《我老婆唔係我女朋友》【那些年／學界比賽／真人】 第四章至六章: 【第四章】 我城隍老坑嘅（５）
「咦？唔係跟你咩？」我難掩失望之情。
「唏，我老婆喺大陸嚟咗，今年都唔得閒教水嘞。」原來剛才講國語的女人就是他老婆。
我暗嘆一口氣：「好啦，唔該你喎阿直，幫我問候阿姨。」
「你畀心機練呀，唔好輸得太肉酸，映衰我呀！」阿直的鼓勵說話，任何時候都是直插我們的神經。
再夜一點，阿心打來「報到」回到家了，她應該非常怕我擔心她失蹤，又再驚惶失措的摸上她家，所以這方面她非常聽話，當然也是不想我擔心的好女友行為啦。
我向她稟報剛剛跟阿直通話的內容：「聽晚開始去麗閣練水，可能要跟個新教練呢。」
「上晝講完咋喎，咁快就可以返去練㗎嗱？」對事情發展得這麼快，她有點出乎意料。
「唔知呀，可能而家無乜人再練水啩，有時間都去唱K涼冷氣啦，邊個會攞苦嚟辛吖？聽日自己返學小心喇，夜晚都唔使搵我，後日先見喏。」第二天我是day off的，阿心要上堂，唉～馬上已經見面少了。
她輕鬆的說道：「唓，你估個個都好似你肥仔咁怕熱，成日掛住涼冷氣咩，有得做吓運動我都去游啦。嗯仲好，聽日無人管住晒，哈哈，仲唔輪到我放學去巡視業務。你畀心機練喇喎。」瘦妹經常手腳冰冷，當然唔理解涼冷氣的重要性。
唉～阿心以為去練水，就好像平日放假去嬉水一樣，悠閒、寫意、泡泡水。真係無知少女…只是我中學練水加起來的「里數」，已經多過妳林心穎游一世水的總距離了。