這是我del IG的故事: del IG的第一日

IG suppose係用黎做啲咩？

睇下wiki點答，佢就話ig可以俾使用者可以喺呢個平台分享照片同埋影片，同時亦都可以追蹤其他使用者嘅分享。

講到尾，其實最重要都係—「分享」。

究竟有幾多人係真係用ig黎分享生活？

我肯定我自己唔係。



重度ig上癮嘅我喺呢一日del咗ig，之前嘅post全部archive曬，story highlights del曬。 淨係留低咗個story。

同其他人講會del ig，要搵我嘅人，就喺whatsapp，tg，一係就signal搵我。

一po完，好多人都睇咗story，好多人即刻unfol咗我，同時間都有好多人reply，問我發生咩事。

好多好多都係之前flirt過嘅囝。

：「姐姐，你發生咩事啊？」



：「咩事咁大鑊？」

：「有咩事都可以同我講㗎靚女！」

我一律淨係答：「有緣再傾啦」

有問我佢哋點樣先搵到我。

：「我冇你signal，咁我點搵你啊？」



：「咁點算，咁我點搵你睇戲食飯？」

我都一律淨係答：「有緣就會搵到」

簡單啲黎講，就係唔想俾你哋再搵到我。

有熟啲嘅朋友喺whatsapp搵我。

：「我哋喺呢度傾！」

有朋友黎dm我，係好耐冇傾計嘅朋友。

：「最近見到你唔同咗，因為以前識嘅你，係會成熟啲，呢排見到你好似收埋咗自己，喺好深好深處，好似怕受傷嘅小女孩匿埋咗咁，感覺唔同咗好多，好多包袱。」

我知道呢個朋友雖然唔係成日搵大家，但佢絕對係我其中一個真心朋友，佢對住我會有嗰句講嗰句，唔會講埋啲好假，好客套嘅說話。



：「But want to tell u , 做翻自己真係好難，但你嘗試過已經好叻叻，十個一定有一個唔鍾意自己，唔好怕會有呢件事發生。Btw 期待見翻係深處嘅你出翻黎，見翻陽光 be a brighter you 🔆 just take your time , things will get better ❤️‍🩹 」

我睇到喊，因為我真係唔知自己究竟係一個點嘅人。原來自己變成點，其他人係睇到，但係我自己完全唔知。

又或者係話，其實自己係知自己變咗，但俾ig主導咗我自己。

所以我揀咗「逃避」呢個方法。

望住自己ig個2000幾嘅followers，入面又有幾多個真係愛你嘅人？

就咁一個del ig嘅動作，就分到邊啲係真係關心你嘅人。

夜晚，我約咗個朋友出黎。



：「你今晚得唔得閒啊？」

：「做咩先」

：「我好唔開心」

：「出嚟搵我傾吓計？」

：「嗯，就係咁我先問你夜晚得唔得閒。」

：「我食完din可以啊！」

：「我想食甜水。」

：「今晚食啦！食完開心返！」



我哋喺坑口行去將軍澳，兩個人夜晚又唔認得路，遇到兩條路，佢堅持係直行，我就話係轉右。

：「我認得路啊，係向前直行囉！」

：「咩啊！咁咪要行返轉頭！」

：「我話係就係啦，行錯咪我請你食糖水囉！」

最後，佢請咗我糖水。

：「你又揀唔到食咩啊？」

：「好多都想食嘛⋯⋯」



：「你話9:30後唔食嘢㗎，得返九個字咋你！一係你講三個，我幫你揀」

：「我想食芒果，同凍嘅嘢，唔鐘意食熱嘅糖水！」

 ：「叫你俾三個名我，你就俾三個類別我⋯⋯」

講完之後，佢行去俾錢，我就好下意識拎個電話出黎，開ig黎睇。

唔係啊⋯⋯我del咗啦⋯⋯

最後，我哋行去海旁度食。冇得堂食，係咁撚柒煩。

我冇好似想像中爆喊。只係呻咗兩句。 朋友亦都冇俾建議我，淨係俾我任呻，然後講無聊嘢、鳩up下。

：「我想食薯條。」

：「我想食雪糕⋯⋯」

：「你啱啱先食完甜嘢咋喎！」

：「咁人哋係鐘意食甜嘢嘛⋯⋯」

：「咁依家去買囉！」

佢就即刻拎個電話出黎落單。

我望下個電話—「11:13」

啊仲有，完全冇任何notification，但我已經幾個鐘冇睇到電話。

比著之前，應該多到冇可能一眼就望曬⋯⋯

：「但係依家過咗9:30啦喎！」

：「食埋先啦，聽日先減啦屌！食咩啊你？」

：「我想食雪糕⋯⋯吓，但真係食啊？」

：「食咩雪糕啊？」

：「你幫我揀埋啦！」

如是者，我破戒了。喺11:25竟然食嘢，仲要食雪糕⋯⋯

佢陪咗我三個鐘，我嘅注意力冇放喺唔開心嘅事上面，淨係聽朋友吹水。

嗰三個鐘，我係不停笑，係開心嘅。

但我未放低⋯⋯