《求婚嗰日，我發現我女朋友鍾意食屎》: 七十一

既然呢個疑點合理，咁跟住落嚟，我要考慮嘅可能性就多咗好多。
 
第一個可能性，會唔會呢封信其實唔係向彩萍喺五年前寫落呢？如果係三年前寫落，咁件事就合理咗。
但係，根據佢自己嘅自述，佢喺呢五年嚟都無翻過香港。
可能佢刻意隱瞞佢翻過香港呢件事？
如果係咁，背後又有咩目的呢？
 
但係如果要認真諗，呢個可能性其實唔大。
一來向彩萍講佢嘅歷史嘅時候，佢係俾八仙果師父用「八仙法」控制咗，照計無可能會講到大話。
所以，向彩萍三年前曾經翻過香港呢一個可能性基本上係無可能嘅。


 
而第二個可能性，係向彩萍五年前故意講大話，係信上面寫自己有夫君，目的係令丘志傑降低戒心，然後願意同佢見面。
感覺上，呢個可能性比較大。
但係又諗深一層，點解向彩萍會覺得寫咗「夫君」呢個理由就足以令丘志傑遠赴雲南呢？
而且，一旦丘志傑真係去咗雲南，但係石養么根本唔知情，佢亦唔識配合向彩萍，咁向彩萍咪會穿煲？
而最大嘅問題係，向彩萍如果想同丘志傑見面，點解要搞咁大壇嘢呢？
當時嘅佢都未離開香港，佢要見面，其實直接過去搵丘志傑咪得囉？
講下講下，似乎連第二個可能性嘅機會都唔大。
 
望住呢一封充滿咗疑點嘅信，我將佢小心收好咗。


因為我有一種直覺，一日未解決呢封信所帶嚟嘅疑點，呢件事都唔會真正咁結束。
 
雖然疑團並未解開，但係行程都需要繼續。
所以轉眼之間，我就到咗旺角嘅「譚仔」。
 
「嘩！博仔，『近』好翻嚟『嘆禾』哋啊？食唔食碗mi線啊？」
我一踏入「譚仔」，有一個姐姐即刻四萬咁口同我打招呼。
我一望，原來就係之前中咗毒入院嘅翠姐。
我一見佢而家生猛翻哂，個心都舒服翻好多，即刻笑住同佢打招呼同關心下佢。
傾下傾下，正當一吹水就吹唔斷氣嘅翠姐又準備同我分享佢唐朝嘅祖宗曾經都中過毒大難不死嘅故事，娟姐就出現咗喺樓面。


佢見到我，似乎都有啲意外，而我就向佢揮一揮手，表示有啲嘢想同佢講。
 
「呢一張紙，係向彩萍托我拎俾你嘅。」我將寫咗湯底嘅信拎俾娟姐睇。
「呢兩款湯底，用料確實好有萍姐嘅風格，我相信一定可以大賣。」娟姐打開封信，望住紙上面嘅內，雙眼首先發光，但係好快又變得眼濕濕，「係呢，萍姐佢而家點啊？」
我分享咗向彩萍而家喺家鄉落地生根，又開翻一間小餐館嘅事俾娟姐聽，娟姐聽到向彩萍而家生活安好，都露出咗安慰嘅笑容。
而我心入面記掛住要解開疑團嘅事，加上見事情都交代得七七八八，於是就打算離開。
 
「你『蛋』一陣，唔好走住。」娟姐叫一叫停咗我，然後入咗員工室。
隔咗無耐佢再走翻出嚟，手上面拎住咗一張紙，然後對我講：「之前你喺度翻工嘅時候，我見有一兩次廚房太忙，你入咗去幫手而且煮嘢食嘅手勢仲好過我哋班姐姐，我估你應該都係揸慣鑊鏟嘅人。呢張紙係佢嗰兩款湯底嘅影印，你鍾意都可以攞翻屋企煮下嘅，當係多謝你從雲南拎咗萍姐嘅湯底俾我哋啦。」
娟姐雖然平日為人嚴格，估唔到份人原來都幾均真。
我講咗聲「多謝」，就將呢張紙接咗過嚟，順手望下上面嘅內容。
的而且確，兩款湯底都好有雲南風味，加上喺香港從來都未見過，睇嚟向彩萍喺研發湯底方面真係幾有天份。
我諗到敏敏本身都幾鍾意食辣，如果可以喺屋企煮到「譚仔」嘅味道俾佢食，佢應該都會幾開心，所以我就滿心歡喜咁收好咗張湯底。
 
喺一班姐姐落力咁挽留之下，我就留低咗喺「譚仔」度食咗個下午茶，再同大家吹下水，氹下啲姐姐開心，不知不覺就到咗日落嘅時間。


眼見時間都差唔多，我就起程離開，準備去世伯外母屋企食飯。
出到「譚仔」，我好快就上到小巴。
話哂車程都有成二十分鐘，我個心好自然又想研究下嗰封奇怪嘅信。
於是，我就從背囊度摸下摸下拎咗封紙出嚟。
點知我一打開嚟睇，先發現自己原來拎錯咗向彩萍嗰張湯底紙出嚟。
於是我喺心入面笑一笑自己，然後又再伸手入袋摸過，今次就真係拎啱咗喇。
 
再次打開呢封信，望住嗰啲我就快可以背得出嘅內容，唔知點解，我今次有一啲唔同嘅感覺。
信入面，有一份之前一直都無嘅熟悉感。
好奇怪，明明今次我都唔係第一次睇呢封信，點解反而今次會覺得呢封信有呢種咁特別嘅感覺呢？