《我老婆唔係我女朋友》【那些年／學界比賽／真人】 第四章至六章: 【第五章】 個個都游水 唔通個個都識游水咩（２）
「咦？馬飛你有練水嘅咩，50自咁專業嘅名詞你都識講嘅？今朝晨操計過31秒左右啦。」我坐直了身體，馬飛的專業開始引起我的興趣。
「呵呵，此言非矣，只係有少少研究噉啫，好似賭馬噉，你唔使識騎馬都會略知一二嘛，而且早輪啱啱睇完奧運，識少少都唔出奇啫。喂噉你最佳時間係幾多呢？」馬飛好整以暇的答我。
確實如果用賽馬來作比喻，「街坊馬評家」又真是一街都是，「評論」方面專業得不得了，況且他說的92巴塞奧運熱潮又真是方興未艾，說來全是合情合理的。
「哦～以前中學時試過26秒左右嘅。」我瞥見馬飛隔離阿墳哥，在我一邊講時，一邊抄錄筆記。
馬飛繼續隨口問：「哦，噉即係未操返上最佳狀態喎。係呢，今次比賽有無信心入決賽呀？我諗住搵你好想見嘅『偶像』幫你打氣呢。」說時他的表情曖曖昧昧的。
我心中一跳：「喂？！唔係咁益我呀～唉，我都無信心呀，盡力啦…話時話，真係可以叫到Gigi出嚟咩？」馬飛條粉皮竟然會找數？天開眼呀。
「哦～原來未有信心喎…」馬飛向墳哥他們微微擰頭。
頓了頓然後再向我說：「唔叫Gigi喇，佢唔鍾意太曬㗎，不如叫Athena啦，出嚟游水啱佢多啲。」他剛才的擰頭似乎是否認叫Gigi。
「噢…」我極度失望不能一睹「白恤衫」的風采。「噉邊個係Athena呀？」莫非是星矢女神雅典娜乎？