今日晏晝兩點幾嗰陣,啊M send msg嚟。

:「今日有咩做啊?」

:「冇啊,都係返工!」

:「今晚睇唔睇戲?」

:「可以啊,不過我六點半先放工喎」



:「咁睇晏啲囉,我都要夜晚先得」

跟住佢send咗張相俾我,係一張佢影住碼頭嘅相。

:「去邊啊你?」

佢秒睇msg,但係同時已讀咗我⋯⋯

屌啊?問題黎㗎喎,已讀係想點?



我即刻dm我個frd,一個日日傾計嘅frd。

:「屌 佢已讀我個msg囉!」

隔咗兩分鐘,佢就覆咗我。

:「係咪end topic咋?」

:「我係問緊佢嘢囉,佢send相黎,咁我咪佢去邊,佢即刻睇,但又即刻已讀我囉⋯⋯」



:「會唔會係同朋友傾緊計,冇覆到你?等多陣啦~」

等等等,返緊工嘅我,對手都冇離開過部電話。

望望望,都係冇reply,個人開始燥底,對啲細路冇晒耐性,覺得佢哋煩住我。

我一望部電話—「6:29」

有三個notifications。

係啊M終於send msg黎。

「LI」
「Lantau Island」
「依家返緊黎」



我即刻seen咗個msg,但我冇真係放低部電話,繼續mon住個chatbox,睇下佢有冇typing。

過咗五分鐘,佢終於再send msg黎。

「??」
「已讀我。。?」

本來都仲係燥燥地嘅我,睇到佢話我已讀佢,即刻嬲撚到可以唱返首十幾次「焫焫焫焫焫焫著」。

我就隔咗十分鐘先再覆佢。

「啱先放工」

佢又即刻睇咗msg。



「睇邊場啊咁?」

我send咗兩個場次嘅座位表俾佢,之後乜都冇打。

「你想呢」

「你話事」

「咁呢場囉」

「咩位」

「你揀啦」



我買完飛,同佢講咗一句 「bought」

「你喺邊啊?」

「喺屋企,依家出黎」

「咁你出到黎再話我知」

「嗯」

出到黎,冇尷尬,當啱啱「已讀」嘅事好似冇發生過咁。

「你有冇睇我story,呢個好好飲!」

跟住佢就喺個袋度拎咗支杏仁霜出嚟。



「我唔鐘意杏仁陣味,你唔覺得好奇怪咩?」

「哦⋯⋯咁樣講,啫係要我記住你唔鐘意杏仁啦⋯⋯咁我要記低佢先!」

佢就拎咗部電話出黎,好似諗住真係要jot低咁。

「咪癲啦!我分享下啫!唔係暗示你要記住囉!」

依然揸住電話嘅我,推開咗佢隻手,諗住叫佢收起部電話。

佢就咁笑咗笑,就將個電話擺返落袋。

我望下部電話,依家先8:00,場戲9:00先開場,所以變相我哋就要喺銅鑼灣鳩fing下先。fing fing下,我哋行咗去American Eagle。

「呢度啲衫你啱㗎咩?」

我望下我哋兩個著嘅衫—我著住件黑底打底加馬甲再加條黑色闊西褲,一個就著白色oversize裇衫加件黑白拼布褸。兩個人顯然就同amercian eagle賣嘅style完全唔夾。

