我同離家出走嘅有錢仔合謀扮拍拖: 三

第二朝，我即刻拉個男人去咗佢隻錶個牌子嘅維修保養中心，想睇吓隻錶真定假。
好彩，係真錶嚟。我鬆一口氣。
其實琴晚唔知頭唔知路嘅情況下帶佢返屋企都幾危險。我後知後覺。

喺我收留咗個男人後，佢講咗更多有關自己嘅信息俾我聽。
佢叫朱皓言，屋企係做生意嘅。佢離開屋企嘅原因係屋企人逼佢接手生意，佢唔肯，對方就cut晒佢所有經濟來源嚟威脅佢。
於是，做開二世祖嘅朱皓言而家成個身一個仙都冇，得返隻錶。
「我心諗，還掂都係喇，不如索性走啦。」佢又幾隨意喎⋯⋯
我一時間冇聲出。
「咁一個月後你點算好。」我好奇咁問。


「我走咗之後，老豆嬲到癲，講明唔準任何人幫我。而家風頭火勢，我啲friend一時間都幫唔到我啲咩住。但過多個月，等我老豆下咗啖氣，睇得冇咁緊，我就會去搵我啲friend。」佢講得頭頭是道。
「咁你阿媽呢？」我問。唔通連阿媽都捨得佢走？
「佢咪勸我聽老豆講囉，佢兩個根本坐埋同一條船。」朱皓言嘆咗口氣。「其實我係作家嚟，出版過兩本小說，但我屋企人都係成日叫我唔好搞無謂嘢。而家咁樣都好嘅，呢段時間我可以清靜下，用嚟寫小說。」
我都幾佩服佢呢種心態⋯⋯明明而家已經一窮二白，都仲咁輕鬆。
不過佢自己都唔擔心，我都冇必要為佢擔心啲咩。還掂一個月後佢就會走。
只係呢段時間，要委屈佢瞓梳化喇。
我滿心期待，彷彿見到三萬蚊向我招手。

呢一日，我趕返餐廳返工。朱皓言就喺附近一間cafe度用我部laptop寫小說。
我唔敢俾佢自己一個留喺我屋企。


好彩呢一日我收早，佢唔使等咁耐。
「你四點過嚟搵我吖。」我俾咗五十蚊佢當係食飯錢。
「吓咁少。」佢個樣勁嫌棄，「我俾咗三萬幾蚊你㗎喎。」
「再嘈就廿蚊。」我惡狠狠咁講。
再俾多你仲得了嘅，嗰三萬蚊扣吓扣吓好快就冇晒㗎喇。我心諗。

四點鐘，我準時收工。
行出餐廳，朱皓言已經喺門口等緊。呢刻佢正專注咁閱讀餐廳門口嘅招聘廣告，睇得津津有味。
我哋餐廳唔夠人，請緊part time。
我有種不詳預感。


果然，佢見到我之後就指住張嘢同我講：「你哋餐廳請人呀？我都過嚟做啦。」
我急得打咗佢手臂一下。「咪玩啦大少，你都未返過工，寫你嘅小說啦。」
「有咩問題啫，我又唔係唔捱得。」佢講完之後就自把自為咁行去餐廳收銀處，我拉都拉唔住佢。
老闆坐咗喺嗰度。
仆街。
「老細你係咪請part time呀？我嚟見工㗎。」頂，佢真係痴線㗎喎！
我衝埋去，諗緊點同老闆解釋好。
一係話朱皓言其實係我嘅智障表哥，唔好當真？

正當我打算開口，老闆已經答咗：「好呀！你聽日返工得唔得？」
「可以呀。」朱皓言嘅聲音響起。幾秒之內，喺我未反應到嘅時候，佢哋兩個已經傾好咗。
做乜嘢，老闆都癲咗？
我驚恐咁望向老闆，然後見到佢望住朱皓言，一臉花痴。
哦，我爭啲唔記得咗，我哋老闆係個單身嘅中年婦女。