《我老婆唔係我女朋友》【那些年／學界比賽／真人】 第四章至六章: 【第六章】 前 世 今 生（５）
明明係我用嚟形容佢身材，點解會反彈落我自己度…唔係噉都讀到心啩。因為照顧我搞到唔理自己身世，她已經不止是Gfable，直情係Wfable了。
我拖著她手跟她說：「妳唔好再亂諗嘢啦，我點會同妳分手吖。妳唔知啫，我需要妳多過妳需要我㗎。如果我可以去返我第一次見妳嗰日，我會直接拖住妳，點都唔放手，等妳唔使心掛掛咁多年。妳快啲養返滑隻手呀，我要好似第一次拖妳咁滑捋捋㗎。」
「嘻嘻，如果金魚佬拖我手，通常應該叫非禮或者叫Sarah Connor幫手喎。」她笑得很甜。
「思君憶君，魂牽夢縈」，好像是我無良心，無意中令她傷心了好幾年。
見她好像回復正常，似又順便解開了她的心結，令我也鬆了口氣。自此以後我對住老佛爺講嘢，都囉嗦長氣過佢老母，真心唔想再令這個天下無雙的女友不高興。（時至今天佢都係話我講嘢似阿伯咁長氣…）
其實破埋啲濕狗紀錄，贏埋贏埋幾罐廢鐵有銀用咩，計我話最珍貴都係贏到條「高汁」嘅囡返嚟做老婆，噉先叫做有用嘛。
究竟當日『嗰個仁』喺泳池邊對阿心講咗啲乜嘢甜言蜜語咁有魔力呢？又會唔會真係「金毛遮三醜」呢，又其實我以前是咪溝女聖手，但點解我自己又唔知唔覺嘅呢？不過有理由相信都是自知溝女無望，所以隨口噏講完就算，因此毫無印象…