《求婚嗰日，我發現我女朋友鍾意食屎》: 七十
經過轉車轉機再轉車之後，我同敏敏終於翻到屋企喇。
敏敏打咗翻屋企報平安，亦難得聽日係星期日，所以順便約埋佢爸爸媽媽同八仙果師父夫婦聽晚食飯，等大家可以一齊解蠱。
呢幾日嘅雲南之旅可以話係死過翻生幾次，我同敏敏都已經身心俱疲。
所以一翻到屋企，極速沖咗個涼之後，就忍唔住直接一嘢攤咗上床度。
「嘩，真係龍床不及狗竇，雲南間五星級酒店都唔夠呢張床好瞓啊！」我好興奮咁攬實咗自己個枕頭係咁索。
「咁係因為你嗰晚無咩點瞓啫！」敏敏笑咗一笑，又令我諗翻起嗰一晚嘅惡鬥。
「不過呢，阿博，其實我真係好多謝你願意為我付出咗咁多。」敏敏從後攬住咗我，我感受到佢身體傳嚟嘅溫暖感。
「其實，都無咩嘢嘅，唔係因為你，我又邊有機會去『譚仔』打工、然後又可以學下驅蟲、仲要去埋雲南旅行添。」我好靈活咁轉個身，望翻向敏敏。
「傻瓜，唔洗扮無嘢啦，我知呢幾個月嚟你一直都好擔心我。」敏敏講到呢度，雙眼已經有啲紅，「你由同我一齊嘅時候就已經係咁，以為我唔知咩？你學廚嘅時候，一開始搵唔到錢又唔想我擔心，成日都爭住同我出街嘅時候做俾錢嘅人；當我做社工做得辛苦，就算你啱啱翻完酒店早更，你都會挨夜聽我分享，從來都唔怨我。所以我知你份人就係咁，成日唔想人擔心，但係偏偏又鍾意擔心埋人哋嗰份。」
「得啦，知你了解我喇。誰似你這般欣賞我 誰也說不上你一般清楚我～」我見敏敏講到就快喊，即刻唱首歌嚟氹下佢。
我嘅歌聲雖然唔好聽，但係亦都有一種特別嘅魔力可以難聽到令人笑出聲。
所以我一唱歌，果然成功令敏敏即刻笑咗。
「聽晚呢，我嘅蠱毒就會解開，而到時候爸爸媽媽、八仙果師父又會在場……」敏敏講到呢度，突然有啲吞吞吐吐。
我一下子就明白咗佢嘅意思，忍唔住大嗌咗出嚟：「你係咪暗示緊我聽晚求婚？」
「喂呀！夜已深啊，細聲啲啦。」敏敏輕力拍咗我一下，但係從夜晚嘅微光之中都可以睇得出佢呢一刻表情係怕羞嘅。
「明白，收到，聽晚我會識做㗎啦！」我望住敏敏呢個咁可愛嘅女朋友，忍唔住將佢一下攬咗埋身，仲要攬到實一實，令佢不斷笑住咁大叫「救命」。
喺呢一份幸福嘅氛圍入面，我哋兩個最後都係甜笑住咁瞓著咗，同時喺心入面期待將蠱毒解開嘅第二日。
或者喺雲南嘅日子真係太chur，第二日一瞓醒，已經係下晝十二點。
呢個時候，我同敏敏就商量好今日各自嘅行程，佢就會負責買定餸今晚煮飯俾佢父母同埋八仙果師父夫婦食，而我就會出發先上向彩萍屋企拎書，然後去旺角「譚仔」，將向彩萍交托俾我嘅嘢拎俾娟姐。
於是我哋定好行程就分道揚鑣，約定今晚去外父外母屋企再見。
第一站，我去到向彩萍香港嘅舊居。
同上次唔同，今次我光明正大咁用向彩萍俾我嘅鑰匙將門打開，然後堂堂正正咁走咗入去。
由於有咗上次經驗，所以今次我走入向彩萍間房再見到牆上面大大個「蠱」字，已經無之前咁驚，只不過，一樣係有嘔心嘅感覺。
所以，我快快手走到去書櫃前面，好快就搵到要拎嘅書，然後就打算急急腳走。
就喺呢個時候，我留意到床上面放咗嘅一樣嘢。
呢樣嘢，就係上次我哋曾經睇過嘅信。
亦都係向彩萍離奇地一直都否認有寫過嘅信。
我忍唔住拎起咗呢封信，想喺佢身上再搵出一啲可能我之前睇漏咗嘅線索，話唔定，就可以解答到我內心嘅疑問。
「與君一別匆匆十餘載，舊情早已一去不復再。
昔日卿投以斷腸之痛，我報之以蠱毒。
今日既然各有依歸，不妨一笑泯恩仇。
見此信時，我已返鄉雲南。
盼君携眷而來一聚，我亦可引見我夫君，豈不是美事一樁？」
信上面嘅文字，無論橫睇掂睇都無咩可疑之處，唯一值得留意嘅係，其實向彩萍手字都幾唔錯。
望住呢封信，我不期然係度諗，到底會唔會敏敏嘅講法係啱嘅，而我真係諗得太多呢？
事實上，經過我喺雲南見證敏敏同向彩萍傾計之後，我都有自我反省到，其實有時候我哋一般人睇人，都好容易俾自己嘅感受影響咗。
可能因為我內心一直有「向彩萍係壞人」呢個印象，所以即使只係少少事，但係都會無限想像FF落去。
咁講真，話哂呢封信都係五年前寫落嘅，當時即將離開香港嘅向彩萍，又點同而家向彩萍嘅心境一樣呢？
咁所以，向彩萍而家唔想承認當年自己寫過呢啲嘢或者都係正常嘅。
我好唔容易咁終於說服咗自己，決定唔好再諗咁多。
於是，我放低封信，拎起啲書出發去「譚仔」。
講到呢度，突然想問大家一個問題。
唔知大家有冇試過俾一件事困擾咗好耐，而當你決定唔諗嘅時候，大腦就喺你放鬆嗰一刻好似打通咗任督二脈咁，然後一瞬間你就諗通哂之前Kick住嘅位。
簡單嚟講，有啲嘢你唔搵，佢就會自己走翻出嚟，無錯，就係咁乸出奇。
如果你有經歷過，你就會明白我而家呢一刻嘅感受。
因為就喺我準備行出房門嘅一刻，突然間，我個腦好似有一道電光閃過。
而我把握到機會，捉住咗呢一剎那間閃過嘅靈感。
呢一刻嘅靈感，係嚟自我頭先嘅自我說服。
「五年前」，向彩萍呢一封信，理論上係佢五年前離開香港前寫落嘅。
但係信上面其中一句咁寫：「盼君携眷而來一聚，我亦可引見我夫君。」
根據向彩萍所講，直到三年前，佢先下定決心想同石養么結婚。
如果係咁，五年前向彩萍又點會有可能喺信上面寫自己有「夫君」呢？
一諗到呢度，我本身想放低封信嘅手即刻將封信捉翻實。
無諗過，原來疑點一直都已經近在眼前，只係我從來都無留意到。