我以前溝過自己條囡?!
 
二月的第二個星期天是情人節,當時媒體對這個西方節日並不太重視,宣傳絕對不如今天的鋪天蓋地(現在居然還衍生出白色情人節…),大眾的反應普遍都是冷看待,然而今年卻是我和阿心一起過的第一個情人節,所以都想稍為慶祝一下。
 
掃興的是二月十四當天,日值禮拜教會日,穌哥曰諸事不宜,所以慶祝順延到星期一。
 
星期一在校園內都看見有零星同學曬命,拿著玫瑰花在招搖過市,幸好我家瘦妹喜歡低調,如果唔係要我送花都幾𤓓。由於晚上我要練水,所以所謂的慶祝,只是放學後回到石硤尾吃頓下午茶餐而已。
 
出了地鐵,最近的茶餐廳是大坑東對面的【大力水手快餐店】,由於要厲行減肥大計,就算是下午茶餐都只能吃「減量版」,將炸雞髀去皮去骨,淨吃半隻,剩餘的半隻(連脆皮)由食極唔肥又慳家成性的林心穎包底。
 


剛坐下她就跟我說:「你切雞髀先,我返上樓攞啲嘢你睇。」說完急急腳去了。
 
奇怪有甚麼咁神秘呢,好半晌後她帶了本好厚的書回來,原來是【馬利亞紅花會】的校刊,我饒有興趣的馬上翻了起來。「咦,妳邊班㗎?」
 
她斜睥我一眼,揭到了其中一班,呵呵,果然有小雲的學生相。我當然唔敢作出任何表示:「哦,仲有無人我識㗎?」
 
「嗱,Lulu啦,Ruby啦,阿玉縮埋後面,都係我同班嘅,你揭下一頁啦,呢個咪蘇菲囉。」她指著相片解說,突然醒起:「噫~我唔係畀你睇我哋啲舊相㗎!你睇呢頁啦。」說時有點忟憎。

已有 0 人追稿