妳與我，間隔着一點點距離: 第十六章

醒來之時，我已置身醫院，床邊只有還穿着校服，眉頭深鎖的劉華。
「劉……咳咳……」我想開口叫他，但喉嚨乾涸得連發聲也困難。
「喂死仔，你醒喇？我斟杯水俾你先啦。」劉華急忙幫我倒了杯水。
「我……我做咩入咗廠嘅？」我喝了口水稍稍滋潤了喉嚨，然後問道。
「醫生話你重感冒發高燒，但係仲唔抖下搞到操勞過度暈咗，咪送你入廠囉。你知唔知呀，你暈低嗰下，教音樂個呀嬋嚇到成碌木棟喺度，係我拿拿林抱你落醫療室，再叫校務處啲人call白車咋。」
「喂，我啱啱先醒你就不停咁講講講，你有冇諗過我感受架？」
劉華聽罷尷尬一笑，沒有再說下去。
「咦，我個書包……」我看見放在病床旁邊那個櫃上的書包。
「你條女幫你執架，我本身送完你落醫療室諗住即刻跑上課室幫你執書包，點知到咗半路已經見到揹住你個書包走落嚟。」
「邊個我條女呀……」口裏說着否認的話，我的嘴角卻微微上翹。


「你睇你嘴角含春喇，仲唔認？」
「唔好講呢啲喇……話時話我咗幾耐？」
「幾粒鐘姐……宜家四點幾咋嘛。」
「咁我老母呢？點解唔見佢嘅？校方應該有通知佢架？」
「伯母一早嚟咗喇，我都係打你電話嗰陣伯母代聽嘅時候同我講你嘅床號。佢話煲啲老火湯俾你今夜晚飲，所以返咗去先。」
「咁……佢呢？」
「你話你條女？佢冇咩喎，淨係放學嗰陣叫我交低咗你啲功課俾我咋。」
「唔……」
「唔洗咁頹喎，佢可能未搵你姐，話唔定佢陣間親自走嚟醫院探你呢！順手拉埋啲簾，然後……」
「好心你啦，咁大個人仲咁多幻想，又話有功課，拎出嚟啦，唔係你盞冇得抄架咋。」


「咁好中氣鬧人，話你病都冇人信啦……」
「唔滿意？想自己做功課？」
「冇冇冇，即刻拎出嚟……」
 
我和劉華一直做功課，做到大概六時多，他才收拾東西回家去。
劉華離開後，我拿出了手提電話，看到了很多則未看的Whatsapp信息，大部份來自我跟劉華那個朋友圈子的群組，每個人都問我死了沒有，劉華則代我回應我還死不了。
然而，再往下看，劉華竟拍了一張我還在睡的照片，並上載到群組上，照片隨即成為了改圖素材，我頓時化身了「懷念謙謙」、「忘了謙」等，劉華還給我加了一句「你班仆街俾我抖下得唔得」。
我只能在群組上回覆道：「你班死仔！我出院你地就仆街！」順手加了好幾個憤怒的Emoji。
他們沒有理會我的憤怒，只顧不停地恥笑着我，我也懶得看他們如何作弄我，便不再理會那群組，翻查其他未讀訊息。
有好幾個不太熟的同班同學傳來了慰問，我也有禮地逐一回應，唯獨鍾英敏沒有傳來訊息。


她大概是有事要辦，才沒有空找我吧。我一直這樣跟自己說，但思緒還是亂亂的，內心也耿耿於懷。
我躺在純白的病床上，呆呆地看着純白的天花板，眼前的一切都白得十分礙眼，彷彿本應有一點筆跡，一點色彩，現實卻只有一片白。
跟她相識了一陣子，關係也由零建立到經常交談的朋友，本以為能夠無阻無礙一路發展下去，卻在此刻遇上了樽頸。
即使一些交情較淡的同學也傳來了慰問，唯欠她的一聲問好，究竟她當我甚麼？
這晚，我一直靜靜地等，我的電話也默默地伴着我，沒哼一聲。