《我老婆唔係我女朋友》【那些年／學界比賽／真人】 第四章至六章: 【第四章】 翻閹泳法（６）
我忙不迭地點頭：「有～比死更難受呀。」
肥直大感滿意陰陰嘴笑：「啱啦，頂唔順咪聞吓度氣頂癮囉。」
仆街，又講呢啲…我門小佢鹵味。
他頓了頓再說：「嗱，我哋而家定返你嘅新習慣，你要自己記住，任何訓練時間都應該保持用中速，嘗試提升中速嘅平均速度，到有餘力喺最後階段先嚟閉氣——爆！」
「啊呀，噉真係同我嘅習慣完全相反喎，我以前係前段閉氣。」我恍然有新的領悟。
「以前有力由頭爆到尾嘛，你而家廢咗唯有改啦。以前我哋要花長時間去評估、微調新組合嘅成效，但你應該無閒情逸緻可以慢慢研究嘞，反正你只參加一項，你而家照用『五手一氣』、中速做前段，去到最後15（公尺）仲有餘力，就閉氣爆埋佢啦，呢個組合就係你嘅『翻閹泳法』嘞。仲有呀，夜晚返去要練『閉氣功』，非常簡單，深吸一口氣，吸到盡，然後閉氣，忍得幾耐得幾耐，然後徐徐呼氣，呼到盡，每晚最少做十組，要令你嘅肺功能重新『復崗』，活化返已經萎縮嘅容量，如果可以就順便做吓擴胸動作。」肥直一口氣將我的訓練大綱概括出來。
我心諗練「閉氣功」，要唔要畀你頂吓個肺呀…