《求婚嗰日，我發現我女朋友鍾意食屎》: 七十四
伯母拎咗一部搾汁機出嚟，然後打開咗個蓋。
八仙果師父見時機一到，即刻打開八仙果罐嘅蓋，直接將條血蠱蟲倒咗出嚟。
鮮紅色嘅血蠱蟲一入搾汁機，自以為重獲自由，即刻好開心喺機入面打圈，無諗過其實呢一刻已經係死到臨頭。
八仙果師父順勢閂咗搾汁機嘅蓋，然後望一望我同敏敏。
我同敏敏會意，一齊走近搾汁機，然後伸手一齊㩒咗落去個「Start」制嗰度。
「喳」一聲，搾汁機開始極速攪動，本身仲好悠閒喺度爬下爬下嘅血蠱蟲轉眼就變咗一堆血漿，而成個客廳亦都因為佢而充滿咗鮮血嘅味道。
八仙果師父好小心咁將呢兜血汁（漿？）倒咗入一個碗仔度，放咗喺我同伯母側邊。
而呢個時候，敏敏同世伯兩個都已經坐好，準備開始呢一個解蠱儀式。
八仙果師父望一望錶，然後講：「解蠱嘅最佳時辰已到，開始啦。」
於是，我同伯母一齊點頭，開始行動。
我伸出手指入碗，用手指公痴咗一啲血汁，然後慢慢印咗落敏敏個額頭度。
當我好認真用血汁畫緊一條橫線嘅時候，敏敏突然問咗我一句：「你做緊咩啊？」
「解蠱囉！」我反而奇怪敏敏做咩咁問。
「乜解蠱唔係將血蠱蟲嘅汁搽上手度，然後俾我聞咩？」敏敏指一指隔離嘅伯母，伯母咁啱就係好小心咁喺手背上面搽緊血汁。
呢個時候，我先恍然大悟咁叫咗一聲：「Oh sorry，我記錯咗《獅子王》啊！唔好意思！」
於是我即刻從「Nants ingonyama bagithi baba」嘅歌詞度跳翻出嚟，改為將血汁搽上手背，然後放咗喺敏敏嘅口前，順便問咗八仙果師父一句：「點解要聞啲汁唔係用個鼻而係用個口呢？」
「因為蠱蟲多數都係混雜喺食物入面入口，所以要驅蠱都要由口作為起點。」八仙果師父理所當然咁答。
「好似……無咩分別咋喎。」敏敏聞完，再望向另一邊嘅世伯度，兩個人睇落都無咩大分別，亦唔見有蟲從佢哋身上爬出嚟。
點知話口未完，敏敏同世伯兩個突然全身劇震，震到就好似發羊吊一樣。
「出事啦！」我嚇咗一跳，即刻望向八仙果師父。
「相信師父，唔驚！」八仙果師父冷靜咁搖一搖手，示意我哋靜觀其變。
敏敏同世伯嘅劇震完全無停過，震震下仲反埋白眼，而且喉嚨仲發出咗啲「咔咔」聲，同《屍殺列車》入面啲喪屍都有幾分相似。
佢哋震咗十秒咗左右，然後就不約而同咁同時跪低咗喺地下。
八仙果師父一見呢個情況，即刻將兩個事先預備好嘅膠兜放咗喺佢哋面前。
一時間，敏敏同世伯同時發出近似嘔吐嘅聲音。
而膠兜裡面，就出現咗一條全身血紅色，同我哋捉翻嚟嗰條血蠱蟲一模一樣嘅蟲。
八仙果師父手快執起兩個膠兜，隨手倒咗兩條蟲入去搾汁機度，「喳」一聲，搾汁機度又多咗一堆血汁。
我同伯母各自將敏敏同世伯扶起，喺嘔完血蠱蟲之後，佢兩個嘅面色已經回復正常，亦都無再震嚟震去。
「係咪，咁就得㗎啦？」敏敏坐喺櫈上面，有啲攰咁望向八仙果師父問。
「攞塊朱古力試下咪知囉。」八仙果師父笑咗一笑，分別將一塊朱古力拋向敏敏同世伯，順手再補充多句：「呢塊係我最新出品嘅比利時朱古力味八仙果，有用真朱古力整㗎！一陣收翻大家試食價，十蚊粒。」
敏敏接住塊朱古力，望住塊朱古力嘅包裝紙，似乎有啲緊張。
「打開佢啦。」我用溫柔嘅聲音鼓勵佢，而敏敏都下定決心，慢慢將包裝紙打開。
轉眼間，佢已經拎住咗粒朱古力，而我亦都聞到朱古力味，但係，佢仲未有明顯嘅大反應。
於是，敏敏開始嘗試將粒朱古力慢慢拎近自己。
我見佢隻手都有少少震，可以睇得出佢呢刻嘅心情又緊張又期待。
粒朱古力去到敏敏口邊，隔咗一秒，敏敏吸咗一啖氣之後就將粒朱古力一下拋咗入口。
但係佢咬咗唔夠兩啖，突然就流咗兩行眼淚出嚟。
「做咩事啊？有唔舒服啊？」我好緊張咁捉住佢膊頭，上下左右望佢到底有咩唔妥。
敏敏搖一搖頭，喊住咁露出咗一個笑容講：「我覺得，粒朱古力好好味啊。」
佢講完，即刻撲埋嚟攬實咗我，而我亦都好感動咁講：「恭喜你，你終於可以食翻朱古力，你無事啦！」
雖然，我內心覺得一粒朱古力味嘅八仙果好味極有限。
只不過，作為一個五歲開始就無食過朱古力嘅敏敏嚟講，呢一粒朱古力嘅意義，絕對唔止好唔好味咁簡單。
所以佢呢一刻會食得咁感動，我係絕對可以明白嘅。
而喺我哋旁邊，世伯同伯母亦都好溫馨咁攬住咗對方，睇嚟世伯嘅蠱毒亦都一樣清哂啦。
「叮噹」！
就喺客廳一片溫馨大團圓氣氛嘅狀態之下，敏敏屋企嘅門鐘突然響起。
「咁夜唔知係邊個嚟呢？」敏敏一邊講，一邊就走咗去開門。
門一打開，因為我坐嘅角度啱啱好望唔到門外，所以並唔知道係邊個嚟咗。
但係我見到敏敏露出咗一個非常驚喜嘅表情，而且仲講咗句：「點解你會嚟咗嘅？入嚟吖！」
似乎，嚟嘅人係一個意想不到嘅客人。
下一秒，呢個人就走咗入屋，而敏敏同時就向住世伯伯母介紹咁講：「爹哋媽咪，呢個就係我哋頭先提過，向彩萍嘅老公，石養么！」
我一聽到呢句，成個人即刻呆咗。
但係好快，我已經見到石養么已經走咗入屋，仲用佢一貫嘅單純樂觀、充滿鄉土味嘅笑容向住大家揮手。
而喺呢個客廳之中，唯獨我一個知道，佢呢個人畜無害嘅笑容背後，或者有一個立心不良嘅來意。