身為機長嘅我，某晚就咁訓左個Crew: 一．日出

「嗶⋯⋯嗶⋯⋯」

無錯！係每個香港打公仔都最怕嘅iPhone起身鬧鐘鈴聲。已經被放兩星期嘅我，就係咁樣開始左疫情中嘅其中一個flight。自從上次公司栽左一大堆嘅員，包括我果屆cadet program嘅人都所剩無幾，有個仲要比我叫外賣嘅時候一打開門見到眼前身水身汗嘅就係佢，得返比公司用左啲鮮為人知嘅手段迫左簽減薪協議嘅我同個老死。

（電話響）
「喂！Harris，放咁耐假今晚飲野？」
「唔喇！陣間要去轉成田，你唔記得廿四小時內酒精唔落得肚咩？」
「係喎！咁好啦，我地再約！」

電話另一邊嘅Icraus就係同我同屆cadet program嘅老死，疫情下我同佢算係好彩果班。佢，因為international line少左好多嘅關係，加上仲有老婆、對仔女同最緊要層供緊嘅東環，就算比公司「燉冬菇」咁款調左去揸cargo，都無辦法要焗住做落去。而我，當時全副搵另一半嘅精力都攞曬去考人生只可以考三次嘅機長試，去到今日已經係全公司最後生嘅四柴，人工都一級跳嘅我已經供完層映灣園，就算比公司cut flight條數都叫交到管理費同有錢草。當時仲好記得架新嘅777都係我同Icraus去揸返香港，公司到都算引起過一排話題。



「返香港睇下點再搵你啦！我都要起身睇NOTAM先。」

你無聽錯，正常其他同事都係返到city先會入system睇資料做準備，我就係果種一起身就已經開住部iPad做flight prepare嘅工作狂。

「成田天氣⋯⋯大致天晴⋯⋯如果今日夠逆風就可以直接7L起飛，departure route就可以轉少個圈⋯⋯」
（Apple Watch嘅鬧鐘聲響左）

Well，原來已經搞左成20分鐘。做完flight prepare嘅我去左衣帽間攞返套尋晚燙好左嘅U出來，慢慢換上身。著好曬恤衫同褲，戴埋對四柴badge，去到最後打埋上條公司呔就喺鏡到望到自己⋯⋯



「Harris，你真係好中意份工⋯⋯」
「Passport、行李、Flight Manual⋯⋯好齊曬！」

攞好曬堆行李，就咁落樓，出左屋苑門就上左已經Call左嘅Uber私家車。

「國泰城吖，唔該你！」

沿途亦經過每次返工必經嘅路段，過橋，就咁樣廿分鐘嘅過去我就已經到左公司。我亦例牌咁買左杯啡，就咁行入去pilot prepararion area到搵左部電腦坐低左。