《我老婆唔係我女朋友》【那些年／學界比賽／真人】 第四章至六章: 【第六章】 前 世 今 生（４）
我自己都聽到好亂，究竟係咪有另一個我坐DMC-12 DeLorean（《Back to the Future》部跑車時光機）曾經回到過去呢？
原來個傻妹一直收埋咁多嘢自己擔心，我一直先係最懵盛盛嗰個。
阿心繼續說：「我真係無介意你話嗰啲妹仔嘢喎，你記唔記得我講過自己有能力就應該盡力幫人，我只想盡自己能力幫男友咋，何況仲要係失散咗咁多年嘅『嗰個人』。」
我好生感動：「就嚟比賽喇，以後都唔使做骨妹嘞，如果用今晚嘅狀態即時去比賽，要入決賽多數無問題。」
濕狗Leon給我的「簡單」任務只是單項入決賽而已。
遂將肥直提及的「比賽期」及減少負重練習說給她知道，又將今晚自己跟細豬比賽時的策略性測試解釋一下。
她喜孜孜的讚道：「咁叻仔？快啲畀心機游比賽呀，要變返以前咁叻，等我可以好有面子噉話畀人聽，呢個小肥肥係我嘅男朋友！」她頓了頓再說：「但如果仲有肌肉痛都要同我講喎，無理由而家先至放棄唔按摩嘛。嘻嘻，由『肥腯腯』一路俾我捽到啲肌肉『實的的』噉，都幾有滿足感㗎，等我都話埋俾米叔知先，佢都有關心你啲狀態嘅。」
「哈哈，你知唔知乜嘢叫手感滿滿？」她還啜核的遞起自己隻手，在空氣中摙吓摙吓，一副好揸手的滿足表情。