《求婚嗰日，我發現我女朋友鍾意食屎》: 六十五

「但係，就算我真係遇到另一個值得我愛嘅人，我都已經唔識得再分辨自己係咪愛佢。又或者，我根本就唔敢再話自己愛佢。」向彩萍呢刻喺八仙果師父控制之下郁唔到，但係單單係表面，都可以感受到佢內心嘅痛苦。
「雖然你對愛情嘅恐懼阻擋咗你對愛嘅感覺，但係，其實你嘅行為同選擇都嘗試話緊俾你聽一啲嘢。」敏敏見向彩萍郁唔到，索性喺背囊度攞出紙巾幫佢抹眼淚。
「行為……同選擇？」向彩萍似乎聽唔明。
 
「你自己講，自從經歷我爸爸之後，你都遇過好多男人，但係每一個男人你都唔可以有一段長時間嘅關係。既然係咁，點解而家你偏偏可以同石養么結婚，仲要相處到咁耐嘅時間吖？」敏敏又問。
「我……當初同佢結婚只係為咗報恩，多謝佢盡心盡力去照顧我屋企人。」向彩萍答，但感覺似係欲言又止。
「當初為咗報恩，但係而家呢？如果要報恩但係毫無感情，你大可以走吖。你以前面對唔同男人嘅時候，你都話自己會爽快咁離開段關係，就連夜總會、自己開嘅『譚仔』、你都可以話Quit就Quit，咁點解呢幾年你會願意一直留低吖？」敏敏再次問出問題。
「因為……喺佢身邊，會有一種好自然嘅安全感，令人覺得好安穩。」向彩萍一邊講，一邊展露出一個好淺嘅笑容。
比起「甜蜜」，用「無憂無慮」去形容佢呢個笑容或者更加好。
敏敏跟住佢笑咗一笑，然後講：「呢份感覺到底係咪愛，只有你自己先知。但係，真愛是任何形狀，當年你同我爸爸係充滿激情嘅愛，但係，並唔代表平淡安穩嘅感覺唔係愛。」


向彩萍聽到之後，若有所思咁點一點頭。
 
今次，其實係我第一次見到敏敏發揮佢社工嘅能力。
一直以嚟，敏敏喺我面前，都係一個小鳥依人，善解人意嘅小女友。
但係而家嘅佢，隨時都可以敏銳到向彩萍所講嘅每句說話，每一個表情，然後再用問題從佢身上問出進展。
我發現，原來即使你愛一個人，而且愛咗好多年，但係只要你認真去觀察佢，你都可以不斷從佢身上搵出新發現。
 
正當我打算再繼續觀察敏敏嘅時候，我反而首先留意到嘅係喺佢前面嘅向彩萍。
因為，我望到向彩萍隻腳已經可以慢慢抬起，咁即係話，佢嘅行動能力已經接近完全回復。
由於敏敏同向彩萍而家嘅距離連一步都無，如果向彩萍一可以郁，第一個遭殃嘅一定係敏敏。


但係，敏敏喺呢一刻依然好專注咁同緊佢傾計，所以完全無留意到向彩萍嘅變化。
 
為咗保護敏敏，我決定走過佢提一提佢。
點知我先向敏敏行出咗一步，我就見到向彩萍嘅身體好輕微咁震咗一下。
「佢郁得啦，阿博，保護敏敏！」八仙果師父同我一樣留意到呢個畫面，即刻向我大叫一句。
而我諗都唔諗，第一時間衝過去敏敏身邊。
 
可惜，我都係慢咗一步。
喺我動身嘅一刻，我見到，向彩萍已經打開咗雙手撲向敏敏……