《求婚嗰日，我發現我女朋友鍾意食屎》: 六十四

呢一刻嘅向彩萍神情呆滯，似係有好多嘢想講，但係又唔知從邊度講起咁樣。
而敏敏就全神貫注咁望實向彩萍，似乎呢次嘅問題，都係佢精心諗咗好耐。
 
當佢兩個喺度凝神對望嘅時候，八仙果師父喺我身邊好細聲咁講：「博，你望下向彩萍隻手同腳。」
聽住師父嘅說話，我望到向彩萍隻手開始有少少震動，而佢腳前嘅泥土亦都有微微拱起，代表佢隻腳都已經開始有非常微細嘅前進。
我明白八仙果師父提我望向呢兩樣嘢，係想暗示向彩萍已經開始重奪身體嘅控制權，亦都即係「八仙法」好快就會壓制唔住佢。
但係我亦都知道，喺呢個時候，我已經無可能叫敏敏收手唔好再問，所以我唯有喺內心默默祈求，希望敏敏好似記者咁快啲問到佢想要嘅結果，然後就將時間交翻俾現場嘅主持人，即係我。
 
「我…….唔識得答你呢個問題。」
講出呢句說話嘅向彩萍，表情上無任何嘅嬲怒，而係好由衷咁一臉迷芒。


「其實我唔否定，你曾經好深愛過我爸爸。而正因為深愛過，所以當失去嘅時候，先會變成加倍嘅痛恨同受傷。重傷過，好自然就會對『愛情』產生恐懼，從而令自己抗拒去愛，甚至宣稱自己失去愛情嘅感覺。但係若然你捫心自問，唔通你真係唔想有一個愛自己嘅人？」敏敏呢個時候已經走到去向彩萍面前，兩個人前所未有咁近咁望住大家。
「想，但係仲可能有咩？」向彩萍兩眼通紅，完全無哂一直以嚟俾我嗰種女魔頭嘅感覺。
呢一刻嘅佢，全身都散發住可憐同淒楚嘅氣息。
 
「以前美好，但係唔代表只係得『以前』先可以出現『美好』。」
敏敏低頭講出咗呢句說話，然後先抬頭一笑繼續講：「呢句說話，係我媽媽講俾我聽嘅。
我由五歲開始，每次聞到或者食到朱古力，都會令我忍唔住要食屎，所以為咗避免麻煩，我嘅人生基本上要對朱古力避得就避。但係喺五歲幾嘅時候，有一次我去咗一個好朋友嘅生日會，而佢嘅生日蛋糕咁啱就係用朱古力整。但係最吸引我嘅，係佢朱古力蛋糕上面印咗一個好靚嘅公主。
 
望到呢個蛋糕，我已經非常之想食，加上有埋個公主，我心入面已經唔想理自己之後會唔會食屎，一心都只係想食蛋糕。但係我媽媽當然明白我一失控去食屎，情況可能可以好嚴重，甚至會嚇親在場所有家長。於是，佢就堅決咁唔俾我食呢個蛋糕。
 


當時仲細嘅我其實對於自己有食屎呢個怪病已經好唔開心，而呢個病令到我連朱古力呢種美食都無得食，我就更加唔滿意。當我因為呢個病連公主蛋糕都無得食嘅時候，我終於忍唔住將心入面嘅委屈喊哂出嚟。我仲記得自己嗰時喊住同媽媽講，點解我以前細個就可以食好好味嘅朱古力，而家就要有呢個病，搞到完全無得食朱古力喎！然後，我就大吵大鬧話一定要食到公主蛋糕。
 
我媽媽並無嬲到我亂發脾氣，佢只係好溫柔咁將我攬咗埋身，一邊摸住我把長頭髮一邊講：『以前美好，但係唔代表只係得「以前」先可以出現「美好」。』佢解釋話，雖然細個係可以食到好好味嘅朱古力，而家無得食係好可惜，但係唔代表我將來唔會遇到更多好食嘅嘢食，更多靚嘅蛋糕。
 
我就係因為呢番說話，俾媽媽引開注意去同佢傾下將來想食咩蛋糕，之後就再無發脾氣。或者當日媽媽只係為咗令我分心而講出呢句說話，但係呢句嘢，一直都影響緊我成長。
 
每個人，都總有多多少少對以前嘅眷戀。無論係關係、生活、自由，抑或青春。但即使無論過去有幾美好，我哋都需要承認，其實呢啲美好，好多都唔係我哋自己爭取翻嚟嘅，而係一場命運安排嘅不期而遇。既然係咁，如果過去我哋可以遇到某啲人或者事，點解將來就唔可以遇到呢？所以，既然你曾經可以遇到過我爸爸而且深愛佢，點解你又覺得自己無可能再遇到另一個值得你深愛嘅人呢？」
 
向彩萍雙眼入面嘅眼淚，喺聽完敏敏呢番說話之後終於流咗出嚟。
佢嘅眼淚一發不可收拾，感覺就好似將佢收收埋埋好多年嘅鬱結全部都喊哂出嚟一樣。