【校園】【愛情】【0甜】【日常】能讓我重遇你多一次嗎..: 第五章

「係喎你哋啱啱喺間房傾緊啲咩？」我攞住啲餸，一面疑惑咁樣問佢哋。
「冇嘢，傾少女心事咋嘛，你話係唔係啊，阿嫂」阿晴搭着阿彤講。
「係囉冇嘢啊」阿彤面都紅晒咁低頭講。
雖然有一種可疑嘅味道，但係我都半信半疑咁叫佢哋食飯。
「阿俊咁多年都冇變，煮嘢都係咁好食。」阿彤一邊食，一邊甜笑。
「乜係咩？」阿晴一邊狼吞虎嚥，一邊講。
雖然我心入邊暗爽一下，不過梗係冇俾佢哋睇到啦。
食完飯之後，我哋三個好似平時咁坐咗喺梳化上面睇電視。
見到Disney+有嗰套尚氣，然後阿彤話佢冇睇過，因為套戲上映嗰陣佢唔得閒。
我哋就係咁，一路睇梁朝偉點樣由一個反派變成一個好人，到最後死埋。


「係咪每一個男人都好似梁朝偉咁長情，老婆都死咗咁耐，佢都冇忘記過。就算俾人呃，都要去救一個冇可能救得返嘅人」
阿彤挨住我膊頭，望上嚟問我。
「應該係嘅，始終老婆都係喺唔同人之中萬裏挑一出嚟，長時間相處冇可能咁易就忘記佢。」我認真諗咗一諗。
「咁如果有一日我唔喺度，你會點？」阿彤忽然間好認真咁樣問我。
「可能我會好似梁朝偉咁，無論用咩方式都會搵你返嚟」我摸住佢塊面。
「係咪㗎，應承咗㗎啦喎」阿彤好期待咁樣望住我。
「係啦係啦，如果你唔喺度，就會少咗個人幫我哋清晒剩低嗰啲餸。」我講完之後，俾佢瞓我大髀。
「咦，心淡了」佢打咗下我大髀，嘟住嘴扮嬲。
就係咁唔知過咗幾耐,我哋俾個鬧鐘嘈醒咗。
一睇個鬧鐘GG，返學要遲到了。阿彤仲瞓緊覺，印象中佢好似同我講話呢兩日都放假。


至於阿晴，佢啱啱喺間房換好衫，應該準備出嚟拍醒我叫我整早餐。
一出嚟話：「乜你起身啦大佬，見你同阿嫂瞓得咁舒服，冇諗住叫你添，嘿」
「我都唔知讚你好定點好」我好無言咁樣講。
我換完衫就同阿妹出咗門口。至於阿彤，
我抱返佢上我張床之後，佢不時會發開口夢。
「可唔可以應承我，咩時候都唔好離開我，冇咗你唔得……」
雖然唔知佢同邊個講，不過我心入邊都應承佢唔會離開佢。