【校園】【愛情】【0甜】【日常】能讓我重遇你多一次嗎..: 第十一章

「你哋終於返嚟啦」阿妹喺間房沖出嚟

「係呀，我同你阿哥啱啱去咗行超市，買咗好多野返嚟，今晚我哋打邊爐啦」阿彤攬住我隻手實一實

「好sweet喎，又喺度閃我，而家要阿嫂唔要我了」阿妹扮嬲谷起塊面

「邊有呀，幫我睇住阿嫂先，我入去洗一洗啲菜」我摸住阿妹個頭

「得啦得啦，照舊吖嘛，我幫你食埋碗糖水先啦」佢攞住我哋啲糖水



今次大鑊了，唔記得買埋比佢，算啦俾佢食住先，費事等陣又要嘈，都係我唔啱嘅。

「係喎係喎，阿嫂你啱啱同阿哥去咗邊度啊，見你哋咁耐都冇返嚟，以為你哋唔記得咗我了」佢有啲委屈咁望住兜糖水

「冇呀，去咗睇戲咋嘛，睇完就買餸返嚟啦」

「見到你哋咁，我都放心啲啦，費事阿哥成日好似同你唔嗲唔吊咁，你都知㗎喇我阿哥傻傻哋㗎嘛。」

「雖然有少少唔捨得，不過都要分阿哥俾你㗎啦。」



「我唔喺度嘅時候，你幫我睇住個傻仔啦。」阿彤摸着阿妹個頭

「食得啦，兩位小姐」我攞埋啲餸出嚟

「唔該大廚」阿彤同阿妹笑住咁一齊出嚟

「又傾嘢唔叫我，人情冷暖了」

「關你咩事啫，都話少女心事」阿妹即刻浸左牛肉



成餐飯入邊充滿着溫馨嘅氣氛，留意到阿彤不時會甜絲絲咁笑，望到嘅時候，我都會覺得幾幸福，有阿妹同阿彤陪住我。

「係喎，我聽日要開會，可能會晏少少先返嚟」我一邊食牛肉，一邊望住佢哋

「好啦，咁我聽日買完餸喺屋企等你啦」阿彤有啲唔捨得咁望住我

「乖，好快就返嚟煮飯俾你地」

食完飯之後，我哋決定落街散步，反正咁耐都冇試過三個人喺條街上面行。

「覺唔覺今日個月亮好似好靚咁」阿彤拖住我隻手行

「可能因為有你喺度呢」我錫咗佢一啖

「咦，又喺度放閃，唔好唔記得你阿妹我仲喺度。」阿妹有啲呷醋咁行開咗



「返嚟啦傻妹，有啲嘢你羨慕唔嚟㗎啦」

「嘻～」阿彤聽到之後笑咗一笑，行得越嚟越近我

不過又真係嘅，有啲嘢真係阿妹羨慕唔嚟。記得以前阿妹同我咁多年都係糖黐豆咁，去到邊都話要跟住我，上到中學就越來越少，反而好似成熟咗好多。希望以後都可以搵一個好溫柔嘅人照顧佢。

「喂你喺度發呆做乜嘢啊，好凍呀快啲返屋企啦」阿妹即刻拉起件褸條拉鍊，急急腳行

「咁我哋返去啦喎？」

「嗯嗯」

返到屋企之後，阿妹即刻去咗廁所，而我同阿彤就入咗我自己房。



「你唔使返屋企攞嘢？」我攬住阿彤瞓咗係張床

「唔使啦，平時有啲嘢我都擺咗係你度，同埋放假之前早就擺低咗啲嘢喺度，啲書又喺學校，所以應該唔使返去」係喎，個衰妹而家日日都嚟我屋企瞓覺喎，差啲唔記得添，不過我真係冇諗到佢已經習慣咗。

「咁好啦，等陣沖埋涼就瞓覺啦」

「好～」

過咗一陣，大家都返咗上床瞓。沖完涼嘅阿彤真係好香，佢啲頭髮散發着一種花香，明明用緊同一支，點解唔同嘅感覺。呢種感覺好熟悉，好舒服。

「快啲瞓啦，如果唔係聽日又遲到㗎啦」阿彤攬住我隻手，挨住我瞓

「你都係呀」我攬住佢

然後我哋就瞓着咗，今日可能係我最難忘嘅一日。