交友app日記: Candy

我見己經夠鐘上zoom，所以都冇再理呢件事。

但係，上堂個陣嘅情緒好失落。點解我淨係同佢傾咗幾個鐘就會有呢種感受嘅。可能係我平時都好時同人send訊息。琴日突然同佢開始傾計令我覺得冇咁孤獨。但係，宜家己經激嬲咗佢，我又可以點做啊。

我諗嚟諗去，都係決定搵佢道歉：「sorry啊 你唔好嬲啦。我啱啱講嘅嘢唔係有心。」呢次係我除咗同女朋友之外，第一次同其他女仔道歉。我竟然會為一個我見都未見過嘅人道歉。以前嘅我一定唔會咁做。

但係，過咗一堂我都未收到佢嘅訊息。成堂我就係到望住部手機，書都冇聽到。

「黃子諾 你伸返個樣出嚟鏡頭到 我睇唔到你個樣。」





原來係我中文老師叫我，我即刻坐返直個人。原來我啱啱己經無意中瞓咗係到。

中文老師：「黃子諾 你啱啱去咗邊。」

我：「我一直都係到，只係啱啱瞓低咗個人，你睇唔到我啫。」

中文老師：「咁我啱啱講到第幾題啊。」

我：「Errrr 第三題囉。」其實我唔知，我成堂都係發夢等緊個訊息點會知道啊。





中文老師：「你仲話自己有專心上堂 呢一題琴日己經講完啦。宜家己經講緊第二課。」

我：「miss 咁你宜家擺明fake我啫。」

中文老師：「我宜家係fake你啊，如果你有專心上堂點會比我fake到啊 你聽日放學留低背完書比我聽先好走。」

我：「miss 仲小學雞咩 邊有人仲留堂做啲咁冇意義嘅事㗎，比啲新意啦。」

中文老師：「再吵就背多課。」





我聽到呢句即刻收皮。

我本身心情己經好差，宜家仲要比老師罰背書，真係心無可戀。

到咗數學堂時候，我見平時我哋上堂個陣就算走開咗個老師都冇鬧，所以我又繼續搵candy。 我：「我下次唔會再咁講嘢 原諒我啦。」

終於，佢今次覆咗我。candy：「你都未知道個事情發展就係到話我。我睇完你咁講個心情真係好差，唔想覆你囉。」

我見到佢覆返我，真係一天都光哂，幾驚同唔到佢去海洋公園啊。我：「我下次唔會唔會㗎啦。」

Candy：「今次就算啦。但係，如果你下次再係咁，我唔會再覆你。」

我：「一定冇下次。」

Candy：「係呢，你學校下晝洗唔洗上zoom。」





我：「要啊，啱啱掛住搵你仲搞到比老師罰聽日背書添。」

Candy：「即係你宜家怪我啦。」

我：「唔係  係我自己衰 講錯嘢激嬲你啫。」

Candy：「講下笑啫，你唔洗咁驚喎。」

我：「你冇嚇我啦，我真係嚇唔過。」

Candy：「咁細膽㗎，你真係生人唔生膽。」

Candy：「話說你會唔會想換相。因為我同之前傾嘅人都會換。」





我緊係想換相啦。但係，我驚佢見到我幅相覺得我唔靚仔唔理我。但係，我又好想睇下佢咩樣，真係好矛盾。不過，佢之前都講過自己唔係靚女，我都講過我自己唔係靚仔。我諗既然佢都唔係靚女應該唔會太高要求嘅。

經過咗幾分鐘嘅考慮，我終於答咗：「好」我搵咗一張我覺得最靚嘅相send比佢。

係等待嘅過程，我好驚我會收到一張豬扒相，其實我都好低要求啫，不求靚女，只要正常就得。第二樣驚嘅係唔知佢會唔會收到我幅相之後見到唔啱feel就即刻block我。咁樣我連佢嘅樣係點都唔知，真係蝕哂。我宜家嘅心情都唔知點樣形容，相信只有同我一樣經歷過嘅人先會明。

呢個過程好慢長，佢過再十分鐘仲未覆我。但係，我條訊息仲未雙剔同麻佢都未block我，我諗佢應該係未得閒睇啫。

我只可以繼續等……………….