「你咪一樣唔啱!」

「咁我哋行黎做咩?」

「咁都冇嘢做,又等開場⋯⋯呢件幾靚喎!」

佢望到一件同樣係拼布款嘅褸,就行咗過去睇。

「我好鐘意拼布嘅item!」

「ok,我會記住㗎啦!」

我冇拎部電話出黎,而係真係記住咗。

我哋再行咗去間樓上舖,賣各種相機的。

「你係咪影菲林㗎?」

佢拎咗起部kodak藍色嘅菲林相機,左望右望,就咁樣問我。

「之前有影啊,太懶了,唔想拎部相機出街,依家多數用app影。」

「你ig啲相都係?」

「之前嗰啲真係用菲林,最近嗰啲都係用app影。」

「咁都幾似喎!」「係啊~仲要自從用咗嗰個菲林相機app影相,po出黎嘅相都多人like啲!」
佢又拎起一部白色polaroid。

「呢部靚喎!」

「買啦!」

係,呢句「買啦!」係我嘅口頭禪嚟。

佢又拎起咗另一部,貴少少嘅心polariod。

「兩部都係咁,咁梗係買部貴啲嘅好啦。」

「我想買返部單反就真。」

「點解嘅,你本身有㗎?」

「係啊,嗰陣考dse,諗住唔好分心去追星,就賣咗。好後悔啊!好明顯賣咗都幫唔到我專注喺dse度⋯⋯」

「啊⋯⋯你追星,咁你之後拍拖,揀男朋友定追星啊?」

我呆咗一呆,完全唔expect佢突然間咁問,明明講緊相機。

「erm⋯⋯我冇經歷過要做呢個選擇喎⋯⋯」

「咁如果你揀追星,你男朋友咪會好sad囉⋯⋯」

「到時再算啦,依家都冇男朋友!」

想你係我男朋友啊⋯⋯

諗下諗下,我不自覺就望住佢個樣發緊呆。

「做咩望住我個樣?」

佢突然問我嘢,我先回過神來。

「咁咪唔望囉!」

跟住我就另轉塊面,真係唔再望佢。

佢做咗個真係打死我都估唔到嘅動作。

佢拉住我個衣袖邊,個樣勁傷心咁。

我嗰下真係睇到眼都突埋⋯⋯

但係我完全唔知點handle,我指住間舖入面嘅figure。

「嘩呢個好靚啊!」

我迴避咗,冇俾反應佢。

佢放開咗我個衣袖。

我呢一刻唔知,佢係放開我個衣袖,定係放開咗我呢個人。

fing fing下,我望一望個電話—「8:50」。

我哋就行去戲院,入場嗰陣佢無端端問我。

「你記唔記得我生日?」

我都未答佢,佢就自己再講。

「實唔記得啦,我就記得你幾時生日啦!4月12啊嘛!」

「我都未答我記唔記得!」

「你白羊座喎,不過唔知你信唔信星座呢啲~」

「唔係好信㗎,不過我記得你係巨蟹座囉!」

佢冇再答我。

但佢輕輕力咁推咗我個頭一下。

我又呆左呆,摸一摸佢啱啱推我個頭嘅嗰個位。

係㗎,靚仔搞你個頭,就會春心蕩漾。樣衰嘅就⋯⋯

都係嗰句啦,樣衰真係原罪黎。

佢見我咁,就笑咗出聲,嗌咗我一聲

「傻仔!」

對於極眼淺嘅人,睇愛情片一定喊到天崩地裂咁。

而我,就係嗰啲極眼淺嘅人。

睇完戲行出去,成個人仲係閪迷緊,眼神喊到放空。

「你要唔要去廁所先?」

我嗰陣已經喊到冇理到自己嘅形象,點咗點頭,就行去廁所。

一行到去廁所,照下塊鏡—好彩啫。

係對眼紅晒,冇溶妝,冇溶妝。

我印一印走啲眼淚,呻走晒啲鼻水⋯⋯

真係極冇形象可言。

跟住我就行出去,就見到啊M企喺門口等我。

佢本來揸住個電話,另轉面錄緊音,一見到我,就放低咗個電話。

「你點啊?唔好喊啦傻!」

我淨係點下頭,唔敢同佢對視。

因為我對眼真係好撚紅啊!!!!!!

仲未平復心情嘅我,搭扶手電梯嗰陣,差啲成個仆向前—佢企喺我前面⋯⋯

啫係我差啲仆落佢度。

好彩⋯⋯我有扶實個扶手。

其實係好彩定唔好彩?

「嘩你跌落黎,我一定會讓開個位俾你㗎!」

我聽到佢咁講,笑咗出聲。

「放心喎,一定唔會擲死你!」

「咁咪好囉,依家笑返!」

我望一望個電話—「00:08」。

佢送我去搭車。

有兩個男人喺我哋前面,肩並肩咁行。

佢哋陣香水味濃撚到,佢哋喺街頭,我喺街尾都聞到。

「好似係Le Labo嗰支香水嚟」

「唔鐘意男仔噴咁濃味嘅香水」

我皺住眉頭咁講。

佢有啲shock咁問望住我。

我就知⋯⋯仆街鳥⋯⋯

跟住我就問佢

「你平日噴好多香水?」

「我有噴啊。」

唉⋯⋯屌⋯⋯講錯嘢了⋯⋯ 沿路我哋都冇再提起呢個話題,佢送我去搭車之後,我即刻dm我個frd—啊J。

:「屌!」

未等佢覆,我就一輪嘴自己講。

:「佢啱啱嗲我囉」

:「佢啱啱推我個頭囉」

:「屌!!!!!!!!

