《求婚嗰日，我發現我女朋友鍾意食屎》: 八十

石養么同向彩萍嘅故事，要從佢哋細個開始講起。
 
「沒爸爸，羞羞臉！沒爸爸，真可憐！」
一班六、七歲、只係著住一條短褲就通山跑嘅死𡃁仔，今日又一如既往咁去搵向家兩姊妹麻煩。
六歲嘅向彩萍仲有妹妹俾幾個男仔包圍住取笑，妹妹早就已經驚到淨係識喊，唯獨係向財萍一個強忍淚水，挺身擋住喺妹妹嘅前面保護佢哋。
 
「阿萍！阿萍！」一把響亮嘅聲音從遠處傳嚟。
幾個死𡃁仔一聽到呢把聲，即刻面色一變，由本身好招積變到好驚青。
不出五秒，一個黑黑實實、比起班死𡃁仔高一個頭嘅男仔已經跑到嚟。
呢個男仔，就係九歲嘅石養么。


 
「你們又在欺負阿萍嗎？」石養么大喝一聲，已經令到班𡃁仔腳都軟埋，連本身想逃走嘅動力都無埋。
石養么衝到埋嚟，轟咗每個𡃁仔一拳，再踢咗每人屁股一腳，令到佢哋趴哂喺地下喊住叫痛。
「你這大黑牛，不也是在欺負我們嗎？」其中一個死淨把口嘅𡃁仔講。
「我就叫做替天行道。還有，阿萍是我指腹為婚的妻子，我保護她就是天經地義的事情。」石養么挺起胸膛，理直氣壯咁講。
一班死𡃁仔見勢色唔對，於是轉眼就果斷咁撤退哂。
 
「你沒事吧？」石養么見班𡃁仔走咗，即刻轉身關心一下向彩萍。
「我沒事。但我都說了幾遍，不要總是把『指腹為婚』掛在口邊好嗎？」得救嘅向彩萍一邊安慰妹妹，一邊向石養么反白眼。
「我剛才又不是刻意對你說，我是對那些孩子說啦，我怕他們不知道嘛！」石養么傻笑住咁搲頭講。


「你早也說晚也說，這村子裡有誰不知道呢？你再說下去，連整個雲南都要知道了！」向彩萍扠住腰瞪大對眼向石養么講。
「這……也不錯啊，那就沒人敢欺負你啦！」石養么又傻笑咗一下。
睇住大自己三歲，但係依然傻下傻下嘅石養么，向彩萍都俾佢嘅傻氣感染到，忍唔住笑咗出聲。
 
睇到向彩萍笑咗，石養么亦都跟住開心埋一份。
於是，向彩萍拖住妹妹，石養么就跟住向彩萍，三個小朋友又開始行過田間，走向翻屋企嘅路。
「阿萍，我上星期很認真的想了一下，以後你再遇上什麼問題的話，你可以唱起山歌，那麼我一聽到就可以馬上趕來幫你啊。」石養么行行下，突然又講。
「什麼山歌？」向彩萍聽到，一臉錯愕。
「么哥哥，么哥哥，翻山越嶺來救我；么哥哥，么哥哥，翻山越嶺來救我。」石養么用山歌腔唱出佢嘅大作，一時間農田入面雞飛狗走，可見呢首歌嘅破壞力相當驚人。
「如果我來得及唱這首歌，我倒不如直接叫救命吧。」向彩萍皺哂眉頭嘅表情，已經反映到佢對呢首歌嘅厭惡程度。


「這不一樣，我這歌聽起來比較有氣勢吧，至少可以把敵人嚇唬住啊！」石養么一對濃眉大眼撐到好大，似乎想增加自己嘅說服力。
「你這歌比較像是用『難聽』把敵人嚇跑吧……」向彩萍喃喃自語。
「無論如何，你快跟我學一次這首歌吧，我用了一星期來創作的！」石養么又準備大展歌喉。
「我才不要！」向彩萍一手拉住妹妹起跑，而石養么就即刻從後跟住。
 
三個小朋友，就咁喺田間無憂無慮咁跑下笑下，最後一齊攰到瞓哂喺草地上面。
刻意瞓喺向彩萍身邊嘅石養么每日都可以同向彩萍一齊玩嘅生活真係好開心，而望住身邊向彩萍笑得可愛嘅表情更加令佢感到好滿足。
如果爸爸媽媽所講嘅「指腹為婚，就是一輩子都要把向彩萍照顧好」就係咁嘅意思，石養么係絕對願意嘅。
 
但係正所謂，年少無知。
呢一刻嘅石養么仲未知道，佢長大之後嘅人生，確實繼續會以氹向彩萍展露笑顏為目標。
但係可惜嘅係，長大之後嘅笑容，實在比起童年時候嘅笑容難得太多。