就咁樣纏綿咗好耐,我哋嘅嘴唇終於分開。
安靜嘅空間入面只有我哋兩個微微嘅喘息聲。

朱皓言仍然維持住攬住我嘅姿勢,手指隨意把玩我嘅頭髮。
呢個姿勢令我耳仔緊貼住佢心口,我聽到佢清晰又用力嘅心跳聲。
「其實我唔希望你為咗我而留低。」朱皓言低沉嘅聲音傳嚟。由於我一直貼住佢嘅胸口,佢講嘢嘅時候,我仲感受佢嘅胸腔震動。
聽到佢嘅說話,我窒咗窒,抬頭望向佢。
佢感覺到我嘅視線,都低頭望住我。
「如果錯過咗今次,你可能以後都冇咁嘅機會再出國。」朱皓言好認真咁望住我。「而且你仲要還債呢,如果你攞咗錢但又繼續留喺度,我屋企人唔會就咁就算。但我又唔捨得你將錢還返俾佢哋,自己一個繼續孭住咁大筆債。」佢輕輕摸咗摸我個頭。
我默不作聲,靜靜咁等佢講下一句說話。


「所以,你出國啦。」朱皓言呢個時候嘅聲音變得好輕,彷彿無法捕捉,我知道佢有幾唔捨得。

「我會返去我屋企。而家嘅我未有能力同佢哋對抗,如果太任性妄為仲會拖累你。我只可以一步一步咁打好基礎,將來先有能力光明正大咁同你一齊、保護你,只要你肯相信我。」佢原本攬住我嗰隻手放低咗,改為拖住我,同我十指緊扣,拇指一下一下咁摩挲我嘅指骨。
沉默咗幾秒,佢又再開口。
「其實我前排已經諗緊呢啲嘢,諗住遲啲確認你嘅心意之後再同你講我嘅計劃。冇諗到你咁傻。」朱皓言輕笑,用另一隻手搣咗搣我塊面。
「咁鍾意我?連出國嘅機會都要放棄?」佢嘅語氣又恢復咗以往嘅不懷好意同狡猾。
「你收皮啦!」被佢拆穿咗心意,我面一紅,隨手將隔離嘅咕𠱸掉向佢,然後從佢嘅懷抱掙脫,逃亡咁跑咗入房。

「唔食蛋糕喇?」佢高聲問,語氣仍然帶住嗰陣嬲打嘅笑意。
「唔食!」房間內,我將滾燙嘅臉龐埋入被竇,聲音模糊不清,仲帶住幾分羞恥。


我喺房冷靜咗一陣先至出返廳。朱皓言坐喺梳化,已經切好咗蛋糕。
「過嚟食啦。」佢抬頭溫和咁望住我。
食蛋糕嘅時候,我又延續返頭先嘅話題,將我嘅擔憂講出嚟。

「你⋯⋯真係決定要為咗我而返去?咁你仲點樣寫小說,點樣做作家?」佢唔希望我為佢而放棄出國,同樣我都唔希望佢為咗我而逼自己做唔想做嘅事。
我希望佢諗清楚,唔想佢後悔。
「其實我唔完全係為咗你。」朱皓言嘅聲音沉穩。「離開屋企嘅呢段日子係我咁耐以嚟最開心嘅日子,我可以盡情做自己鍾意做嘅事。我好想繼續呢種生活,但前提係我要有足夠能力,令我屋企人唔再干涉打擾我哋。所以我一定要返去,除咗係為咗你,亦都係為咗令自己將來可以獲得真正嘅自由。」佢嘅目光堅定,好明顯已經下定咗決心,我一時間諗唔到可以點勸佢。
「信我。」察覺到我嘅不安,朱皓言開口。短短兩個字,卻因為佢篤定嘅語氣同認真嘅神情而帶有強大嘅安定人心嘅力量。

憑佢嘅能力,我相信的確冇嘢係佢做唔到嘅,只係睇佢肯唔肯去做。


我都要努力成為一個配得上佢嘅人。望住朱皓言閃著光芒凝視住我嘅雙眸,我都暗地裏下定咗決心。