《求婚嗰日，我發現我女朋友鍾意食屎》: 七十三

呢一刻嘅我，個腦好混亂，因為同時實在有太多嘢需要我去諗。
但係就喺呢個時候，我感受到自己部手機喺度震緊。
打嚟嘅人，係敏敏。
 
「喂？阿博，你去到邊啊？八師果師父佢哋都到咗喇，仲差你一個咋。」
「哦……我坐緊小巴啦，而家翻緊嚟啦。」
「咁就好啦，我哋就快煮好飯啦，再唔返嚟呢，一陣你就知味道啊！」
「敏敏，其實呢我發現咗……」我講咗半句就停咗口。
「做咩事啊？」敏敏聽到，追問咗一句。
 


我本身想開口講俾佢聽關於我發現石養么嘅奇怪，但係我再諗一諗，一來呢件事短時間內都未有結果，講出嚟都無咩用，二來今晚大家都咁開心，無謂增添敏敏嘅擔心，所以我都係決定唔好同敏敏講住。
 
「哦……我發現咗個小巴司機有地中海咋嘛！」我笑一笑咁講。
「無聊！人哋地中海關你咩事啫，快啲翻嚟食飯啦！」敏敏笑住鬧咗我一句就收咗線。
 
喺呢程車上面，石養么嘅問題一直都喺我心裡揮之不去。
我進一步諗到嘅係，向彩萍當日曾經講過，石養么未曾嚟過香港。
但係而家種種證據嘅指向，都係石養么嚟過香港，甚至設下咗一連串嘅佈局。
如果係咁，好大可能石養么嚟香港呢件事係連向彩萍都唔知。
正所謂知人口面不知心，又有邊個估得到笑容滿面嘅石養么，背後竟然暗中做咗咁多小動作？


 
我帶住百思不得其解嘅疑惑，終於去到敏敏屋企。
入門口之前，我即刻谷翻個標準嘅笑容出嚟，以防敏敏發現我有咩唔同。
點知開門嘅人竟然係高醫生，佢一見到我咁嘅樣就即刻木口木面咁問我：「你係咪面癱啊？洗唔洗開啲藥俾你？」
我忍唔住反咗佢一個白眼，然後就入咗屋。
 
屋入面，八仙果師父正喺度同世伯伯母傾緊計。
「嗱，你門口呢個玄關位無乜擺設，入門空盪盪，唔太吉利喎，遲下我拎盤桔俾你擺喺度沖喜下啦，收翻你半價。」八仙果師父一邊指指點點，世伯伯母一邊喺咁點頭。
我直接走入廚房，就見到煮餸煮到滿頭大汗嘅敏敏。
「唔怪得八仙果師父今晚嚟啦，原來又係嚟做Sales。」我笑住講，從後攬住咗敏敏。


「你唔好以為講笑就得啊！咁遲先翻到嚟！預咗你幫手煮嘢食㗎嘛！係咪又掛住喺『譚仔』溝姐姐？」敏敏谷起塊面，扮咗一個好可愛嘅嬲樣。
「係啊，為咗我哋嘅將來，我不惜出賣肉體。頭先已經有幾個姐姐話要包養我，我好快要學定跳茶舞㗎啦。」我笑住咁搓下敏敏塊面。
「好啦，咁喺你學茶舞之前，幫我拎啲餸出去枱面先啦鴨王。」敏敏拍咗我一下，順手遞咗碟餸俾我。
 
過咗一陣，所有飯餸都已經擺好，而大家亦都埋位準備食飯。
作為主人家加一家之主嘅世伯企咗喺身，拎起咗紅酒杯向大家講：「一個人犯嘅錯，的確可以嚴重到影響一生，甚至影響自己屋企人。好多謝阿囡、阿博、仲有八仙果師父同埋你先生嘅幫助，令我今次有機會終於可以唔洗再受食屎嘅折磨，亦都令我嘅乖囡可以重過新生。喺呢度，我丘志傑敬大家一杯。」
聽到世伯嘅說話，大家都舉高咗酒杯，然後飲咗一啖紅酒。
「丘先生你言重喇，助人學善係我呢啲學道之人必須做嘅，我都祝願大家過埋今日之後可以重獲新生，之後多種善因，多得善果。」八仙果師父微微一笑，再次同大家舉杯助慶。
 
做完啲客套嘢之後，大家就開始晚餐。
自從兩個幾月前開始知道敏敏有食屎呢個怪病之後，我同敏敏好似好耐都無好似今日咁輕鬆過。
或者係因為大家知道，食完呢餐飯之後，大家就會處理埋條血蠱蟲同埋一齊解蠱，代表成件事正式完結，所以心情都特別輕鬆。
喺呢餐飯入面，大家都好開心咁傾計，八仙果師父又分享下啲神怪嘢，高醫生有時又會講下佢啲恐怖醫學。
我同敏敏又講下去雲南嘅驚險事同埋向彩萍嘅後續發展，當中當然都有提起石養么，只不過我就無再刻意講到關於佢嘅疑點，以免令成件事複雜咗。
之後，世伯伯母又分享下啲往事，講下佢哋呢段婚姻嘅起起跌跌。


總之，成餐飯嘅氣氛既有深情認真，亦都有熱鬧開心。
 
而食完飯之後，大家執好哂張枱，八仙果師父亦都將之前捉到嘅血蠱蟲放咗上枱面。
我哋六個人都望住裝咗血蠱蟲嘅八仙果罐，大家都知道，我哋最期待嘅畫面終於要嚟啦！
無錯，終於都嚟到要解蠱嘅時候喇。