《求婚嗰日，我發現我女朋友鍾意食屎》: 六十九
即使呢條蟲個樣極度樣衰，但係我為咗敏敏，絕對唔可以喺呢個關頭失手！
所以我即刻攞起罐蓋，直接「啪」一聲就將個罐完全封實。
我感受到個罐入面有一陣猛烈嘅搖動感覺，相信條血蠱蟲仲喺度掙扎緊，但係睇嚟都已經無用喇。
「恭喜你，你可以解蠱喇，就當係我報答你幫我解開咗少少心結啦。」向彩萍望住敏敏，微笑咁講咗一句，態度上同一開始嘅敵對感已經好唔同。
「多謝你肯幫我哋。」敏敏真誠咁捉住咗向彩萍嘅手，「我相信，你應該都預咗我會用埋呢條蟲去幫我爸爸解蠱？」
向彩萍聽到之後表面停頓咗一下，然後先淺笑一聲，答：「我最初嘅目的，係想要你爸爸感受一下被人討厭同歧視嘅感覺，點知到頭來，反而見證咗你媽媽對佢嘅愛。所以，我即使再用血蠱蟲都已經無意思喇。如果你想幫佢解蠱，隨便啦。」
講到呢度，八仙果師父都走埋嚟，講：「你之前每日都要為血蠱蟲餵血，某程度上都係每日提醒緊自己記起以前所有嘅傷痛。今日無咗血蠱蟲，希望你都可以重過新生。種善因，得善果，善哉善哉。」
向彩萍向八仙果師父微微點頭，以示謝意，同時轉頭望向我：「解蠱嘅方法，我頭先都已經講哂俾你聽，你只要照做，我相信蟲汁嘅份量，係足以解到你女朋友同埋丘志傑嘅蠱嘅。」
「嗯，多謝你。」我呢個時候已經掩飾唔到自己嘅開心，一手就將敏敏攬咗入懷抱裡面。
而敏敏亦都好高興咁攬住我，大家都對呢件糾纏咗好幾個月嘅事終於落幕而感到高興。
之後，向彩萍邀請咗我哋翻去佢嘅米線舖，話有啲嘢想要拜託我哋拎翻香港。
而當我哋翻去嘅時候，向彩萍嘅老公石養么仲喺度好努力咁打掃緊舖頭，佢一見八仙果師父同向彩萍兩個成件衫都係血，即刻嚇咗一跳。
向彩萍應該係為免石養么太大反應，所以就即刻講：「我不是告訴過你，一般客人來到，就提醒他們不要食太辣嗎？我的朋友剛剛就是食了太辣的湯底，太熱氣了，所以剛剛跟我聊天的時候，牙血就一直的噴，噴的我們滿臉跟滿身都是，你以後記得跟客人多提醒一聲啊！」
石養么聽咗，即刻搲哂頭咁自言自語講：「可是她剛才食的是清湯啊……」
向彩萍唔理佢，繼續講出自己嘅吩咐：「你去拿紙筆來，然後寫下我們用的湯底秘方給他們。」
石養么聽到之後，都無問點解，就即刻按住向彩萍嘅指示做，睇得出佢真係對向彩萍好好。
而喺石養么走開之後，向彩萍就望住我同敏敏講：「你哋都知我喺香港開咗間 『譚仔』啦，我近年翻嚟雲南都研發咗兩款湯底，我想你哋幫我拎俾喺香港嘅娟姐，當係多謝佢哋一直打點好間舖頭嘅小小心意啦。另外，我香港嘅屋企都放咗幾本關於我研究湯底嘅書，當年走嘅時候無諗過自己一去不返，所以一直都留咗喺屋企。如果你方便，就幫我拎埋啲書俾娟姐啦。」
「嗯，放心啦，我同娟姐好熟，交俾我啦。」我拍哂心口咁講。
「吓？點解你會同佢熟嘅？」向彩萍留意到我口快快講漏嘴嘅嘢。
「哦……因為我成日都去旺角食『譚仔』啫。」我尷尬一笑，以笑掩醜。
向彩萍半信半疑咁望實我，然後交低咗香港屋企地址同鎖匙俾我，而我今次當然好小心無再爆響口俾佢知道其實我一早已經入過佢屋企。
於是，等石養么將湯底寫好俾我哋之後，我哋一行四人就準備離開。
臨離開之前，敏敏將一張自己嘅社工卡片交咗俾向彩萍，同佢講：「雖然唔知你仲想唔想同我傾計，不過我知，你嘅嘢可能都唔太方便同呢度嘅人傾，只要你信得過我，歡迎你隨時搵我。」