:「啱啱佢食雪糕,諗住水我食,但係我堅決唔食,因為要減肥」

:「佢扁咀囉cls…佢話我嫌棄佢啲口水尾囉!屌我先冇嫌棄囉!」

:「啊!個重點係佢好q啊!!!」

:「真係好中我嗰type啊!!!少少fuck但又qq」

:「救命我真係要死了!!!」

搭緊車嗰緊嘅我,打呢啲文字俾啊J嗰陣,都唔知其實係咪周身扭緊。

興奮到控制唔到自己啊!!!!

都未等到啊J覆我,啊M就text我。

:「如果你唔鐘意人哋噴香水,我唔噴都得㗎」

:「返到去話我知啦」

我睇到個msg……完全呆撚咗。

完全冇expect佢會再提起,完全冇expect佢會主動講,完全冇expect佢要對我咁⋯⋯

我冇即刻覆佢。而係cap低咗個notifications send俾啊J。

(notifications screenshot)

:「cls…佢竟然咁同我講⋯⋯」

我同咗啊J講完,先再覆啊M。

:「冇咩所謂啦,都唔覺得你有大陣味~依家陣味啱啱好!」

啊M即刻seen msg。我即刻退出個chatbox。

轉個頭就有兩個notifications。

:「😳😳」

:「係咪真㗎?」

我完全唔識覆,點樣覆先顯得我大方啲?點樣覆先顯得我唔太上心,點樣覆先顯得我又有少少著緊?

我冇覆到。 我開咗電話個菲林相機app—「Dazz Cam」。

將啱啱影嘅戲飛convert佢變做一張偽菲林相。

試咗五部相機嘅filter,先終於揀到一張。

嗯,可以po了,po story啫!

開ig,撳左上角,揀啱啱嘅菲林相,諗咗一陣caption。

諗唔到。

跟住我就上網search啱啱套戲有啲咩好深刻嘅台詞,睇咗三個page嘅分享,終於搵到一句。

copy&paste.

paste落去個story度,再揀字體,左撥右撥,眨下眼又揀咗分幾鐘。

嗯,揀好。

再將個caption置中,啱啱好放正喺張戲飛嘅上面。

再拎遠少少部電話睇,張相個構圖又好似有啲怪,zoom埋啲先,再移過左面少少。

嗯,ok!

突然間,我有一個諗法。

我撳開咗個notifications。

:「我po story啦!要唔要tag你啊?」

我一路等一路等,等咗廿分鐘。

本來秒覆緊我嘅佢,隔咗廿分鐘都冇覆我。

越等越心灰⋯⋯

我撳入IG,喺段caption下面tag咗啊M。

然後再退出咗個app,碌下連登等佢覆。

碌完連登,就下意撳開ig,一開就係嗰個ready要po嘅story。

望下電話幾多點—「00:30」,再過多陣就太夜,唔會有人再睇我story啦⋯⋯

view數會好低。

就喺諗住save draft,諗住聽朝再po嘅時候,啊M覆咗我。

:「你估下?」

我即刻覆佢。

:「咁唔tag囉~」

終於收到佢reply嘅我,春笑到成個發情嘅獅子咁,跟住就po咗個story。

一po完,我就不停咁refresh IG個page,望下幾多個人睇咗。

10個⋯⋯一分鐘有10個⋯⋯

算正常。

過多一陣,已經陸陸續續有人reply我story。

:「新囝?」

:「男朋友?」

:「終於拍拖?」

少部份係唔熟嘅人,大部份係flirt過嘅囝。

我淨係覆咗啲仲做到朋友嘅,真係朋友。

:「努力緊,努力緊!」

佢哋大部份都秒覆我。

:「wooooo⋯⋯咁你加油啊!」

:「你咁靚女,實得嘅!」

:「嘩邊個男仔咁好彩,可以俾靚女倒追⋯⋯」

聽到呢啲,讚到你天上有地下無咁嘅說話,內心已經完全冇起伏。

呢個時候,啊J覆咗我。

:「完全係你鐘意嗰type囉!我就唔鐘意啦!」

:「咁最尾點啊,你有冇同佢share個雪糕?」

我覆返佢。

:「屌但其實真係好怕羞!!!」

:「「冇啦,太夜啦,仲要雪糕,肥啊⋯⋯」


如果當初,我食咗佢叫我食嘅雪糕,

個結果會唔會唔一樣?

已有 0 人追稿