【校園】【愛情】【0甜】【日常】能讓我重遇你多一次嗎..: 第二章

 本身諗住瞓多一陣，瞓瞓下又中午啦。
起身第一時間打電話問個friend得唔得閒食飯。
食飯梗係搵住我隔離樓嘅傻強。
「喂，傻強，陣間落唔落去樓下茶記食嘢。」我半瞓半醒咁樣問。
佢聽到之後同我講：「屌你啊，又估到我想約你，你係咪偷窺我㗎。」
我呆咗一呆，反左下白眼。
「係呀係呀，好掛住你啊，快啲換衫落嚟同我食飯啦。」我敷衍咁應。
Cut咗佢線之後，我都起身洗個面，準備出門口啦。
屌，近排真心凍左好多。
著多件外套應該都差唔多。


我插住袋喺度等緊架𨋢。
一開門就見到我青梅竹馬—「姚芷彤」。
平時會叫佢「傻婆」，當然佢都會叫返我做「傻佬」。
我同佢都識咗好耐。
啱啱搬入嚟都係靠芷彤爸爸幫手，所以我同佢由細識到大。
平時冇乜嘢都會同佢一齊返學，佢讀我隔離嗰間女校。
佢今日著咗件黑色衞衣，心口有隻史迪仔公仔，而下身配左一條短褲仔，成條腿show曬出嚟。
「望完未呢，先生」佢笑住帶點不滿。
「嘿嘿，因為你正呀嘛，彤姐」我隨口講咗句
「咁好口嘅，肯定氹過唔少女啦」佢甜笑咁講


成日都覺得佢好有女朋友嘅感覺，佢一個甜笑都可以令到我回味好多次。
「喂係喎你而家去邊啊，又約咗傻強呀」佢接着咁樣講
「係呀唔通呢屌，係喎一唔一齊食啊」我答返佢。
「唔啦，買完嘢我上返去先啦，有啲唔係幾舒服」佢摸住個肚仔咁講
「好啦，你小心啲啦，我買啲嘢俾你食啦」我聽完之後講
「咁我等陣返上樓之後，等你電話啦喎」佢甜甜咁樣講
「好！」我嘴角含春咁樣講。
一落到樓見到傻強好不滿咁樣企喺度等。
「點啊，俊哥，又溝女呀，等咗好耐啦喎我」佢有啲唔耐煩咁講。
「乜嘢又，而家咪行去食飯囉」我唔好意思咁樣講。


坐低之後我同佢每人叫咗個常餐。
「點啊又笑到含春咁嘅款嘅，又喺度諗你嗰個芷彤啊」佢見到我發呆講。
我拍左下佢大髀，再望住佢。
跟住佢知道發生緊咩事，好識做咁停咗口。
我同佢講返今朝啲嘢。
佢聽完，然後佢笑到傻咗。
我黑住面咁望住佢。
「唔得，真係好好笑，點解晴姐日日都可以咁正」佢笑到停唔到咁講。
我心諗「屌你咩，邊個想放假咁早起身啊」
跟住我叫左份三文治外賣俾彤彤。
傻強把口好似想講啲咩，不過我都估到架啦。
食完之後，我問佢等陣打唔打機。
「唔使啦，你等陣安心陪女啦」佢好似大師咁講完行返屋企。
我即刻打俾芷彤，叫佢等陣記得開門。
聽到佢好似唔太起到身，我就叫佢唔好鎖門，我陣間自己行入去。