向彩萍笑住點頭咁講：「係啊，石養么成個大鄉里咁，連香港都未去過，講香港嘅嘢佢邊度明吖？而家有你肯同我傾下都好，我將我電話俾你啦。」
當佢兩個交換好電話之後，敏敏笑住咁講咗一句：「太好啦，有你電話，如果將來你想同我爸爸聯絡都可以㗎！」
向彩萍有啲厭惡咁搖一搖頭講：「丘志傑？我即使可以接受唔再用蠱毒害佢，但唔代表我想見佢。我覺得，同佢都係老死不相逢會比較好。」
聽到向彩萍呢個回應，我忍唔住喺側邊插嘴問咗一句：「其實，我一直都想問你，你既然咁憎我外父，咁到底你當初寫信叫我外父嚟雲南嘅時候係帶住咩心情嘅呢？」
我之所以咁問，係因為我見向彩萍一直都好似好憎我外父咁，咁點解封信上面又要懶係友善咁邀請佢嚟雲南呢？
「信？咩信啊？」向彩萍嘅表情有啲疑惑，今次亦都係佢第二次對於「信」呢件事表示不解。
「你寫咗封信，邀請我外父外母嚟雲南，仲話要介紹埋你老公俾佢認識呢！」我喺側邊補充一句。
「我憎丘志傑憎到入骨，邊有可能會寫埋啲咁嘅嘢呢？」向彩萍反一反白眼咁答。
正當我想再追問落去嘅時候，敏敏細細力拉咗我衫袖一下，同我講咗句：「阿博，我見到出面有車到啦，我哋去幫手抬行李啦。」
我都仲未答佢，敏敏已經拉住我行開咗，然後細細聲咁講：「好明顯向彩萍當年寫封信俾我爸爸就係為咗引佢嚟然後對佢不利啦，而家你再問佢，佢邊好意思答呢？所以你唔好再追問佢啦，俾個下台階人啦。」
聽咗敏敏咁講，我就唯有算數唔再追問落去，而喺呢個時候，亦咁啱出現咗石養么幫我哋叫嘅的士，所以我都只有聽敏敏意見過去幫手。
於是，高醫生同敏敏就扶住八仙果師父上車，而石養么就幫大家搬行李上車，最後由我負責殿後執齊哂嘢。
「祝你哋一路順風。」向彩萍望住我哋上哂車之後，微笑住咁對敏敏講。
「嗯，保持聯絡。」敏敏睇落有啲唔捨得咁向住向彩萍揮手。
「再見，有空再來啊！」石養么因為完全唔知道我哋發生咗咩事，所以一直都好興奮熱心咁對我哋揮手講拜拜。
就喺呢個有啲微妙嘅氣氛之下，我哋架的士慢慢開出。
就係呢個時候，我聽到耳邊傳嚟「嚓」一聲，係手機影相嘅聲音。
我一望，原來係敏敏拎咗手機出嚟。
「我相信，爸爸見到呢個畫面都會覺得安樂啲。」
敏敏將手機遞俾我，相入面係向彩萍同石養么向我哋講緊拜拜嘅樣。
望住呢一張向彩萍有微笑嘅相，好難想像，一個鐘之前我哋仲喺度打生打死。
或者正如敏敏一直以嚟同我相處嘅時候都鼓勵我要分享，因為好多嘢其實攤出嚟講，就會發現比想像中容易處理好多。
之後喺的士上面，敏敏好放鬆咁挨住我，無幾耐就瞓著咗。
我明白，呢一刻嘅佢應該係因為件事有個了斷，所以終於可以放心瞓翻一覺。
但係，我望住窗外嘅風景不斷倒轉，心裡面唔知點解總係有啲心緒不靈。
可能，係因為我總係覺得，向彩萍最後否認自己有寫信呢件事好奇怪。
我唔明白，點解向彩萍要否定呢件事。
以我所見嘅向彩萍，佢都算係一個敢作敢為嘅女人，佢唔似係會做咗但係唔敢認嘅人。
而且，我哋每個人都知道佢憎死丘志傑，一開始佢都因為我哋同丘志傑有關而對我哋出手，咁所以即使佢要寫信設陷阱俾我外父，呢件事講出嚟亦都唔會令我哋特別驚訝，或者對佢個人有咩特別嘅壞感覺。
既然係咁，到底點解佢仲要隱瞞我哋呢？
抑或，其實呢件事依然另有內情呢？
呢個時候，雖然車窗外山明水秀，但係我心裡面嘅情緒，比起一開始嚟到嘅時候反而更加複雜。