《求婚嗰日，我發現我女朋友鍾意食屎》: 九十

向彩萍之前一直都沉醉喺從前嘅傷痕之中，好執著自己已經失去咗「愛情」嘅感覺。
但係聽到佢而家呢一番說話，好明顯佢已經唔再執著於咩係「愛」，反而多咗一種聽從自己內心嘅感覺。
 
「真愛是任何形狀」。
確實，無論係我同敏敏互相扶持嘅愛、世伯伯母原諒與成長嘅愛、八仙果師父同高醫生道不同但一樣可以相愛相親嘅愛、向彩萍糾纏不清嘅愛、石養么恆久忍耐默默付出嘅愛，所有形式、所有形狀嘅愛，都係愛。
即使而家嚟到連向彩萍自己都唔清楚到底對於石養么嘅係咪愛，其實，愛嘅定義又係咪真係咁重要呢？
或者，最重要，其實係「心意」。
向彩萍一直以嚟都俾恨意同失落感填滿自己嘅人生，從來都無機會去聽清楚自己嘅心意。
但係直到佢放棄血蠱蟲、放棄報仇，佢反而有機會俾自己靜翻落嚟去聆聽自己嘅心到底最需要啲咩。
所以，當向彩萍能夠講出佢希望自己可以同石養么共度餘生嘅心意，或者，呢份肯定已經比起「係唔係愛」呢個問題更加重要。


 
石養么呢一刻握實咗部手機，眼淚不斷滴落部手機度，連一句嘢都講唔出口，或者呢個情景就係成語所講嘅「泣不成聲」。
而喺呢個時候，敏敏從地下爬起咗，走到去石養么面前，溫柔咁講：「我明白，你心入面或多或少都會恨我爸爸以前糟蹋咗你最愛嘅人，令佢受咗咁多年苦，同時亦都令你付出嘅愛好似徒勞無功咁。但係，去為人哋增加傷痕，唔代表你自己嘅傷痕可以痊癒。而家，喺你眼前就有一個可以真正幫到你，幫到向彩萍嘅痊癒機會。選擇，就喺你手上。」
敏敏講完，指一指部手機。
 
石養么抬起咗頭，一手抹走臉上所有嘅眼淚。
佢呼出咗一口氣，然後慢慢將手機拎近嘴邊。
「阿萍，我教唔到你，不過，我哋可以一齊學習點去療傷。」
聽到呢句話，我見到敏敏都感動到流出咗眼淚。
 


向彩萍同石養么，兩個都係心靈受傷嘅人。
佢哋都各自默默用過好多唔同方法，希望可以醫到自己內心嘅傷。
向彩萍嘗試逃避同復仇，但係偏偏心入面依然擺脫唔到受傷嘅陰影；石養么試過繼續不斷咁付出同說服自己唔介意得唔到向彩萍嘅愛，但其實內心難免有填補唔到嘅失望同恨意。
但係直到而家，佢哋先真正搵到令大家都可以得到治療嘅方法。
方法就係，明白對方嘅故事，了解對方嘅傷處，最後，一齊療傷。
 
就喺呢個咁感動嘅時候，客廳之中突然出現一陣「砵砵砵砵砵砵砵砵」嘅聲音。
同時間，一股惡臭亦都隨之而來。
正當我以為有生化襲擊嘅時候，我望到世伯企咗起身。
但係佢今次雙眼有神，同頭先俾人用「共生蠱」控制嘅迷糊樣完全唔同。


 
「得咗喇！果然一幫佢排走體內嘅毒氣，佢就唔俾人控制到，都話科學有用㗎啦。」高醫生喺呢個時候彈咗起身，聽佢解釋我先明白原來真係靠住頭先同世伯打茄輪，世伯已經脫離咗石養么嘅控制。
 
即使係咁，呢個時候嘅石養么已經無心情再去理世伯。
又或者話，佢已經再無需要報仇嘅理由。
 
手機嘅另一邊，傳出咗向彩萍一聲笑聲。
「嗯，咁今次，就到我同你講，我等你。」
 
呢一聲來自向彩萍嘅「我等你」，就好似呼應緊當年石養么喺向彩萍去香港之前嘅嗰一聲「我等你」一樣。
只不過，兩句「我等你」其實又有唔同。
當年，石養么嘅一句「我等你」，係無了期、單向嘅等；而今日向彩萍嘅「我等你」，卻係大家都帶住渴望重逢嘅心而出現嘅等待。
呢一句語帶雙關嘅「我等你」，再加上世伯放到好似燒炮杖一樣又頻密又響嘅屁聲，似乎為今晚呢一場大龍鳳畫上咗一個幾特別嘅句號。
 
喺石養么離開之前，佢將手機還翻俾敏敏。


敏敏拎翻手機之後，望咗一眼，然後將佢放咗喺世伯手上。
世伯望到部手機，再望到敏敏意義深遠嘅笑容，加上伯母喺佢身邊點一點頭，世伯都明白大家嘅意思。
佢拎起咗部手機，好小心咁叫咗一聲：「阿萍。」
「傑？」向彩萍應咗一聲。
「嗯。」世伯吐出咗一口氣，「當年不辭而別，真係好對唔住。當年嘅我，根本就未識得處理關係，所以先會造成對你同埋阿芳嘅傷害。我呢句『對唔住』，真係爭咗你好多年。」
「算啦，都過咗去喇。」向彩萍呢句答得風淡雲輕，但無人知道佢呢一刻嘅內心又係咪真係咁心如止水。
「祝你，之後幸福平安。」世伯講完呢句說話之後，五官都好似放鬆咗。
「生活安好。」向彩萍答完呢一句之後，通話就斷咗線。
或者，呢一段對話喺無「再見」嘅情況之下完結，對雙方都係最好嗁結局。
 
而聽完呢一段對話之後，我哋發現石養么都已經不辭而別咗。
經過咗呢一晚，成個客廳都亂七八糟，世伯仍然繼續不斷咁放緊屁，而且八仙果師父亦都仲未醒翻。
一切雖然好亂，但係我同敏敏望住呢一片狼藉，唔知點解，心入面反而係感受到近幾個月以嚟最平安嘅感覺。