《求婚嗰日，我發現我女朋友鍾意食屎》: 六十七

聽完之後，我忍唔住向八仙果師父投射出一個求救嘅眼神。
但係八仙果師父只係搖一搖頭，然後講：「血蠱蟲喺雲南獨有嘅嘢，相信亦都只有佢哋嘅獨門方法可以解到。不過你放心，如果你真係不幸去世仙遊，念在你都係我嘅弟子，我會俾翻個『仙果仙尋』嘅善終服務你，希望你一路向西，魂歸西天，價錢都係$44444。」
 
我呢個時候已經無心機聽八仙果師父喺度Hardsell，因為我內心其實對於呢件事真係極度恐懼。
講真，對於我呢個平日見到隻曱甴都會叫到鄰居以為我屋企火燭咁嘅人，你叫我含條蟲入口，真心係慘過死。
只不過，雖然係驚，但呢件事始終係關係到敏敏嘅終身幸福。
如果我真係成功咗，咁我片刻嘅痛苦，就可以換嚟敏敏從此以後都唔需要再食屎。
當然，前提係我無因為吞咗條蟲而毒死。
 
無論如何，今日可以行到嚟呢一步，幾經辛苦先搵到幫敏敏嘅方法，我都無理由因為自己驚就退縮嘅。


所以，我嘗試忽略自己嘅嗅覺，迫自己慢慢喺蟲洞前面跪低先。
嘩，一跪低，嗰陣臭味更加濃烈，我覺得自己好似俾十個大汗嘅大隻佬用格甩底夾住一樣咁痛苦。
我實在好難想像，到底自己點可以克服到呢陣臭味，仲要貼近個洞口對住佢呵氣呢？
 
就喺呢個時候，我感覺到有人拉一拉我嘅手臂。
我望過去，原來係敏敏。
「其實，食唔食屎真係唔緊要，反正咁多年，我都習慣咗，最重要嘅，反而係你願唔願意接受我。」敏敏將我扶起咗，握住我兩隻手講，「我好記得，當你之前喺酒店房同我求婚，然後發現我會食屎之後，你同我講，每個人都有佢嘅奇怪點，呢樣嘢好正常。當我聽到之後，我覺得好感動，好似無條件咁就俾你完完全全咁接受咗。
 
我同意，每個人其實都或多或少有唔想俾人發現嘅習慣或者性格。但係如果呢啲嘢可以俾另一個人完全咁接受，其實真係一件好感動嘅事。所以，對我嚟講，食屎係會帶嚟生活上嘅不便，但係更重要嘅其實係令我一直擔心你會唔會唔接受我。
 


所以，其實只要你願意接受我一世都食屎，我都唔想你為我而冒生命嘅危險。人無事先可以做世界冠軍，比起食唔食屎，我更加想同你可以平平安安咁一生一世。」
 
聽完敏敏呢一番深情告白之後，我忍唔住企起身攬住咗佢。
講真，第一次見到敏敏食屎嘅時候，我真係好震撼，心入面亦都一心一意想幫佢醫好呢個病。
但係，當我一路認識八仙果師父兩公婆、聽完我外父外母嘅故事、而且加埋呢幾個月同敏敏嘅磨合，我發現，其實所有情侶同父母，一樣都要面對另一半嘅奇怪或者黑暗面。
呢啲嘢，唔一定改變到對方，但係兩個人係咪願意互相接納、互相配合，先係一段關係可唔可以行落去嘅原因。
否則即使對方配合你完全改變，如果大家當中無愛，亦都唔代表一段關係可以走到落去。
而敏敏所講嘅，人無事先可以做世界冠軍，放喺關係入面，或者就代表只有彼此體諒同接納，咁先可以風平浪靜咁一生一世。
 
所以諗到呢度，我已經唔再猶豫。


我知道，我呢刻需要嘅唔係捉蟲，而係另一樣嘢。
我轉身，從背囊入面拎咗一樣嘢出嚟，就係我為敏敏親手整嘅求婚朱古力。
之前都講過，我每日都帶住呢盒朱古力喺身上面，目的，就係為咗等敏敏嘅怪病一好翻，我就可以即刻向佢求婚。
但係嚟到而家，我覺得自己已經唔需要再等。
 
我拎咗盒朱古力出嚟，然後單膝跪咗喺敏敏面前。
敏敏一見到我呢個架勢，已經知道我想做咩，驚訝到佢即刻掩住咗個嘴。
我好認真咁望住敏敏，慢慢講出自己背咗好耐嘅台詞：「敏敏，我已經決定咗，無論我哋富貴貪窮、生老病死、食咖哩味嘅屎定係屎味嘅咖哩，我都會一樣愛你、尊重你、照顧你。你願意嫁俾我嗎？」
敏敏流出咗兩行眼淚，同時好感動咁點咗頭。
八仙果師父同高醫生兩個即刻喺我哋身邊大力鼓掌，而向彩萍雖然似係置身事外，但係我見到佢睇落有啲感慨，可能又再一次令佢聯想起自己充滿不幸嘅愛情經歷。
 
我見到敏敏點頭，即刻打開個盒，打算拎出有戒指嘅嗰粒朱古力，然後直接咬開佢，拎隻戒指出嚟。
唔知係咪因為個盒實在放得太耐令到入面嘅朱古力走哂位，當我打開個盒嘅時候，有粒朱古力就咁從個盒度跌咗落地下。
好彩，嗰粒只係普通朱古力啫。
 


正當我打算繼續拎粒戒指朱古力出嚟嘅時候，一個奇妙嘅情景就出現咗喺我哋眼前。