我同離家出走嘅有錢仔合謀扮拍拖: 四

自此之後，朱皓言日頭跟著我喺餐廳打工，夜晚返到屋企就寫小說。
我以為佢喺餐廳會好唔熟手係咁闖禍要我執屎，但估唔到佢都幾快上手，仲好似幾開心。佢比我想像中快適應呢度嘅生活。
「唉，如果唔係我仲有一個作家夢，我真係想之後都留喺度算。」佢同我講。
我不予置評，只當係有錢少爺第一次體驗平民生活嘅新鮮感。

好多對我嚟講好平常嘅事，都係佢冇經歷過嘅。
例如食杯麵。

「吓？你冇食過杯麵？！」知道呢件事之後我爭啲嚇到口都合唔埋。
有冇離地到咁⋯⋯


「我屋企好嚴，由細到大都唔俾我食所謂嘅¥｛田垃圾食物$/.。」佢聳一聳肩。
其實我覺得佢某程度上都幾可憐。
我屋企以前都叫有啲錢，但我爸爸媽媽就從來唔會咁樣限制我。
望住朱皓言感到新奇嘅表情，我體內某種奇異嘅母愛被激發，令到我買咗一堆杯麵返屋企。
其實最主要都係因為杯麵平⋯⋯
如是者我哋食咗成個禮拜杯麵，最後食到想嘔。
「我呢一年內都唔會再食杯麵。」我而家一聞到杯麵味就想嘔。

我哋兩個過住忙碌嘅日子，眨下眼就到咗月尾，係出糧嘅時候。
「等我買枝blue label賀一賀佢先！」呢條友，一有錢就身痕。


我都唔知自己幾耐冇飲過blue label⋯⋯
不過既然佢係用自己打工錢，我梗係唔出聲啦。
一聲清脆嘅玻璃杯碰撞聲響起，裏面深色嘅液體搖搖晃晃。
我近乎貪婪咁一飲而盡，久違嘅香醇令我忍唔住滿足咁喟歎一聲。
「呢筆錢使得值呀呢？」朱皓言洋洋得意咁講。
再過幾日，朱皓言就會走，所以呢晚我仲買咗pizza，當係歡送佢。

「其實點解你打工打得咁搏命嘅。」可能係見我每一日都返工冇唞過，朱皓言飲飲下酒就問咗我呢個問題。
「因為爭人錢。」我嘅聲音染上醉意。
「我細個可能同你差唔多有錢。」我又飲咗啖酒，自顧自咁繼續講：「後尾我阿媽病咗，我阿爸用咗好多錢想醫好佢，但最後我阿媽都係過咗身。可能係花咗太多心力喺阿媽度，冇能力兼顧，後尾我阿爸壇生意都搞唔掂，仲爭人錢。早幾年，佢病死咗，佢筆數就落咗喺我頭上，我唯有quit u出嚟做嘢還錢，不過到而家都未還完。」 


朱皓言冇出聲。
「聽落好似好慘，但習慣咗之後其實就冇感覺。」我唔係扮堅強，呢句係我嘅真心話。
平時我唔會咁易同人講自己嘢，但朱皓言唔同，佢對我嚟講好似另一個世界嘅人。同佢傾訴對我嚟講毫無負擔。
「總之我而家最大嘅願望就係還晒錢，自己開餐廳！！」太耐冇飲酒，我好快就醉咗，語氣變得高亢。

「我要開餐廳呀！！！」我唔知第幾次向朱皓言強調。
「係喇係喇知道知道。」朱皓言語氣有少少無奈。
後來發生咩事我就唔記得咗喇，因為我直接瞓著咗。