《求婚嗰日，我發現我女朋友鍾意食屎》: 六十六

下一秒出現嘅畫面，完全出乎所有人嘅意料之外。
因為，當向彩萍重奪身體控制權之後，佢第一件做嘅事，竟然係張開雙手攬住咗敏敏。
呢種攬，唔係「攬炒」要殺咗佢嘅「攬」，而係認真深情咁樣攬。

「多謝你，」向彩萍合埋咗眼，睇得出佢好用力咁攬住敏敏：「我好似，好耐無感受過呢種釋懷嘅感覺。」
「呢啲嘢，係唔容易同人傾嘅。」敏敏亦都伸出雙手攬翻住向彩萍。
「嗯，所以，多謝你。」向彩萍無講太多嘢，只係露出咗一個微笑，前從未有咁放鬆嘅微笑。

自從調查向彩萍呢件事以嚟，我心裡面一直都有一個疑惑。
因為從娟姐、翠姐口中，向彩萍係一個無微不至、樂於助人嘅好同鄉、大家姐，但係我從敏敏、外父嘅經歷入面，感受到嘅向彩萍偏偏又係一個用蠱害人、心腸狠毒嘅蛇蠍女人。


所以，我一直都定義唔到，到底向彩萍係一個點樣嘅人。
直到呢刻，當我望到佢呢一個放鬆嘅笑容，我第一次可以將眼前呢個向彩萍連結落去娟姐同翠姐口中嗰個愛護員工、照顧新人嘅向彩萍。

我開始明白，敏敏點解咁堅持同向彩萍對話。
我相信係敏敏一早已經接受到每個人都可以擁有好極端嘅兩面，所以佢無因為向彩萍恐怖嘅表面而退縮，反而有興趣去明白、去了解向彩萍有極端兩面嘅原因。
正因為呢份想要了解嘅心，先可以成為到佢同向彩萍連繫嘅橋樑。

「你係咪想捉蟲解蠱？」
正當我仲喺度思考緊嘅時候，向彩萍突然用番佢冷酷嘅眼神望向咗我，令我背脊即刻出哂冷汗。
「係。」我有啲緊張同生硬咁點一點頭。


向彩萍將面轉翻向敏敏：「你係無辜嘅，你阿爸嘅債唔應該由你承擔。」講完呢句之後，向彩萍再望向我：「蠱蟲，我可以教你捉，只要你捉到，你就救到女朋友。」
我聽到佢所講嘅嘢之後，有一秒嘅遲疑，向彩萍應該留意到我呢個微妙嘅表情，冷笑咗一聲再講：「唔好以為我刻意刁難你，唔係我唔想幫你捉蠱蟲，而係我作為養蠱人，身上充滿咗毒氣，所以我係無可能引到蠱蟲出嚟嘅。」
向彩萍果然睇穿咗我嘅心思，令我再一次提醒自己唔好因為頭先佢一個微笑就忘記咗佢都可以係一個好恐怖嘅女人。
 
向彩萍對住我哋揮咗一下手，示意我哋跟住佢行。
而我哋見佢而家活動自如都無對我哋作出攻擊，斷估都應該無咩事，所以喺八仙果師父都微微點咗一下頭表示放心之後，我哋就跟住向彩萍行入森林。
當我哋行到第三棵高聳入雲嘅大樹嘅時候，向彩萍就停低咗，同時指向樹幹。
我一望，見到樹幹上面果然有一個屎形嘅記號，證明頭先向彩萍喺八仙果師父控制之下，真係講哂真話。
 
「呢棵樹下面就係血蠱蟲所在嘅位置，每日我就係掘開呢個樹底，然後將自己嘅血滴入去裡面餵養血蠱蟲㗎啦。」


向彩萍一邊講，一邊半跪咁慢慢掘鬆地下嘅泥土，唔洗一陣，地下已經出現咗一個唔算好大，但係睇落好深嘅窿。
當呢個窿一掘開嘅時候，一陣撲鼻嘅臭氣即刻湧咗出嚟。
呢種臭嘅程度，就好似你食完麻辣火鍋之後將便秘十日嘅屎山洪暴發咁屙哂出嚟，然後當你沖廁令到啲屎味不斷湧出嘅時候你先發現廁所道門反鎖咗，然後嗰一陣臭味喺廁格入面揮之不去嘅感覺。
 
「嘩……個窿係裝屎㗎？」我一邊作嘔，一邊鬧咗一句。
「係啊，既然要落一個同屎有關嘅蠱，血蠱蟲除咗血之外，當然要住喺充滿屎嘅地方啦。所以我通常會將全家馬桶嘅屎都倒哂入呢個窿度㗎。」向彩萍唔單止無覺得我句說話係鬧緊，仲一本正經咁答我。
「係呢，咁到底我哋可以用咩方法將血蠱蟲捉出嚟呢？」可能因為敏敏本身都食過屎，所以呢刻完全對屎味免疫咗，仲好自然咁向向彩萍發問。
或者，唔怕臭，就係食屎嘅好處。
 
「你哋個師父講得無錯，血蠱蟲比一般昆蟲更加靈敏，如果我哋強行伸手捉佢，佢一察覺有危險就會爬走，永世都唔洗旨意搵佢。所以如果要捉血蠱蟲，唔可以用硬，只可以用軟。」向彩萍踎低，指住洞口開始解釋，「血蠱蟲依靠人類嘅血維生，所以對人類嘅溫度非常熟悉。要引蟲出洞，方法就係用口含住喺個窿度掘出嘅部分泥土，然後擘大口不斷對住洞口呵氣，等血蠱蟲感受到空氣入面有人類嘅氣息之後，血蠱蟲就會慢慢爬出洞口。當血蠱蟲爬到出嚟嘅時候，記得千祈唔好合埋口，反而要俾蠱蟲慢慢爬入去口入面。因為口入面有血蠱蟲習慣嘅泥土，所以應該唔難令佢入到你個口。只要做到呢一步，你就可以第一時間將蟲吐入盒入面，咁就算係大功告成喇。」
 
聽完呢個方法之後，我哋四個都呆咗，而最震驚嘅當然係一陣要負責執行呢個計劃嘅我啦。
我唔單止要含住一啖充滿向彩萍一家嘅屎嘅泥土，而且仲要含住埋條蟲，呢件事嘅嘔心程度，我相信只會喺電視上面嘅「人在野Man vs wild」度見到。
「你唔好以為淨係核突咁簡單，」向彩萍應該留意到我嘅面容扭曲，所以再補充多句：「成件事最難嘅地方，係你要喺啱嘅時機吐出血蠱蟲。一旦吐得太遲，血蠱蟲可能就會一下滑入咗你嘅食道，咁樣，佢嘅毒性就會漫延喺你嘅身體入面，簡單嚟講就係會死。」
 


What？！
原來呢單嘢唔單止要我含蟲，仲有機會死？