我同離家出走嘅有錢仔合謀扮拍拖: 情人節番外

「情人節快樂！」一到夜晚十二點，我就衝入書房，對住埋頭寫緊小說嘅朱皓言講。
佢嘅視線離開電腦，抬頭對住我微笑。
「過嚟。」佢對我招手。
我行埋去，熟練咁坐咗喺佢大脾。
「情人節喇喎！我份禮物呢？」我攬住佢條頸。
「喺度囉。」佢用下巴示意我望向電腦。

電腦顯示嘅係佢寫緊嘅小說。
我碌上最頂睇個標題。
「我同靚女包租婆的情慾二三事」


「朱皓言！你痴線㗎？」我不滿咁望住佢。
而佢已經笑到身體不停抖震，講唔到嘢。

笑咗唔知幾耐，佢終於停咗落嚟。
「好喇好喇，禮物喺度呀。」朱皓言打開櫃桶，攞出一個包裝精美嘅盒。
我期待咁接過，然後打開。
入面係我前排話想買嘅香水。
「正！多謝！」我開心咁錫咗佢塊面一啖。

「你就收咗禮物喇，咁我嗰份呢？」朱皓言對住我攤開手。


「我諗好㗎喇，不過聽日先去買。」我當然早有準備啦。
「其實可以唔使買。」佢講。
我不解咁望住佢。

「我呢篇故有啲內容唔知點寫好，不如你陪我實際操作下，幫我搵下靈感？」佢笑得不懷好意。
我即刻get到，反應好快咁想跳落地跑走，但佢已經緊緊捉住咗我。
「啱喇，我下個場景想寫書房⋯⋯」佢講完之後就壓咗我喺書檯，然後錫咗落嚟。
「唔！」我掙扎，但雙手被佢輕易控制住。
最後我都係屈服咗⋯⋯