【校園】【愛情】【0甜】【日常】能讓我重遇你多一次嗎..: 第一章

「喂，起身啦」一把女仔聲喺耳邊大聲叫。
「再唔起身就遲到啦！」我即刻被佢嚇醒，
跟住心諗：「你係咪痴線架咁大聲，死人都俾你叫返起身。」
我抹一抹隻眼，講：「得啦得啦，依家咪起身囉。」
我叫潘俊軒，今年F.5。
啱啱啱叫得咁鬼大聲嘅係我個妹，佢叫潘芷晴,今年F.3。 
平時我都會叫佢阿晴，晴姐或者衰妹
由於屋企人長期都要出外公幹，所以通常屋企都係得我同個妹。
雖然佢好似好惡咁，但係由細到大，佢都好驚自己一個，
所以通常我同佢除咗返學，大部分都係喺屋企過。


我睇一睇部手機，跟住我睇一睇個日期。
仆街，我咪講咗今日放假喎！
我對住佢西一西面，之後同佢講：「小姐，我琴日咪講過今日放假囉，下次可唔可以記住！」
佢好得戚咁話：「你唔起身整早餐比我食，咁我咪叫到你冇得瞓覺囉，哼哼」
我好無奈咁起身，去廚房整咗個三文治同咖啡俾佢,
之後叫佢：「快啲食啦，衰妹，唔係話趕時間咩。」
佢甜笑咁講：「知道啦，嘿嘿」
雖然有時候真係頂唔順佢，不過睇到佢咁，其實都冇乜嘢唔好。
食完早餐之後，佢就開始著佢對皮鞋仔，
同我講：「我返學先啦，唔好咁掛住我喎，嘿嘿」


望住佢由細個變成依家咁真係有啲唔捨得。
等等先，我唔係妹控。
只係始終咁耐以嚟都係得我同佢，
難免有時候都會諗以後會唔會有一日，
我同阿晴會唔會變得好陌生。
「得啦得啦。」我講完之後，就返上床瞓返啦。