妳與我，間隔着一點點距離: 第二十章

隔天回校，詩詩立刻追問我跟鍾英敏的情況。
「喂，你尋日有冇搵人呀？」
「冇……」
「搞錯呀！叫咗你搵都唔搵！」
「咁我真係唔知講咩好嘛……」
「冇鬼用，講句野都唔識……」
「我……」
「你咩你，俾我講中咗冇說話好講啦？」
「唔……」
「喂你部電話呢？」


「喺櫃桶……喂喂！做咩拎我部電話？」
「你部電話暫時由我保管先，放咗學我要親眼望住你搵佢，唔係你唔洗旨意拎番電話！」
「喂……」
「喂咩喂，專心上堂啦。」
我的電話就這樣落在詩詩的手中，而我亦被逼要發訊息給鍾英敏。
我不明白詩詩為何對此事如此熱心，我亦不想知道，只是覺得她多管閒事，拋給我一個又一個麻煩。
唉，唯有快快都事情解決掉，好讓她不再騷擾我吧，此刻的我是這樣想着。
 
到了放學，劉華依舊走到我的座位來，催促我快點收拾書包，然後去打球。
「喂，我晏啲先落球場。」


「點解？」
「女班長拎咗我部電話，話放咗學要望住我搵佢先俾番部電話我。」
「佢係……」
「咪佢囉。」
「佢？吓，女班長知道咗？」
「係呀！我知道咗，嘻嘻！」詩詩突然插話。
「點解你會知嘅？」
「我唔小心聽到架咋……」
「咁即係……好喇，我都係走先喇，衰仔陣間落球場搵我。」劉華說罷落荒而逃，大概他是害怕被詩詩抓住不放，問他與女神的事吧。
待班上的同學都走了，詩詩走到班房門口，徐徐關上門，然後拿出從副班長借來的班房鑰匙，把門給鎖上了。


「你一日唔send message俾佢，你都唔洗旨意走。」她把玩着手上的鑰匙。
「咁你慢慢等啦……」我索性伏在桌上倒頭大睡，反正她無論如何都要把鑰匙歸還到校務處，作為一個品學兼優的女班長，她絕對不會為了我這點小事而做出破壞自己形象的事。
「喂喂喂！你……你起身呀！」她拉扯着我的衣袖，但我無動於衷。
「哼！冇膽鬼！淨係識逃避！」她開始罵我。
「咁真係唔work嘛！」我反駁。
「你試過喇咩？」
「諗都諗到啦！」
「你係佢咩？你又知佢唔會覆你？」
「咁……」
接下來是一輪沉默。
良久，詩詩拿起了我的電話，遞到我的面前。
「做乜？」
「解鎖。」
「吓？」
「解鎖啦。」


「哦……」我竟然乖乖的解了鎖。
然後她在我的電話屏幕上不斷的按按按。
「喂你做緊咩？」我把頭湊過去，但她避開了。
「唔通你……喂快啲俾番我！」我心知不妙，立刻伸手去搶回電話，但都被她躲開了。
「既然你咁冇膽，咪等我幫下你囉。」她還向我單眼。
然後，她把電話屏幕遞到我的眼前。
「Long time no chat~」一個已送出的訊息。
「？」她竟然回覆了。
「都話咗佢會回架啦，男人老狗俾啲信心自己嘛。」詩詩又調侃我，然後又再按我的電話。
「喂你想覆咩呀？俾番我啦，等我自己嚟。」
「唔好意思，我幫你覆咗喇，不過跟住落嚟就靠你自己喇。」她把電話交還給我。
「調咗位之後過得如何？」訊息是送出了，但只有一個剔，她應該還未看。
我把電話收回褲袋，只見詩詩已經揹上了書包，解開了門鎖，準備離開。
「加油啦，支持你！」她給我比了個大拇指，然後便走了。
我摸了摸褲袋裏的電話，若非詩詩強行搶了我的電話，幫我開了個頭，可能我還在磨蹭着，不知又蹉跎了多少時間，亦一直跨不了自卑這障礙。


謝謝你，李詩詩。