我接通了來自陰間的電話: 第五十五節

很快，我們便去到嚴國旋的家。
 
我望一望自己的手錶，時間已經去到下午六時，距離晚上十二點還有六個小時。
 
「鈴.......鈴.........」是電話的鈴聲響起。
 
我看一看來電顯示，來電者是傻強。
 
「喂，天佑，你搵到李泳兒未呀，我仲未搵到佢呀，我問晒啲同學想攞佢個電話，但係都冇人有呀。」傻強說。
 




「唔緊要啦，我而家同緊李泳兒一齊。」
 
「咁係咪真係佢養鬼仔呀？」
 
「係呀，冇錯，佢已經原諒左我，仲想同鬼仔講要佢放過我，我地已經原諒咗大家，所以冇關係，所有事都已經係過去式，我哋而家嚮個師父嘅屋企，你過唔過嚟呀？」
 
「過嚟？驚唔驚李泳兒唔鐘意呀？如果佢陣間叫鬼仔害我咪死！」
 
「唔會啦，你放心，而且呢度有師父嚮到，鬼仔害唔到你架！」
 




「好啦，你知我對呢啲嘢最有興趣，你哋食咗飯未？我叫外賣俾你哋啦！」
 
「你叫幾個飯盒嚟，師父嘅地址係ＸＸＸＸＸ。」
 
我不知道叫傻強來的決定是否正確，可是我想親眼看到傻強和李泳兒之間可以冰釋前嫌，那麼即使我今晚真的會被鬼仔所殺，我也可以了無牽掛。
 
「張偉強而家過緊嚟？」李泳兒說。
 
「係，我希望你唔好怪傻強，其實佢係同性戀，佢之前離間我都係因為鐘意我，我諗因為愛而做出嘅傻事，你一定比我更加清楚明白，而且係佢救番我，我先至冇俾鬼仔攪到我跳樓，佢可以話係我嘅救命恩人，所以我希望你可以原諒佢。」我說。
 




「吓！佢係同性戀！？ 」李泳兒驚訝的表示，「仲同我鐘意埋同一個男人......好！我應承你，雖然我真係好嬲佢，但反正而家我最著緊嘅係你冇事，如果因為我而你有事，我都唔知點算，點講佢都叫做曾經救過你」
 
「放心，我一定唔會有事，我對旋哥有信心！」我說。
 
只見嚴國旋不停的在房間與大廳穿梭著，依我看接下來的時間嚴國旋要在大廳施法也說不定。
 
很快，嚴國旋便把家中的傢俱搬到牆邊，然後在地上用一些紅色液體在地板上畫了一些符號，從過往在電影吸收的知識看來，地下用紅色液體所畫的符號似是一個驅鬼的陣法。
 
「喂！天佑，我到喇！」傻強推開了大門說。
 
「傻強！你到喇？」我走前幫傻強接過飯盒。
 
「旋哥，過嚟食飯先啦，我叫咗我朋友買飯盒呀，食完先再算啦！」說完後，我們便到旁邊的餐桌用膳。
 
傻強行過去李泳兒的旁邊，低著頭誠懇地說:「李泳兒，對唔住!對唔住!對唔住！我真係唔知會害成你咁，係我衰，求你原諒我，以後你有咩困難只要講一聲，我一定會幫你！」




 
「天佑同我講咗你嘅事喇，我本身真係好嬲好嬲你，但......我都唔係好得你好多，而家最重要嘅係我哋成功對付到鬼仔，等佢唔好害天佑就得喇。」當李泳兒說最後一句的時候，是微笑對著我說的，我感到我們之間已經再沒有芥蒂。
 
傻強聽到李泳兒的說話後，雙眼不停的流著眼淚說：「多謝你！多謝你！」
 
十年後，知道被自己害慘了的人說寬恕自己，傻強又那會不感動？十年的夢魘，今日傻強終於可以獲得救贖和寬恕。
 
與自己最愛的人，最好的朋友和最信賴的人一起共晉這個晚餐，我又夫復何求？
 
「天佑，食完飯之後，我哋就正式開始啦。」嚴國旋說。
 
「吓？鬼仔話今晚十二點至嚟，我哋咁早就做嘢？」傻強不解的問。
 
「夜晚十二點係鬼魂靈力最強嘅時候，如果嗰段時間我哋至開始做嘢，咁就真係太遲啦！」
 




「其實我想問吓鬼仔同唔同一般嘅鬼？一般你哋大師嘅做法又會係點？」傻強續問。
 
「鬼仔唔同一般嘅鬼，佢哋唔能夠投胎亦都唔能夠輪迴轉世，不論陰間同陽間都唔受歡迎，所以一般嘅收鬼方法對佢哋係冇用，最有效嘅方法係消除佢嘅怨念，只要無怨無恨，佢哋先至可以投胎轉世。」
 
「咁如果佢哋唔肯聽我哋嘅勸告，咁可以點做？師父你可唔可以打得贏佢呀？」
 
「我都唔知，要睇下隻鬼仔嘅道行去到邊，不過我問過師公，呢隻鬼仔係因為被人從孕婦嘅身體強搶出嚟，之後用猛火煉成，可以話係鬼仔裡面怨氣最重嘅一重，所以真係唔知會點，唯有到時見一步行一步。」
 
傻強聽到嚴國旋的解釋後，再看一看自己正在吃的「肉醬意粉」，不禁讓他嘔吐大作。
 
「好啦，你哋慢慢食，我去預備一下先！」嚴國旋離開餐桌，並繼續在地上畫符咒。