都好令人放心，為免再俾人問長問短咁婆媽，呢一刻已經煩惱纏身嘅向彩萍決定唔交代半句就離開香港，踏上回鄉之路。